امیتابھ بچن کے ایک کروڑ ٹوئٹر فالوورز

بالی وڈ سٹار امیتابھ بچن کے ٹوئٹر پر ایک کروڑ فالوورز ہونے کے بعد بھارت میں سب سے زیادہ فالو کیے جانے والے انسان بن گئے ہیں۔

ٹوئٹر کی جانب سے ایک بیان میں کہا گیا کہ امیتابھ بچن بہت ورسٹائل ہیں اور انھوں نے ٹوئٹر پر سیاست اور بین الاقوامی موضوعات پر ٹوئٹس کیے۔

اس کے علاوہ وہ اپنے مداحوں کو اپنی نجی اور پیشہ ورانہ زندگی کے بارے میں بھی ٹوئٹس کے ذریعے سوالات کے جوابات دیتے رہے ہیں۔

امتیابھ نے ایک کروڑ فالورز پورے ہونے پر ایک ٹوئٹ میں کہا’ ٹوئٹر پر ایک ملین!! آپ سب کو مجھے فالو کرنے کا شکریہ، اگلا ہدف دو کروڑ کا ہے۔‘

71 سالہ امیتابھ ،جنھوں نے 180 سے زائد فلموں میں کام کیا ہے۔ انھوں نے حال ہی میں ’دی گریٹ گیٹسبی‘ نامی ناول پر بنائے جانے والی نئی فلم میں کام سے اپنے ہالی وڈ سفر کا آغاز کیا۔

فلموں کے علاوہ وہ ٹی وی پروگرام ’کون بنے گا کروڑ پتی‘ کی بھی میزبانی کرتے ہیں جو کہ امریکی پروگرام ’ہو وانٹس ٹو بی اے ملینیئر‘پر مبنی ہے۔

امیتابھ کا مجسمہ لندن کے مادام تساد نامی مومی عجائب گھر میں بھی موجود ہے، وہ پہلے ہندوستانی اداکار تھے جن کا مجسمہ مادام مادام تساد میں بنایا گیا۔

2012 میں ہونے والے لندن اولمپکس میں کھیلوں کی افتتاحی تقریب سے قبل انھوں نے اس کی مشعل بھی اٹھائی تھی۔

سوشل میڈیا پر فعال رہنے والے بچن کے فیس بک پیج پر بھی ڈیرھ کروڑ سے زیادہ لائیکس ہیں۔

امیتابھ نے ایک کروڑ فالوورز حاصل کرنے کے بعد ٹوئٹر پر خوشی کا اظہار کیا اور کہا کہ ان کا اگلا ہدف دو کروڑ ہے۔

ان کے مداحوں نے ان کو ٹوئٹس ہی کے ذریعے مبارک باد دی۔

موسس ساپر نامی ایک فالور نے کہا’دنیا بھر سے ایک کروڑ فالوورز آپ سے محبت اور آپ کا احترام کرتے ہیں۔‘