عمران خان اور مریم نواز سے بلاول بھٹو تک سب کے ٹوئٹر بلیو ٹِک ختم: ’ایلون مسک آپ کے بغیر دنیا کتنی حسین تھی‘
،تصویر کا ذریعہtwitter
- مصنف, ماریانا سپرِنگ
- عہدہ, نامہ نگار برائے سوشل میڈیا
بین الاقوامی شہرت یافتہ گلوکارہ بیونسے اور مسیحیوں کے روحانی پیشوا پوپ فرانسس میں آج کے روز مشترک کیا ہے؟
مشترک یہ ہے کہ آج سے ٹوئٹر پر ان دونوں شخصیات کے اکاؤنٹ تصدیق شدہ نہیں ہیں۔
ٹوئٹر نے جمعرات کو ہزاروں اکاؤنٹس سے لیگیسی ویریفائیڈ بلیو ٹِک ہٹانا شروع کر دیے ہیں۔
یہ اقدام کمپنی کے نئے مالک ایلون مسک کے اس اعلان کے بعد سامنے آیا ہے جس میں کہا گیا تھا کہ ایلون ٹوئٹر کو منافع بخش بنانا چاہتے ہیں۔
آج سے جو صارفین اپنے نام کے ساتھ بلیو ٹک برقرار رکھنا چاہتے ہیں انھیں ٹوئٹر بلیو کو سبسکرائب کرنے کے لیے سالانہ 84 ڈالر ادا کرنا ہوں گے۔
پاکستان تحریک انصاف کے چیئرمین عمران خان، مسلم لیگ نواز کی چیف آرگنائزر مریم نواز اور پاکستان پیپلز پارٹی کے چیئرمین بلاول بھٹو سمیت پاکستان کی کئی نامور شخصیات کے اکاؤنٹس سے بھی بلیو ٹک ہٹا دیا گیا ہے۔
جیسے ہی یہ تبدیلی ہوئی، اس کے بارے میں اپنے تاثرات شیئر کرنے کے لیے پہلے سے تصدیق شدہ بہت سے اکاؤنٹس نے ٹوئٹر کا ہی رُخ کیا۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 1
عرفان جمیل ڈوگر نے پاکستانی سیاستدانوں کے اکاؤنٹس کا سکرین شاٹ شئیر کرتے لکھا کہ ’ہمارے غریبوں سمیت امیروں کے بھی بلیو ٹک ختم کر دیے گئے، مہنگائی کے اس دور میں اگر اتنے بڑے بڑے لیڈر پیسے نہیں دے سکتے تو ہم کہاں سے دیں۔‘
End of سب سے زیادہ پڑھی جانے والی
عمیر سالار کہتے ہیں ’شہباز شریف کا بلیو ٹک رہا ہے اور عمران کا چلا گیا ہے۔ عدالت نے ایلون مسک کو ذاتی حیثیت میں طلب کر لیا۔‘
صحافی وسیم عباسی نے لکھا ’ایلون مسک آپ کے بغیر دنیا کتنی حسین تھی۔۔۔ سنہ 2014 سے ویریفائیڈ اکاؤنٹ کا بلیو ٹِک آج مسک کو پیارا ہو گیا۔۔ ہر شے فانی ہے۔‘
ایک اور ٹویٹ میں انھوں نے لکھا ’انسان بلیو ٹک سے نہیں اپنے اخلاق سے پہچانا جاتا ہے۔‘
نایاب علی لکھتی ہیں ’کوئی 11 ڈالر عیدی دے دے میں نے ایلون مسک کو دینے ہیں بلیو ٹک کے۔ ہائے میرا بلیو ٹک۔‘
ایک اور صارف نے لکھا ’فائنلی ہم سب کے بلیو ٹک چلے گئے۔۔۔ آج ٹائم لائن بہت اچھی لگ رہی۔۔ شکریہ ایلون پا جی۔ یاد رکھیں اب آپ کو جو بھی بلیو ٹک نظر آئے گا وہ خریدا ہوا ہے جس کی کوئی ویلیو نہیں۔‘
احمد بلال محبوب نے لکھا ’میں نے آج بلیو ٹک کے ختم ہو جانے پر اتنے میسیج دیکھے ہیں کہ ایک اچھی خاصی ’انجمنِ متاثرینِ تنسیخِ بلیو ٹک‘ بن سکتی ہے!‘
کچھ افراد نے ان کے سپیس ایکس سٹارشپ کی تباہی پر تبصرہ کرتے ہوئے لکھا کہ ’بلیُو ٹِک والوں کی بددعائیں ایلون مسلک کو لے بیٹھیں‘
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 2
یہ بھی پڑھیے
ایک طرف بلیو ٹک جانے والوں کا دکھ ہے تو دوسری طرف وہ لوگ ہیں جن کے پاس یا تو کبھی بلیو ٹک تھا ہی نہیں اور ان کی خوشی دیکھنے لائق ہے۔
ایسے ہی ایک صارف نے لکھا ’بلیو ٹک والوں کو بغیر ’ٹک‘ کے دیکھ کر عجیب سی خوشی محسوس ہو رہی ہے۔‘
،تصویر کا ذریعہGetty Images
بی بی سی اردو کی خبروں اور فیچرز کو اپنے فون پر حاصل کریں اور سب سے پہلے جانیں پاکستان اور دنیا بھر سے ان کہانیوں کے بارے میں جو آپ کے لیے معنی رکھتی ہیں
سبسکرائب کرنے کے لیے کلک کریں
مواد پر جائیں
یاد رہے کہ ٹوئٹر نے سب سے پہلے تصدیقی فیچر 2009 میں متعارف کروایا تھا، جب ایک سابق پیشہ ور بیس بال کھلاڑی نے ان کے نام سے چلنے والے جعلی اکاؤنٹس کے باعث ٹوئٹر انتظامیہ پر مقدمہ دائر کیا تھا۔
اور پھر یہ بلیو ٹک سٹیٹس سمبل اور اتھارٹی کی علامت بن گیا۔ لیکن ٹوئٹر کو اربوں ڈالر کے عوض خریدنے کے بعد اب ایلون مسک چاہتے ہیں کہ صارفین اس تصدیق کے لیے ادائیگی کریں۔
انھوں نے لکھا کہ ’تصدیق کو مونیٹائز کرنے کا فیصلہ پلیٹ فارم پر بڑے پیمانے پر ثقافتی اور طاقت کی تبدیلی کا آغاز کر سکتا ہے۔‘
تاہم بلیو ٹک ہٹنے کے بعد چند مسائل بھی سامنے آئے ہیں۔
توثیقی بلیو ٹک کھونے کے چند گھنٹوں کے اندر ہیلری کلنٹن کا روپ دھارے ایک اکاؤنٹ نے اعلان کیا کہ وہ دوبارہ صدارت کے لیے انتخاب لڑیں گی۔
اب ٹوئٹر کی نئی تصدیقی سکیم کے تحت، گولڈ، سرمئی اور نیلے رنگ کے بیجز کا مقصد اکاؤنٹ کی تصدیق کے طریقے سے متعلق مزید معلومات فراہم کرنا ہے۔
ٹوئٹر کی ویریفیکیشن ٹیم کے سابقہ رکن نے شناخت ظاہر کیے بغیر بی بی سی کو بتایا کہ ’ہماری ٹیم کی پہلی ترجیح صارفین کو نقصانات سے بچانا تھا مگر یہ اقدام اس سے الٹ ہے۔‘
’اب ویریفائیڈ صارف اپنا اختیار اور اثر و رسوخ استعمال کر کے غلط معلومات پھیلا سکتے ہیں جس سے دنیا بھر کے صارف خطرے کی زد میں آئیں گے۔ یہ خاموش خطرہ ہے جسے کوئی نہیں دیکھ رہا۔‘
نومبر میں ٹوئٹر بلیو نامی سکیم کو افراتفری میں متعارف کروایا گیا تھا اور بعض لوگوں نے پیسے دے کر بلیو ٹک حاصل کیا اور بڑے برانڈ اور معروف شخصیات کی نقالی کی تاکہ وہ اصل نظر آئیں۔ بعض لوگوں نے ایلون مسک بن کر بھی دنیا کو دھوکہ دیا۔
پھر ٹوئٹر نے ایک ہفتے سے کم وقت میں یہ فیچر معطل کر دیا اور اگلے ماہ اسے دوبارہ متعارف کرایا گیا۔
ٹوئٹر بلیو کو اب متنازع گروہ بھی استعمال کرتے ہیں، جیسے افغانستان میں طالبان حکام اور ان کے حمایتی۔
ویریفائیڈ صارفین کے ٹویٹ کو دوسرے صارفین کے مقابلے میں فوقیت ملتی ہے، یعنی ان کا پیغام زیادہ لوگوں تک پہنچتا ہے۔ ان مصدقہ صارفین کو اضافی فیچر تک رسائی بھی ملتی ہے، جیسے ایڈٹ بٹن۔
سوشل میڈیا مانیٹر اور ماہرین کو خدشہ ہے کہ ادائیگی کے ذریعے تصدیق میں اضافہ سائٹ پر غلط معلومات کو بڑھانے کا باعث بنے گا۔ اگر ایسا ہوتا ہے تو یہ اشتہاری کمپنیاں ٹوئٹر پر اشتہار دینے سے کترائیں گی اور ٹوئٹر کو تصدیقی رکنیت کے ماڈل سے ملنے والی اضافی آمدنی کو نقصان پہنچ سکتا ہے۔
بلیو ٹِک: اب کسی ٹوئٹر اکاؤنٹ کا کیا اعتبار
ایک عرصے سے کسی ٹوئٹر اکاؤنٹ پر نیلا نشان اس بات کا ثبوت سمجھا جاتا تھا کہ یہ اکاؤنٹ جعلی نہیں بلکہ اسی شخیت کا ہے جو دعویٰ کر رہی ہے کہ یہ واقعی اس کا مصدقہ اکاؤنٹ ہے۔
لیکن مشہور کاروباری شخصیت اور ٹوئٹر کے نئے مالک ایلون مسک نے اس پلیٹ فارم کی پالیسی تبدیل کرتے ہوئے بلیو ٹِک کی سہولت صرف ان صارفین تک محدود کر دی ہے جو اس کے لیے پیسے دینے کو تیار ہیں۔ اب یہ معلوم کرنے کے لیے کہ کون سا اکاؤنٹ جعلی ہے اور کون سا اصلی، ہمیں ’بلیو ٹِک‘ کی جگہ کسی نئی زبان میں بات کرنا پڑے گی۔
ذرائع ابلاغ اور ان کے نمائندوں کے پرانے مصدقہ اکاؤنٹس پر نیلے رنگ کی بجائے ایک سنہری نشان ہوتا تھا، لیکن فی الحال وہ بھی غائب ہو چکا ہے۔
اسی طرح اب پوپ فرانِسس جیسی نہایت مشہور اور جانی پہچانی شخصیات کے اکاؤنٹس پر سرمئی رنگ کا نشان لگا دیا گیا، جبکہ باقی تمام اکاؤنٹس پر کوئی نشان نہیں ہوگا۔ یہ سارا معاملہ سمجھ سے باہر ہوگیا اور ہم جیسے صحافی بھی مخمصے کا شکار ہو گئے ہیں۔
اس نئی حکمت عملی سے دو خطرات ہو سکتے ہیں، پہلا یہ کہ اب کسی کے اصلی اور جعلی کاؤنٹ میں تمیز کرنا مشکل ہو گیا ہے۔ مثلاً میرے اکاؤنٹ پر لگا ہوا بلیو ٹِک اب غائب ہو چکا ہے۔ اس کا مطلب یہ ہوا کہ کل کوئی بھی میرے نام سے اکاؤنٹ بنا سکتا ہے اور پہلی نظر میں کسی صارف کو معلوم نہیں ہوگا کہ یہ اکاؤنٹ واقعی ماریانا سپرِنگ کا ہے یا کسی نے میرے نام سے جعلی اکاؤنٹ بنا لیا ہے۔
یعنی اب یہ جاننے کے لیے کہ کون سا اکاؤنٹ کس کا ہے، آپ کو کوئی اور طریقہ اپنانا پڑے گا۔ مثلاً ہمیں اس شخص کی پرانی ٹوئیٹس کو دیکھنا پڑے گا، یہ دیکھنا پڑے گا کہ اس شخص کو ماضی میں کون کون فالو کر رہا تھا اور پھر یہ دیکھنا پڑے گا کہ یہ شحص واقعی اس قسم کی ٹوئٹ کر سکتا ہے یا نہیں۔
اس کے علاوہ، ایک اور مسئلہ یہ ہے کہ بلیو ٹِک والے کچھ ایسے اکاؤنٹ بھی دیکھے گے ہیں جو دوسرے مشہور لوگوں کی ٹرولنگ کرتے رہے ہیں اور کچھ ایسے بھی تھے جو غلط خبریں یا افواہیں پھیلاتے رہے ہیں۔
اور اگر ہم ابھی تک بلیو ٹِک کی زبان میں ہی پھنسے ہوئے ہیں اور صرف اسی نشان کی بنیاد پر اصلی اور جعلی اکاؤنٹ میں تمیز کرتے ہیں تو ہو سکتا آپ یہی سمجھیں کہ یہ اکاؤنٹ قابلِ بھروسہ ہیں اور اس اکاؤنٹ سے شیئر کی جانے والی پوسٹس بھی درست ہیں، لیکن عین ممکن ہے وہ اکاؤنٹ مذکورہ شخص کا اکاؤنٹ نہ ہو۔
’ٹوئٹر کے لیے ممکنہ طور پر خطرناک موڑ‘
،تصویر کا ذریعہGetty Images
جب مسک نے ٹوئٹر کا انتظام سنبھالا تو وہ ’آزاد تقریر‘ کو واپس لانے کے بارے میں بلند عزائم سے بھرے ہوئے تھے۔ وہ چاہتے تھے کہ پلیٹ فارم ’زیادہ سے زیادہ قابل اعتماد‘ ہو اور یہ ’پیسے کمانے کا ذریعہ نہیں ہونا چاہیے۔‘
مگر اب ٹوئٹر کی پالیسی ان خیالات سے مختلف نظر آتی ہے۔
یہ سمجھتے ہوئے کہ اشتہارات کی آمدن میں اضافہ کرنا مشکل ہے، مسک نے سبسکرپشن پر مبنی ماڈل کا رُخ کیا۔
ابتدائی طور پر فروخت کا مقصد صارفین کو اگر وہ ماہانہ فیس ادا کرتے ہیں تو ’بلیو ٹک‘ کی تصدیق دینا تھا۔
لیکن ادائیگی کرنے والے صارفین کی تعداد فوراً اتنی زیادہ نہیں ہوئی تھی۔ اشتہارات کی آمدن میں کمی اور سبسکرپشن ماڈل میں کوتاہیوں کے بعد مسک نے نیا راستہ چُنا۔
ٹویٹر پر دو الگورتھم ہیں - تجویز کردہ ٹویٹس یعنی ’فار یو‘ یا وہ صارفین جنھیں آپ فالو کرتے ہیں۔
ایلون مسک کی نئی پالیسی سے ادائیگی نہ کرنے والے صارفین متاثر ہوں گے۔
اس کا مطلب ہے کہ غیر مصدقہ ٹوئٹر صارفین کے پیغامات پر ری ٹویٹ اور لائیک کم ہونے کا امکان ہے۔
اس کے علاوہ ایلون مسک غلط معلومات کی نشاندہی کے نظام کو بھی روک رہے ہیں جو کہ ٹوئٹر کے لیے خطرناک لمحہ ہوسکتا ہے۔
ٹوئٹر کے سابقہ ملازمین سمجھتے ہیں کہ اس سے ٹرولز اور غلط معلومات پھیلانے والے لوگوں کے لیے آسانی پیدا ہوگی۔
ٹوئٹر کی کامیابی کا راز اس پر موجودہ مواد کا معیار ہوا کرتا تھا مگر اب بظاہر یہ نظام ختم ہو گیا ہے۔
