آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
شو بز ڈائری: کنگنا کا غصہ، پردہ سیمیں پر ہوئی کس کی واپسی اور سلمان خان کیا نیا ہنر
- مصنف, نصرت جہاں
- عہدہ, بی بی سی اردو ڈاٹ کام، لندن
امریکہ میں ایک سیاہ فام شخص کی سفید فام پولیس اہلکار کے ہاتھوں ہلاکت کے بعد شروع ہونے والے احتجاج کا سلسلہ جاری ہے۔ اس واقعے پر دنیا بھر کی اہم شخصیات نے سوشل میڈیا پر اپنی رائے کا اظہار کیا تو بالی وڈ کے کچھ بڑے ستاروں نے بھی بہتی گنگا میں ہاتھ دھونے کی کوشش کی جس پر انہیں ٹرول کا نشانہ بنایا گیا۔
ان بڑی شخصیات میں پردیسی گرل کہی جانے والی پرینکا چوپڑہ سب سے آگے تھیں۔ ساتھ میں دپیکا پادوکون، دیشا پٹانی، ٹائیگر شروف، کرن جوہر، کرینہ کپورکے ساتھ کئی نام شامل ہیں۔
پرینکا نے انتہائی جذباتی انداز میں اپنے ٹوئٹر ہینڈل پر لکھا کہ کسی کو محض اس کے رنگ کی وجہ سے قتل کرنا کہاں کا انصاف ہے سوشل میڈیا پر لوگوں کو یہ بات پسند نہیں آئی کہ بالی وڈ کی یہ شخصیات خود اپنے ملک میں سماجی نا انصافی کےخلاف بات کیوں نہیں کرتیں۔
یہ بھی پڑھیے
End of سب سے زیادہ پڑھی جانے والی
جہاں تک سیاہ فام لوگوں کے حقوق کی بات ہے اس حوالے سے کچھ صارفین نے پرینکا چوپڑہ کے ان اشتہارات کو ٹیگ کیا جن میں وہ گورے پن کی کریم لگانے کا مشورہ دے رہی تھیں اور کچھ نے انڈیا میں جاری فرقہ پرستی اور مبینہ سماجی ناانصافیوں پر ان کی خاموشی پر سوال اٹھائے۔
اس میں دو رائے نہیں کہ انسانی حقوق کی خلاف ورزیوں پر آواز اٹھانا اہم ہے چاہے وہ کہیں بھی اور کسی کے بھی خلاف ہوں۔ یہ اور بات ہے کہ جب دپیکا پادوکون دلی کی جامعہ یونیورسٹی کے طلبا کے ساتھ خاموش اظہارِ یکجہتی کرنے پہنچیں تو انہیں اس کی سزا ان کی فلم 'چھپاک' کے بائیکاٹ کا اعلان کر کے دی گئی۔
لیکن اداکارہ کنگنا رناوت نے ان تمام شخصیات کو لتاڑتے ہوئے ’انڈیا میں ایک سادھو کی ہجوم کے ہاتھوں ہلاکت کی مثال دیتے ہوئے کہا کہ ایسے معاملات میں لوگ خاموشی اختیار کر لیتے ہیں۔‘
کنگنا کا کہنا ہے کہ بالی وڈ کا یہ دہرا میعار ہے۔ شاید بالکل اسی طرح جس طرح حال ہی میں کنگنا کی بہن رنگولی نے انڈین مسلمانوں کے خلاف فرقہ وارانہ اور اشتعال انگیز ٹویٹس کی تھیں جس کے بعد ان کا ٹوئٹر اکاؤنٹ منسوخ کر دیا گیا تھا۔
اس وقت کنگنا نے ایک خاص فرقے کے خلاف زہر اگلنے پر اپنی بہن کو لتاڑنا ضروی نہیں سمجھا اور ہجوم کے ہاتھوں ہلاکتوں کے تو کئی واقعات ہوئے تو پھر کنگنا کے دل میں صرف ایک واقعے کا درد کیوں؟
اداکار ابھے دیول نے بھی کچھ اسی طرح کے خیالات کا اظہار کیا۔ ان کا کہنا تھا کہ بالی وڈ کے لوگ امریکہ میں جو ہو رہا ہے اس کے حق میں تو کھڑے ہیں لیکن انڈیا میں لاک ڈاؤن میں مزدوروں کے ساتھ جو کچھ ہو رہا ہے اس بارے میں کسی نے کھل کر کچھ نہیں کہا۔
ابھے جی پورے بالی ووڈ نے مودی جی کے 'مودی کیئر فنڈ' میں چاہتے یا نہ چاہتے ہوئے بھی کروڑوں روپے جمع کروائے اور بیچارے سونو سود تو دن رات ان مزدوروں کی خدمت میں لگے ہوئے ہیں اور کیا چاہیے اب بچے کی جان لو گے کیا۔
سشمیتا پھر سے پردۂ سیمیں پر
سابق حسینہ کائنات سشمیتا سین کافی عرصے بعد فلموں کا رخ کر رہی ہیں لیکن ایک ویب سیریز کے ساتھ۔ انسٹا گرام پر ایک نئی سیریز ' آریہ' کی ایک جھلک پیش کرتے ہوئے انھوں نے لکھا 'آپ نے بلایا اور ہم چلے آئے۔' سشمیتا آخری بار بڑے پردے پر 2015 میں بنگالی فلم 'نرباک' میں نظر آئی تھیں۔
اس سیریز کا ٹریلر پانچ جون کو ریلیز ہونے والا ہے۔ سشمیتا چاہے فلموں سے دور رہی ہوں لیکن سوشل میڈیا کے ذریعے وہ اپنے مداحوں سے مسلسل رابطے میں ہیں حال ہی میں سشمیتا سوشل میڈیا پر اپنے مداحوں کے ساتھ لائیو سیشن میں قرآن کی ایک آیت پڑھتی نظر آئی تھیں۔
سلمان خان پھر ہمیش ریشمیا کی راہ پر
اداکار سلمان خان نے ایک مرتبہ اپنے شاگرد اور دوست ہمیش ریشمیا کا مذاق اڑاتے ہوئے کہا تھا کہ یہ کھانا، گانا، کھانا، میوزک، رائیٹنگ پروڈکشن سب کچھ خود ہی کیوں کرنا چاہتے ہیں۔
آج خود سلمان بھی اسی راہ پر چل نکلے ہیں وہ ہیرو تو ہیں ہی ساتھ ہی پروڈیوسر بھی ہیں، گانے بھی گاتے ہیں لکھنے بھی لگے ہیں، پینٹنگ بھی کرتے ہیں اور اب سنا ہے کہ ایک کہانی بھی لکھ رہے ہیں جس پر فلم وہ خود ہی پروڈیوس کرنے والے ہیں۔
چلیں مان لیتے ہیں کہ رائٹر سلیم خان کے صاحبزادے ہونے کے ناطے ان میں کہانی لکھنے کا ٹیلنٹ ہے لیکن باقی کام کر کے دوسروں کے پیٹ پر تو لات نہ ماریں۔
