’مجھے میری قابلیت کی بنیاد پر کام مل رہا ہے‘

بالی وڈ کی امریکی نژاد اداکارہ نرگس فخری کو اس فلمی صنعت میں قدم رکھے مشکل سے چند سال ہی ہوئے ہیں لیکن ان کا اعتماد ساتویں آسمان پر ہے۔

وہ ان دنوں بالی وڈ کے ساتھ ساتھ ہالی وڈ میں بھی کافی سرگرم نظر آ رہی ہیں۔

نرگس کا کہنا ہے کہ ’چاہے بالی وڈ ہو یا ہالی وڈ، میں فلموں کے پیچھے نہیں بھاگتی بلکہ مجھے میری قابلیت کی بنیاد پر کام مل رہا ہے۔‘

رواں سال ’ہاؤس فل تھری‘ جیسی ہٹ فلم کے بعد نرگس جلد ہی اداکار رتیش دیش مکھ کے ساتھ فلم ’بینجو‘ میں نظر آئیں گي۔

اس فلم میں وہ نیو یارک میں رہنے والی ایک ڈی جے کا کردار ادا کر رہی ہیں۔

نرگس کہتی ہیں: ’بینجو کی کہانی ناظرین کو ضرور پسند آئے گي۔ رتیش دیش مکھ کے ساتھ کام کرنا بھی ایک شاندار تجربہ رہا۔‘

وہ کہتی کہ ہیں بالی وڈ کے معاملے میں وہ خوش قسمت رہیں کہ انھیں اچھے لوگوں کے ساتھ کام کرنے کا موقع ملا اور اس لیے زیادہ پریشانی نہیں ہوئی۔

ان کے مطابق: ’بالی وڈ کی فلموں میں نغمے اور رقص کافی اہمیت کے حامل ہیں، اس کے باوجود یہاں بہت سنجیدہ فلمیں بھی بن رہی ہیں جو ہالی وڈ میں بھی نہیں بنتی ہیں۔‘

اس سے قبل فلم ‎’مدراس کیفے‘ میں نرگس نے ایک صحافی کا کردار ادا کیا تھا۔

فلم ’اگلی‘ کی مثال دیتے ہوئے نرگس کہتی ہيں: ’ایسی فلموں کو باہر بھی کافی پسند کیا جاتا ہے۔ تاہم اس وقت بالی وڈ کے بڑے بینر بھی صرف رقص اور گلوکاری سے لبریز فلموں پر ہی زیادہ توجہ دے رہے ہیں۔ لیکن اب ناظرین کا مزاج بدل رہا ہے۔‘

زیادہ تر ملٹي سٹار فلموں میں ہی نظر آنے والی نرگس کے مطابق: ’اس سے کوئی فرق نہیں پڑتا کہ فلم میں کتنے سٹار ہیں۔ اگر میرا رول اچھا ہے اور اچھے لوگوں کے ساتھ کام کرنے کا موقع مل رہا ہے تو میں ایسی فلمیں آگے بھی کرنا چاہوں گي۔‘