آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
فلم ساز مہیش بھٹ کو ’بھتے‘ کے لیے دھمکی
بالی وڈ کے فلم ساز مہیش بھٹ کو مبینہ طور پر ایک نامعلوم شخص نے 'بھتے' اور ان کی بیٹی اداکارہ عالیہ بھٹ کو مارنے کی دھمکی دی۔
انڈین خبر رساں ادارے پی ٹی آئی کے مطابق اس بارے میں جبری وصولی کے خلاف سرگرم ممبئی کے محکمہ پولیس میں شکایت درج کی گئی ہے۔ اور کرائم برانچ کا محکمہ اس معاملے کی چھان بین کر رہا ہے۔
پی ٹی آئی کے مطابق ممبئی پولیس کے ڈپٹی کمشنر اشوک دودھے نے بتایا ہے کہ ریاست اتر پردیش کے ایک نامعلوم شخص نے حال ہی میں مہیش بھٹ کو فون کیا تھا اور واٹس ایپ پر 50 لاکھ روپے کا مطالبہ کیا۔
پولیس کے مطابق اس شخص نے مہیش بھٹ کی بیٹی اداکارہ عالیہ بھٹ کو بھی مارنے کی دھمکی دی۔
مہیش بھٹ نے اس بارے میں ایک ٹویٹ کیا اور پولیس کی فوری کارروائی کے لیے شکریہ ادا کیا ہے۔
انہوں نے لکھا: ’جبری وصولی کے لیے میرے خاندان کو ملنے والی دھمکی سے میں حیرت زدہ رہ گيا تھا جسے مہاراشٹر اور ممبئی پولیس نے اپنی مشترکہ کوششوں سے شروع ہی میں کنٹرول کر لیا۔ ان کے شکرگزار ہیں۔‘
فلم ساز مہیش بھٹ کا شمار بالی کے لبرل خيال والے لوگوں میں ہوتا ہے اور دائیں بازو کی حامل ہندو تنظیمیں انھیں اکثر اپنا نشانہ بناتی رہتی ہیں۔
گذشتہ سال بھی سخت گیر ہندو تنظیم 'مہاراشٹر نو نرمان سینا' نے مہیش بھٹ سے کہا تھا کہ انھیں اپنی فلموں میں پاکستانی فنکاروں کو نہیں لینا چاہیے۔ تنظیم نے اس حکم نامے کی خلاف ورزی کی صورت میں انھیں مارنے پیٹنے کی دھمکی دی تھی۔
End of سب سے زیادہ پڑھی جانے والی
اس تنظیم نے اس حوالے سے کرن جوہر سمیت بعض دیگر افراد کو بھی ایسی ہی دھمکیاں دی تھیں۔
