فلموں کی غیر قانونی نقول سے ہالی وڈ کو اربوں ڈالر کا نقصان ہوتا ہے

’موشن پکچر ایسوسی ایشن آف امریکہ‘ ایم پی پی اے کےمطابق فی فلم تیس ہزار ڈالر ہرجانہ طلب کیا جائے گا۔

ایم پی پی اے کےسربراہ ڈین گلکمین نے کہا کہ یہ عدالتی کارروائی نہایت ضروری ہے اس سے پہلے کہ تیز رفتار انٹرنیٹ کی بدولت فلموں کی غیرقانونی نقول عام ہو جائیں۔

ایم پی پی اے سولہ نومبر سےسینکڑوں مقدمے دائر کرے گی۔

گلکمین نے کہا ’ یہ آسان فیصلہ نہیں تھا لیکن اس بات کی ضرورت ہے کہ انٹرنیٹ پر فلموں کےغیرقانونی تبادلے پر قابو پایا جائے‘۔

’ فلمسازی کی ایک سو دس سالہ تاریخ میں فلموں کی غیرقانونی نقول بنانے کا طریقہ ، فلمیں بنانے والوں کو درپیش سب سے بڑا خطرہ ہے‘

یہ مقدمات ان افراد کے خلاف قائم کیے جائیں گے جو یا تو فلموں کی غیرقانونی نقول بناتے ہیں یا پھر ان نقول کے کاروبار میں ملوث ہیں۔

ڈین گلکمین نے مزید کہا کہ ’ وہ لوگ جو فلمیں چراتے ہیں اس خام خیالی کا شکار ہیں کہ وہ انٹرنیٹ پرگمنام ہیں جبکہ ایسا نہیں ہے۔ ہم جانتے ہیں کہ وہ کون ہیں اور ہم ان کا پیچھا کریں گے‘۔

ایم پی پی اے کے دعوی کے مطابق فلموں کی غیرقانونی نقول کی وجہ سے امریکی فلمی صنعت کو ہر سال تین بلین ڈالر کا نقصان ہوتا ہے۔

ایم پی پی اے ہالی وڈ کےسات بڑے سٹوڈیو کی نمائندہ تنظیم ہے۔