بابر اعظم کی بے بسی، پالیکیلے کی اوس اور بروک کی بے خوفی

ٹی ٹوئنٹی ایک نازک کھیل ہے۔ ایک درست فیصلہ اگر میچ کو پشت کے بل پٹخ سکتا ہے تو ایک ہی غلط فیصلہ اسے منھ کے بل بھی پٹخ سکتا ہے۔ اور جب کسی ٹیم کی تقدیر پہلے ہی کچے دھاگے سے لٹک رہی ہو تو اس کے پاس ذرا سی غلطی کی بھی مہلت نہیں ہوتی۔ مگر جو ماضی سے سیکھ جائے، وہ پاکستان کرکٹ ہی کیا؟

جو سٹریٹیجی پاکستان نے اسی پالیکیلے میں دو روز پہلے سری لنکا کے خلاف انگلش بیٹنگ دیکھ کر بنائی تھی، وہ بے چاری پھر خطا کھا گئی کہ وہ میچ تو استعمال شدہ پچ پر کھیلا گیا تھا اور اوس کا بھی کوئی کردار نہ تھا مگر یہاں پچ بھی نئی تھی اور اوس بھی یقینی تھی۔

ایک ناپ کی سٹریٹیجی ہر پچ کو راس نہیں آ سکتی۔ پالیکیلے کی کنڈیشنز انگلینڈ کے لیے گھر کی مانند تھیں جبکہ پاکستان متواتر کولمبو میں کھیلتا چلا آ رہا تھا۔ پھر سونے پر سہاگہ پاکستان کی سلیکشن نے کر دکھایا کہ ایک درست فیصلے کے ہمراہ ایک غلط فیصلے کی روایت نبھاتے ہوئے بابر اعظم کو برقرار رکھا گیا۔

اب تو یہ امر مضحکہ خیزی کی حدوں سے بھی گزر چکا ہے کہ اس مڈل آرڈر میں بابر اعظم کو ’سپن کے خلاف مہارت‘ کی بنیاد پر رکھا گیا ہے حالانکہ کوچ مائیک ہیسن بذاتِ خود ان کے سٹرائیک ریٹ سے مطمئن نہیں ہیں۔

جہاں ان کے اوپر تلے سبھی بلے باز 130 سے زیادہ سٹرائیک ریٹ پر بیٹنگ کرنے کے قابل ہیں، وہاں یہ حقیقت بھی لگ بھگ چار برس سے چیخ رہی ہے کہ وہ گُگلی کو پڑھ نہیں سکتے اور ریورس سویپ بھی ان کے کوائف میں شامل نہیں۔

مگر مجبوری سٹار کلچر کی ہے کہ نہ صرف پی سی بی ’شائقین‘ کے ’بائیکاٹ‘ سے گھبراتا ہے بلکہ ٹیم مینیجمنٹ بھی سب کچھ کہہ دینے کے باوجود دراصل کچھ نہیں کہہ پاتی۔

پالیکیلے گراؤنڈ کی باؤنڈریز اگرچہ طویل ہیں مگر سری لنکا کے خلاف انگلش بیٹنگ کم مجموعے تک محدود صرف پرانی پچ کے باعث رہی تھی۔ نئی پچ پر اگر ٹاس جیت کر پہلے بیٹنگ کرنا ہی مقصود تھی تو لازم تھا کہ پاکستان مسابقتی مجموعے سے بھی کوئی دس رنز زیادہ جوڑنے کی کوشش کرتا تا کہ اوس پڑتے وقت کام آئے۔

مگر نئی پچ کے باوجود پاور پلے کے بعد بھی پاکستانی اننگز اسی رفتار سے چلی جیسے آزمائش کے دنوں میں وقت کٹتا ہو۔ گو کہ عادل رشید کے لیے یہ ورلڈ کپ بہت عمدہ نہیں رہا مگر پھر بھی وہ بابر اعظم کا رستہ روکنے کو کافی ٹھہرے۔

بابر اعظم نے عادل رشید کے خلاف آٹھ گیندوں کا سامنا کیا اور چھ رنز بنائے۔ لیام ڈاسن کے خلاف انھوں نے چھ گیندوں کا سامنا کیا اور چار رنز بنائے۔

یہ سب عین اس وقت ہو رہا تھا جب گیند نئی تھی اور باؤنڈریز بٹورنے کا موقع تھا۔ نہ صرف اس مرحلے نے پاکستانی اننگز پر دباؤ بڑھایا بلکہ خود بابر اعظم کے حواس پہ بھی کچھ یوں طاری ہوا کہ سپن کے خلاف بے بس ہونے کے بعد وہ پیس کے خلاف مہارت بھی بُھلا بیٹھے۔

پاکستانی بولنگ اگرچہ اس مجموعے کے دفاع میں بھی بہت جان سے لڑی اور شاہین آفریدی کی واپسی بھی فارم سے لبریز رہی مگر ہیری بروک کے بے خطر قدم اوسط ہدف کو نگلتے چلے گئے۔ جیسی یلغار وہ ٹیسٹ کرکٹ میں پاکستان پر ڈھاتے رہے ہیں، پالیکیلے میں اس سے بھی دو قدم آگے دکھائی دیے۔

بروک کی بے خوفی پاکستان کی پارٹ ٹائم سپن پہ بہت بھاری گزری۔ جب مجموعہ مسابقت سے کم ہو اور پالا بھی ایسے نڈر بلے باز سے پڑ جائے تو فیلڈنگ ٹیم کے کندھے جھکنا ناگزیر ہوتا ہے۔ بولنگ میں تبدیلیاں بھی نشانے سے چُوکنے لگتی ہیں۔ ہیری بروک نے تنِ تنہا پاکستان کو میچ سے بے دخل کر دیا۔

ایک بار پھر ورلڈ کپ میں پاکستان کی تقدیر ’اگر مگر‘ کے انباروں میں گِھر چکی ہے۔ پاکستان کرکٹ اور اس سے جُڑے سبھی احباب، بالخصوص شائقین، کے لیے بھی اب سوچ کا مقام ہے کہ آخر کیوں ہر بار ان کی تقدیر ایسے ہی ’اگر مگر‘ کے انباروں میں گِھر جاتی ہے۔

کہنے کو پاکستان کرکٹ پی سی بی کے تلے چلتی ہے مگر اس کی اصل اسٹیبلشمنٹ اس کی مارکیٹ ہے جہاں شائقین نہ صرف اپنے پسندیدہ ستاروں کے اسیر ہیں بلکہ ’قدرت کے نظام‘ کے بھی دلدادہ ہیں۔