آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ویمنز ٹی 20 ورلڈ کپ: ’عائشہ نسیم کو پاکستانی مینز ٹی 20 ٹیم میں شامل کیا جانا چاہیے‘
جنوبی افریقہ میں جاری ویمنز ٹی 20 ورلڈ کپ میں انڈیا نے پاکستان کو سات وکٹوں سے شکست دے دی ہے جس میں بڑا کردار رچا گھوش اور جمائمہ روڈریگیز کی بیٹنگ نے ادا کیا ہے۔
پاکستان نے انڈین ٹیم کو پہلے کھیلتے ہوئے جیت کے لیے 150 رنز کا ہدف دیا تھا جو انڈین ٹیم نے ایک اضافی رن کے ساتھ 19 ویں اوور میں حاصل کر لیا۔
پاکستان کی جانب سے سب سے قابلِ ذکر بیٹنگ بسمہ معروف نے کی جنھوں نے 55 گیندوں پر 68 رنز کی ناقابلِ شکست اننگز کھیلی۔ ان کے علاوہ عائشہ نسیم بھی 25 گیندوں پر 43 رنز بنا کر ناٹ آؤٹ رہیں۔
انڈیا کی بلے باز جمائمہ روڈریگیز نے 38 گیندوں پر 53 رنز بنائے جبکہ شفالی ورما نے 25 گیندوں پر 33 رنز بنائے۔ رچا گھوش نے صرف 20 گیندوں پر 31 رنز کی ناقابلِ شکست اننگز کھیلی اور انڈیا کو کامیابی تک لے گئیں۔
End of سب سے زیادہ پڑھی جانے والی
پاکستان کی بولرز میں سے نشرح سندھو نے دو جبکہ سعدیہ اقبال نے ایک وکٹ حاصل کی۔ انڈیا کی جانب سے دیپتی شرما اور پوجا وستراکر نے ایک ایک جبکہ رادھا یادیو نے دو وکٹیں حاصل کیں۔
پاکستانی ٹیم میچ تو نہیں جیت سکی تاہم عائشہ نسیم اور بسمہ معروف کی بلے بازی ٹوئٹر پر کرکٹ مداحوں کی تعریفیں سمیٹتی رہی۔
عائشہ نسیم کا سٹرائیک ریٹ 172 رہا اور اُنھوں نے دو چوکوں اور دو چھکوں کی مدد سے 43 رنز بنائے۔
اننت کشپ نامی ٹوئٹر صارف نے لکھا کہ عائشہ نسیم کو پاکستان کی مینز ٹی 20 ٹیم میں شامل کیا جانا چاہیے۔
سلمان خان نے لکھا کہ پاکستانی ویمن ٹیم کو درپیش وسائل کی کمی اور دیگر مشکلات کے باوجود انھوں نے بہت زبردست کھیلا، مگر ساتھ ہی ساتھ انھیں فیلڈنگ اور بولنگ پر بھی کام کرنا چاہیے۔
اُنھوں نے پاکستانی ویمن ٹیم کی تعریف کرتے ہوئے عائشہ نسیم اور بسمہ معروف کی کارکردگی کو بالخصوص سراہا۔
امرزش فاطمہ نے لکھا کہ بسمہ معروف کی شاندار بیٹنگ اور عائشہ نسیم کی سنسنی خیز ہٹنگ۔ میں بسمہ کے کریئر کی شروعات سے ہی ان کی فین ہوں اور اب عائشہ نسیم میری اگلی فیوریٹ ہیں۔ عائشہ نسیم، آپ سٹار ہیں۔
وقاص احمد گوندل نامی صارف نے لکھا کہ بہت سی بہتری کی گنجائش ہے۔ آخر ندا ڈار اور بسمہ معروف کب تک ہمیں بچاتی رہیں گی؟ صرف عائشہ نسیم وہ کھلاڑی ہیں جو دنیا کی دوسری ویمن سٹارز کے مقابلے کی لگتی ہیں۔ عالیہ ریاض بہت اچھی تھیں مگر پتا نہیں اُنھیں پھر کیا ہوا۔
محمد حسنین نامی ٹوئٹر صارف نے لکھا کہ یہ ٹیم واقعی بہتر ہوتی جا رہی ہے اور وہ اس کے لیے خوش ہیں۔
اُنھوں نے لکھا کہ عائشہ نسیم میں وہ سپرسٹار بننے کی پوری صلاحیت ہے جس کی پاکستانی ٹیم کو ہمیشہ سے ضرورت ہے، بسمہ معروف ہمیشہ سے قابلِ بھروسہ ہیں۔
اُنھوں نے لکھا کہ مجھے ہمیشہ سے لگتا ہے کہ عالیہ ریاض کو درست طریقے سے استعمال نہیں کیا گیا، مجھے لگتا ہے کہ وہ مڈل آرڈر میں بہت بہتر کر سکتی ہیں۔
