چینی سٹار گاؤ لیاؤ: جب ناک پتلا کروانے والی سرجری نے ایک خوبرو اداکارہ کا چہرہ بھیانک بنا دیا

اس مضمون میں ایسی تصاویر ہیں جو قارئین کے لیے تکلیف کا باعث بن سکتی ہیں۔

ایک چینی اداکارہ نے اپنی ناک کی کاسمیٹک یعنی زیبائشی سرجری خراب ہونے کے بعد اپنی تصاویر شیئر کی ہیں تاکہ دوسروں کو ایسی سرجری کے خطرات کے بارے میں بتا سکیں۔

گاؤ لیاؤ نے کئی فلموں اور ٹی وی ڈراموں میں کام کیا ہے اور انھیں ایک ابھرتے ہوئے ستارے کے طور پر دیکھا جا رہا تھا۔ مگر حالیہ مہینوں میں ان کی مقبولیت میں کمی واقع ہوئی ہے۔

چینی سوشل میڈیا پلیٹ فارم سائنو ویبو پر انھوں نے اپنی کئی ماہ طویل غیر حاضری کی وضاحت کرتے ہوئے پوسٹ کی کہ اس کا سبب ایک کاسمیٹک سرجیکل واقعہ تھا جس کے بعد ان کی ناک ’گلنے‘ لگی تھی۔

گاؤ نے یہ تصاویر اپنے پچاس لاکھ فالوورز کے ساتھ شیئر کی ہیں جس کے بعد کاسمیٹک سرجری کے موضوع پر بحث چھڑ گئی ہے۔ یہ سرجری چین میں بہت مقبول ہے۔

انھوں نے بتایا کہ اکتوبر میں ان کی ایک دوست نے انھیں ایک پلاسٹک سرجن سے متعارف کروایا، جس نے انھیں اپنی ناک معمولی سی پتلی کروانے کا مشورہ دیا اور کہا کہ اس سے ان کی مقبولیت میں مزید اضافہ ہو جائے گا۔

انھوں نے لکھا: ’جراحی کا یہ پورا عمل چار گھنٹے پر محیط تھا۔ میں نے سوچا تھا کہ ان چار گھنٹوں کے اندر میں مزید خوبصورت بن جاؤں گی۔‘

ان کا کہنا تھا: ’میں نے سوچا بھی نہ تھا کہ یہ چار گھنٹے میرے لیے ایک ڈراؤنے خواب کا آغاز ثابت ہوں گے۔‘

وہ بتاتی ہیں کہ ناک کے آپریشن کے بعد ان کی ناک میں کھجلی ہونے لگی اور اس میں بار بار پیپ پڑنے لگی۔ حالانکہ انھیں بتایا گیا تھا کہ وہ دسمبر یا جنوری میں پھر سے اداکاری شروع کر سکیں گی۔

یہ بھی پڑھیے

اچھا دکھائی دینے کے لیے کاسمیٹک ٹریٹمنٹ کروانے میں اضافہ

مردوں میں کاسمیٹک سرجری کا بڑھتا رجحان اور خطرات

’چینی خواتین کی اولین پسند ایک ستواں ناک‘

انھوں نے کہا کہ ’سرجری کے بعد میری ناک کی نوک پر جلد سیاہ پڑنے لگی اور ناک گلنے لگی۔ مجھے خودکشی کرنے کا خیال بھی آیا۔‘

گاؤ کو دو مہینے تک ہسپتال میں رہنا پڑا اور تقریباً 61 ہزار ڈالر سے بھی ہاتھ دھونا پڑے۔

انھوں نے اپنے مداحوں کو بتایا کہ ان کی ناک کو پہنچنے والے نقصان کے بعد وہ کم سے کم ایک سال تک ناک کو پھر سے ٹھیک کروانے کے لیے آپریشن کے قابل نہیں ہو سکیں گی۔

روزنامہ دا پیپر کے مطابق گاؤ کی جانب سے اپنی تصاویر شیئر کیے جانے کے بعد اس کلینک کے خلاف جہاں ان کا آپریشن کیا گیا تھا متعلقہ محکمے کو کئی شکایات موصول ہوئی ہیں جن کے بعد تحقیقات شروع کر دی گئی ہیں۔

سوشل میڈیا پر کئی لوگوں نے مطالبہ کیا ہے کہ گاؤ کی ناک کا آپریشن کرنے والوں کے خلاف کارروائی کی جائے۔ جبکہ کئی دوسرے افراد نے چین میں قواعد و ضوابط کو بہتر بنانے کا مطالبہ کیا ہے۔

کاسمیٹک سرجری چین میں نہایت مقبول ہے اور 2004 میں ان لوگوں کے لیے ایک مقابلہِ حسن کا اہتمام کیا گیا تھا جنھوں نے اپنا ناک نقشہ بہتر بنانے کے لیے کاسمیٹک سرجری کروائی تھی۔

کاسمیٹک سرجری کی مقبولیت چینی نوجوانوں میں بڑھتی جا رہی ہے جس سے ان کلینکس کی مانگ میں اضافہ ہوا ہے اور اس کے نتیجے میں بہت سے ایسے لوگ یہ عمل انجام دینے لگے ہیں جو باقاعدہ سندیافتہ نہیں ہیں۔