ዶብ ኤርትራን ሱዳንን ክኽፈት ኣብ ስምምዕ ተበጺሑ

ፕረዚደንት ኤርትራ ኢሳይያስ ኣፈወርቂ ምስ ምክትል ኣቦ ወንበር መሳጋገሪ ወትሃደራዊ ቤት-ምኽሪ ሱዳን መሓመድ ሓምዳን ዳግሎ ሎሚ ኣብ ሃገራዊ ቤተ-መንግስቲ ኣስመራ ተራኺቦም ኣብ ጉዳይ ክልትኣዊ ርክብ ተዘራሪቦም።

እቲ ፕረዚደንት ምስ ምክትል ኣቦ ወንበር መሰጋጋሪ መንግስቲ ሱዳን መሓመድ ሓምዳን ዳግሎ ኣብ ዝገበሮ ዘተ፡ ክልቲአን ሃገራት ኣብ ሞንጎአን ዘሎ ዶብ ንክኽፈት ተሰማሚዖም።

ነዚ ክልትኣዊ ስምምዕ ንምትግባር ዘኽእል ኮሚቴ ከም ዝቐውም ውን ተገሊጹ።

መንግስቲ ኤርትራ ነቲ መሰጋገሪ ወተሃደራዊ መንግስቲ፡ ምስግጋር መንግስቲ ብሰለማዊ መገዲ ንኽካየድ ከም ዝሕግዝ ድማ ፕረዚደንት ኢሳይያስ ኣፍሊጡ ክብል ሚኒሰትር ዜና የማነ ገብረመስቀል ብትዊተር ሓቢሩ።

መንግስቲ ሱዳን ኣብ 2018 ምስ ኤርትራ ዘዳዉብ ዶብ፡ ዘይሕጋዊ ምስግጋር ደቂ ሰባት ንምግታእ ብዝብል ምኽንያት ዓጽይዎ ምጽንሑ ይፍለጥ።

ኣብቲ ከባቢ ብኣሽሓት ዝቑጸሩ ኣባላት ምክልኻል ሰራዊት ሱዳን ዓስኪሮም ዝጸንሑ ኮይኖም፡ እቲ ፍጻሜ ምስ ኤርትራ ዘዛምድ ዋላ ሓንቲ ነገር ከም ዘይብሉ ሰብ መዚ እታ ሃገር ገሊጾም ነይሮም።

መራሕቲ ተቓውሞ ውድባት ፖለቲካ (ሰልፍታት) ግን ዘይሕጋዊ ምስግጋር ደቂ ሰባትን ዕጥቅን ደው ንምባል፡ ክሳዕ ክንድኡ ዝኣክል ወፍርን ሰራዊትን፡ ኣዋጅ ህጹጽ ግዜን ኣይመድለየን ብምባል ክቃወሙ ጸኒሖም እዮም።