’جوان ہوں، لڑکیوں سے دوستی پر اعتراض نہیں‘

بالی وڈ اداکار رنبیر کپور اپنے کیرئر کے مختصر عرصے میں ہی اپنی فلموں کے لیے کم اور شبھنیتريو نامی لڑکی کے ساتھ مبینہ دوستی کو لے کر زیادہ شہ سرخیوں میں رہے ہیں۔

اس پر وہ برملا کہتے بھی ہیں ’میں ابھی جوان ہوں، اور لڑکیوں کے ساتھ دوستی سے مجھے بالکل پرہیز نہیں ہے۔‘

ممبئی میں اپنی آنے والی فلم ’راك سٹار‘ کے بارے میں صحافیوں سے بات کرتے ہوئے رنبیر نے کہا ’ راك سٹار میں ایک کردار ہے جو مانتا ہے کہ زندگی میں آپ کو جو بھی دکھ یا خوشی ملتی ہے اس کا تجربہ آپ کے کام میں استعمال ہوتا ہے۔ آپ کو زندگی میں دکھ اور تکلیف نہیں ملی ہے تو آپ زندگی میں کچھ خاص نہیں کر سکتے۔ آپ کا دل ٹوٹنا ضروری ہے ، تبھی آپ بہتر موسیقی تخلیق کر سکتے ہو۔‘

رنبیر نے شوخ انداز میں کہا کہ وہ اصل زندگی میں اپنا دل ٹوٹنے کا انتظار کر رہے ہیں۔

انہوں نے یہ بھی کہا کہ انہوں نے بھی اپنی زندگی میں کچھ تكالیف سہی ہیں لیکن اس کا مطلب یہ نہیں کہ وہ ’دیوداس‘ بن کر گھومیں۔

’راك سٹار‘ کے ہدایت کار امتیاز علی ہیں جو ’جب وی میٹ‘ اور ’لو آج کل‘ جیسی ہٹ فلمیں بنا چکے ہیں۔

فلم میں رنبیر کپور نے اپنے دادا مرحوم شمي کپور کے ساتھ کام کیا ہے جسے وہ ایک یادگار تجربہ سمجھتے ہیں۔

رنبیر کے مطابق ’وہ 80 سال کی عمر میں بھی کافی اورجوان تھے۔ سیٹ پر آتے تھے تو پورے ماحول کو خوش نما بنا دیتے تھے۔ اپنی تکلیف کسی سے کہتے نہیں تھے۔ میں ان کے ساتھ گذارا ہوا وقت کبھی نہیں بھولا پاؤں گا۔‘

اس فلم میں رنبیر کے ساتھ نرگس فخري ہیں جن کی یہ پہلی ہندی فلم ہے۔

حال ہی میں رنبیر کپور نے اپنے والد رشی کپور کے ساتھ ایک اشتہار میں کام کیا۔ وہ تجربہ رنبیر کپور نے کچھ یوں بیان کیا ’پاپا کے ساتھ کام کرتے وقت میری حالت خراب ہو گئی کیونکہ وہ ایسے شخص ہیں جو صاف صاف بات کرتے ہیں۔ جو پسند نہیں ہے وہ بتا دیتے ہیں لیکن سیٹ پر انہوں نے کافی دوستانہ رویہ رکھا۔ کافی پروفیشنل ہیں میرے پاپا۔‘

رنبیر نے یہاں پر یہ بھی انکشاف کیا کہ رشی کپور اب تک کسی بھی فلم میں ان کے اداکاری سے متاثر نہیں ہوئے ہیں۔