آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پی ایس ایل 2023 کا آفیشل ترانہ ریلیز: ’کاش علی ظفر نے پی ایس ایل کا کوئی ترانہ گایا ہی نہ ہوتا‘
کیسا لگے گا اگر آپ کچھ بھی نہ کریں پھر بھی لوگ آپ کی تعریف کرنے لگیں اور ہر زبان پر آپ ہی کا نام ہو۔ ایسا ہی کچھ آج شاید علی ظفر بھی سوچ رہے ہوں گے جن کا نام اتوار صبح سے ہی پاکستان کے ٹاپ ٹرینڈز میں شامل ہے۔ انھوں نے خود تو کچھ نہیں کیا لیکن پاکستان پریمیئر لیگ کا آفیشنل ترانہ ریلیز ہوتے ہں جہاں ان کے مداحوں کو ان کی یاد آئی ویں سوشل میڈیا میمز اور چٹکلوں سے بھر گیا۔
پی ایس ایل 2023 کا آفیشل ترانہ ’سب ستارے ہمارے‘ کے ٹائٹل کے ساتھ سنیچر کو ریلیز کیا گیا ہے۔ سپر لیگ کے آٹھویں سیزن کےلیے اس آفیشل ترانے کو پاکستانی گلوکاروں شےگل، عاصم اظہر اور فارس شفیع نے گایا ہے۔
اب ہونا تو یوں چاہیے تھا کہ اس ترانے میں اپنی آواز کا جادو جگانے والے سنگرز کا نام سوشل میڈیا پر ٹاپ ٹرینڈ کرتا لیکن ہوا یہ کہ علی ظفر کا نام تیزی سے ٹرینڈ کرنے لگا جس میں کافی لوگوں کو جہاں یہ غلط فہمی ہوئی کہ اس بارآفیشل ترانہ علی ظفرنے گایا ہے وہیں بعض شائقین نےعلی ظفر کا نام سوشل میڈیا پر گردش کرتے دیکھ کر جان لیا کہ یقیناً پی ایس ایل اینتھم ریلیز ہوا ہو گا۔
اب وجہ کچھ بھی بنی ہو لیکن پی ایس ایل ترانے کا نام سنتے ہی علی ظفر کے کےگائے ترانوں کا مقابلہ اس سال کے ترانے سے کیا جانے لگا اور ساتھ ہی میلہ لوٹ لیا، سیٹی بجے گی اوردل سے جان لگا دی سمیت علی ظفر کے گائے ترانے ایک بار پھر شائقین نے شیئر کرنا شروع کر دیے۔
احمد حسیب نامی صارف نے ٹوئیٹ میں لکھا کہ وہ نئے ترانے کی اوسط درجہ بندی کر یں گے۔انہوں نے مزید کہا کہ جب بھی پی ایس ایل کے ترانے کو شائقین پسند نہیں کرتے، علی ظفر کے گائے پی ایس ایل کے آفیشل ترانے ریلیز کرنے کا ایک اور موقع سامنےآ جاتا ہے۔ کیا واقعی انھوں نے اس کا معیار اتنا بلند کر دیا ہے۔
کئی صارفین کا کہنا تھا کہ صبح صبح ٹوئٹر پر علی ظفر کا نام سر فہرست دیکھ کر ہی انھیں اس بات کا علم ہوا کہ پی ایس ایل نے اپنا آفیشل ترانہ ریلیز کر دیا ہے۔
End of سب سے زیادہ پڑھی جانے والی
کچھ صارفین ایسے بھی ہیں جنھوں نے حقیقت پسندی سے کام لیتے ہوئے لکھا کہ ہر سال نئے ترانے کے مقابلے میں پچھلے کو بہتر سمجھا جانے لگا ہے۔
زہرہ نامی صارف کہتی ہیں کہ ’کاش علی ظفر نے پی ایس ایل کا کوئی ترانہ گایا ہی نہ ہوتا تاکہ ان کا کوئی موازنہ نہ کرتا۔ ان کے مطابق گذشتہ سال گایا ہوا میرا گروو بہت اچھا تھا تاہم لوگ پھر بھی سنگر نصیبو لال سے ناپسندیدگی کا اظہار کرتے رہے۔ ‘
کئی صارفین نے پی ایس ایل 8 کے نئے ترانے کو بھی سراہا اور کہا کہ دراصل علی ظفر نے ہماری توقعات بڑھا دی ہیں ورنہ ’نیا ترانہ بھی برا نہیں۔ ‘
کرکٹ کے شائقین جہاں پی ایس ایل کے ترانوں پر بحث کرتے دکھائی دیے وہیں کئی صارفین نے علی ظفر کا نام ٹرینڈ کرنے پر میمز بھی بنا ڈالیں۔
مشی نامی صارف نے علی ظفر کی ایک تصویر کو فوٹو شاپ کرتے ہوئے لکھا کہ ’پتہ نہیں ایسی صورتحال میں میں کیسے خود بخود اگے آ جاتا ہوں۔ ‘
بعض صارفین نے اپنے تجزیہ میں اس گانے کو پسند کیا اور ساتھ ہی کہا کہ ’نیا ترانا برا نہیں لیکن ہم اس کا اظہار 2024 کے ترانے کے ریلیز ہونے پر کریں گے اور یہی ہمارا مزاج ہے۔ ‘
یہ بھی پڑھیے:
واضح رہے کہ پی ایس ایل سیزن 8 کا آغاز 13 فروری یعنی پیر سے ہو گا جس کے افتتاحی میچ میں ملتان سلطان اور لاہور قلندرز کی ٹیمیں ملتان کے سٹیڈیم میں مدمقابل ہو گی جبکہ شیڈول کے مطابق میچ کا فائنل 19 مارچ کولاہور میں کھیلا جائے گا۔
پاکستان سپرلیگ کے میچز دومرحلوں میں ہوں گے جو ملتان، کراچی، راولپنڈی اور لاہور میں کھیلے جائیں گے۔
پاکستان سپر لیگ کے آفیشل پیج پر موجود شیڈول کے مطابق پی ایس ایل سیزن 8 میں کُل 37 میچ کھیلے جائیں گے جس میں افتتاحی کھیل سمیت 5 میچ ملتان میں، 9 میچ کراچی میں اور 14 میچ راولپنڈی میں کھیلے جائیں گے۔
راولپنڈی میں کھیلے جانے والے ان میچوں میں خواتین کے تین نمائشی میچ بھی شامل ہیں ۔ جبکہ لاہور میں کھیل کے فائنل سمیت کُل 9 میچ کھیلے جائیں گے۔
