ኣብ ፈረንሳይ፡ ፖሊስ ምስ ሰልፈኛታት ኣንጻር-ዓሌታውነት ተጓኒጹ

ኣብ ፈረንሳይ፡ ከተማ ፓሪስ፡ ኣንጻር ዓሌታውነትን ጭካነ ፖሊስን ተቓውሞ ዘስምዑ ዝነበሩ ሰልፈኛታት ምስ ፖሊስ ተጓኒጾም።

እቶም ሰልፈኛታት፡ ክልኩል ናይ ሰልፊ ጉዕዞ ከካይዱ ኣብ ዝፍትንሉ እዮም ናብ ፖሊስ ኣእማን ክድርብዩ ጀሚሮም፡ ፖሊስ ድማ መንብዒ ትኪ ተኩሱሎም።

እቲ ሰልፊ፡ ኣካል እቲ ኣብ ኣመሪካ ዝተጀመረን ኣብ ካልኦት ሃገራት'ውን ዝረኣይ ዘሎን፡ ኣብ ልዕሊ ጸለምቲ ዝወርድ ግፍዕታት ዝቃወም ምንቅስቓስ እዩ።

ኣብ ፈረንሳይ "ፍትሒ ንኣዳማ" ብዝብል ጭርሖ እዩ እቲ ሰልፍታት ተኻይዱ። ኣዳማ ትራውሬ፡ ኣብ 2016 ኣብ ቀይዲ ፖሊስ እናሃለወ ዝሞተ ጸሊም መንእሰይ እዩ።

ኣብ ፓሪስ ዘጋጠመ እንታይ እዩ?

ቀዳም ድሕሪ ቀትሩ፡ ኣስታት 15,000 ዝኾኑ ኣንጻር ዓሌታውነት ዝቃወሙ ሰልፈኛታት ኣብ ማእከል ፓሪስ ተኣኪቦም።

"ፍትሒ እንተዘየሎ፡ ሰላም የለን" ዝብሉን ካልኦትን ጭርሖታት ይጭርሑ ነይሮም። ገለ ካብቶም ሰባት፡ መግለጺ ሪፓብሊክ ፈረንሳይ ተገይራ ናብ እትውሰድ ሓወልቲ ማርያነ ተሰቒሎም።

ሓፍቲ ናይቲ ብ 2016 ኣብ ቀይዲ ፖሊስ እናሃለወ ዝሞተ መንእሰይ ኣዳማ ትራውሬ፡ ሓንቲ ካብቶም ሰልፈኛታት ነይራ።

"እቲ ኣብ ኣመሪካ ዘጋጥም ዘሎ፡ ኣብ ፈረንሳይ'ውን የጋጥም ኣሎ እዩ። ኣሕዋትና ይሞቱ እዮም ዘለዉ" ኢላ።

እቶም ሰልፈኛታት ክእከቡ ተፈቒድሎም እዩ፡ ጉዕዞ ክገብሩ ግን ፖሊስ ከልኪልዎም።

ድሕሪ'ዚ እዩ ጎንጺ ኣጋጢሙ መንብዒ ትኪ'ውን ዝተተኮሰ። ኣብ ካልኦት ከተማታት ፈረንሳይ'ውን ንእስ ዝበሉ ሰልፍታት ተኻይዶም እዮም።

ፖሊስ ፈረንሳይ ንምንታይ ይንቀፍ ኣለዉ?

ፖሊስ ፈረንሳይ ኣብቲ ዝሓለፈ ዓመት 1,500 ጥርዓናት ዝቐረቦም ኮይኑ፡ ፍርቂ ካብዚ መጥቃዕቲ ፈጺሞም ዝብል እዩ።

ኣብ ቀረባ እዋን፡ ሞተር ብሽክለታ ብምስራቕ ዝተጠርጠረ ወዲ 14 ዓመት ቆልዓ፡ ፖሊስ ከምዘቑሰልዎ ይግለጽ።

ዝሓለፈ ሰኑይ፡ ሚኒስተር ውሽጣዊ ጉዳያት ፈረንሳይ፡ ፖሊስ ንጥርጡራት ብክሳዶም ሓኒቖም ክሕዝዎም ክልኩል ምዃኑ ኣፍሊጡ እዩ።

እቲ ሚኒስተር፡ ዓሌታውነት ንዘንጸባርቑ ሰራሕተኛታት ጸጥታ "ኣይንዕገሶምን" ድማ ኢሉ።

እዚ ዘረባታቱ ግን ካብ ፖሊስ ተቓውሞታት ኣስዒብሉ እዩ። እቶም ፖሊስ፡ ኣብ ስርሖም ዓሌታውነት ከምዘየንጸባርቑ እዮም ዝገልጹ።

በዚ ዝተቖጥዑ ፖሊስ፡ ብዓርቢ መቑሖም ናብ ባይታ ብምድርባይ ተቓውሞታቶም ገሊጾም።