آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ویبھو سوریاونشی: 50 اوورز میں 574 سکور اور 14 سالہ بلے باز کا نیا ریکارڈ
انڈیا میں وجے ہزارے ٹرافی میں بدھ کے روز بہار کی ٹیم نے ڈومیسٹک کرکٹ کی تاریخ میں سب سے زیادہ رنز سکور کر کے نیا ریکارڈ بنا دیا۔ صرف یہ ہی نہیں بلکہ اس میچ کے دوران بہار کے کھلاڑی ویبھو سوریاونشی نے 36 گیندوں جبکہ شکیب الغنی نے صرف 32 گیندوں پر سنچریاں بنائیں۔
بدھ کے روز اروناچل پردیش کے خلاف بہار کے بلے بازوں نے انتہائی عمدہ بیٹنگ کرتے ہوئے صرف چھ وکٹوں کے نقصان پر مقررہ 50 اوورز میں 574 رنز بنا کر لسٹ اے کرکٹ میں نیا ریکارڈ قائم کر دیا۔
14 سالہ ویبھو سوریاونشی نے صرف 36 گیندوں پر 16 چوکوں اور15 چھکوں کی مدد سے سنچری بنائی اور وہ یہ ریکارڈ بنانے والے سب سے کم عمر کھلاڑی ہیں۔
ویبھو سوریاونشی نے لسٹ اے کرکٹ میں 59 گیندوں پر 150 رنز مکمل کر کے جنوبی افریقہ کے اے بی ڈی ویلیئرز کا عالمی ریکارڈ بھی توڑ دیا۔ اس میچ میں ویبھو سوریاونشی 84 گیندوں پر 190 رنز بنانے کے بعد آؤٹ ہو گئے۔
واضح رہے کہ دسمبر 2024 میں ڈیبیو کرنے کے بعد 14 سالہ ویبھو سوریاونشی کا لسٹ اے کرکٹ میں یہ ساتواں میچ تھا۔
ویبھو سوریاونشی نے رواں برس اپریل میں اس وقت پہلی بار عالمی شہرت حاصل کی جب انھوں نے انڈین پریمیئر لیگ میں اپنی پہلی ہی گیند پر چھکا لگایا تھا۔
اس کے بعد وہ اس وقت ٹی ٹوئنٹی کرکٹ میں سنچری بنانے والے سب سے کم عمر کھلاڑی بن گئے جب انھوں نے گجرات ٹائٹنز کے خلاف راجستھان رائلز کے لیے 35 گیندوں پر سنچری بنائی۔
یہ سنہ 2013 میں کرس گیل کی 30 گیندوں پر سنچری کے بعد آئی پی ایل کی تاریخ کی دوسری تیز ترین سنچری بھی تھی۔
End of سب سے زیادہ پڑھی جانے والی
جولائی میں ویبھو سوریاونشی نے یوتھ ون ڈے انٹرنیشنل میں تیز ترین ریکارڈ سنچری بنائی اور 78 گیندوں پر 143 رنز بنائے۔ ورسیسٹر میں کھیلے جانے والے اس میچ میں انڈیا نے انگلینڈ کو 55 رنز سے شکست دی تھی۔
چار ماہ بعد ویبھو سوریاونشی نے ایشیا کپ رائزنگ سٹارز میں متحدہ عرب امارات کے خلاف 32 گیندوں پر سنچری بنائی، جو ٹی ٹوئنٹی فارمیٹ میں پانچویں تیز ترین سنچری تھی۔ اس میچ میں ویبھو سوریاونشی 42 گیندوں پر 144 رنز بنا کر آؤٹ ہو گئے تھے۔
