سنجے دت کی جیل میں واپسی
بالی وڈ کے مشہور اداکار سنجے دت جمعرات کو پونے کی یاراویدا جیل میں اپنی بقیہ سزا کاٹنے کے لیے واپس پہنچیں گے۔
ان کے وکیلوں کا کہنا ہے کہ سنجے دت جمعرات کو عدالت میں پیش ہوں گے۔
سنجے دت پہلے ہی اپنی پانچ سال کی سزا میں سے اٹھارہ ماہ قید کاٹ چکے ہیں۔
ان کو یہ سزا ایک پستول اور رائفل غیر قانونی طور پر رکھنے کے جرم میں سنائی گئی تھی۔
سنے دت نے عدالت سے کچھ مہلت مانگی تھی تاکہ وہ اپنی کچھ فلموں میں کام مکمل کروا سکیں مگر عدالت نے انہیں مہلت دینے سے انکار کر دیا۔
سنجے دت نے ان حملہ آورں سے غیر قانونی طور پر ہتھیار خریدے جنہوں نے ممبئی میں 2006 میں دھماکے کیے تھے جن کے نتیجے میں 257 لوگ ہلاک جبکہ 713 افراد زخمی ہو گئے تھے۔
انہیں سازش کے جرم سے بری کر دیا گیا تھا۔
ایک ہندو باپ اور مسلمان ماں کی اولاد سنجے دت کا کہنا ہے کہ ان ہتھیاروں کا خریدنا ان کی خود حفاظتی کے لیے بہت ضروری تھا خصوصاً ان حالات میں جو ایودھیا میں بابری مسجد کے انہدام کے نتیجے میں پیدا ہوئے تھے۔
End of سب سے زیادہ پڑھی جانے والی
منگل کو سپریم کورٹ نے ان کی جانب سے مہلت کی درخواست خارج کر دی تھی۔
سنجے دت نے منگل کو ٹاڈا عدالت میں کہا تھا کہ انہیں شدت پسند تنظیموں سے جان کا خطرہ ہے اور ان کو خصوصی عدالت کی بجائے ياراویدا جیل میں ہتھیار ڈالنے کی اجازت دی جائے۔
سنجے دت نے اس سزا کے خلاف سپریم کورٹ میں نظر ثانی کی درخواست بھی داخل کی تھی لیکن سپریم کورٹ نے اس پر غور کرنے سے انکار کر دیا تھا۔
انہیں گزشتہ ماہ عدالت کے سامنے پیش ہونا تھا لیکن سپریم کورٹ نے انہیں ایک ماہ کی مہلت دی تھی جو کہ 16 مئی کو ختم ہو رہی ہے۔
ٹاڈا عدالت نے سنجے دت کو غیر قانونی ہتھیار رکھنے کا مجرم پایا تھا اور چھ سال کی سزا سنائی تھی جسے سپریم کورٹ نے کم کرکے پانچ سال کر دیا تھا۔
