కరోనా వైరస్ విజృంభిస్తున్నా... రష్యా అధ్యక్షుడు పుతిన్‌ ఎందుకంత నిశ్చింతగా ఉన్నారు?

    • రచయిత, సారా రెయిన్స్‌ఫోర్డ్
    • హోదా, బీబీసీ ప్రతినిధి

అధికారాన్ని సుస్థిరం చేసుకునేందుకు, తన బలాన్ని ప్రదర్శించేందుకు రష్యా అధ్యక్షుడు వ్లాదిమిర్ పుతిన్ రచించుకున్న పెద్ద ప్రణాళికలన్నీ అమలు కావాల్సిన సమయం ఇది.

అనుకోకుండా కరోనావైరస్ ప్రబలడం... చమురు ధరలు, రష్యా కరెన్సీ రూబుల్ విలువ పతనమవ్వడం వంటి కారణాలతో ఎజెండా పూర్తిగా మారిపోయింది.

పుతిన్‌‌ తన 80ల వయసు వరకూ అధికారంలో కొనసాగేందుకు వీలుగా చేస్తున్న రాజ్యాంగ మార్పులపై ఏప్రిల్‌లో ఓటింగ్ జరపాలని ఇంతకుముందు నిర్ణయించారు.

'విక్టరీ డే' 75వ వార్షికోత్సవాన్ని పురస్కరించుకుని మేలో భారీ సైనిక పరేడ్ జరపాలనుకున్నారు.

కానీ, ఇప్పుడు వాతావరణం మారిపోయింది. అనిశ్చితి, ఆందోళనలు నెలకొన్నాయి.

ఇప్పటివరకూ రాజ్యాంగ మార్పులపై ఓటింగ్‌ను, పరేడ్‌ను అధికారికంగానైతే రద్దు చేయలేదు. విపత్కర పరిస్థితులున్నా, పుతిన్ ప్రశాంతంగా బయటకు కనిపించే ప్రయత్నం చేస్తున్నారు.

అయితే, ఏప్రిల్ 22వ తేదీన జరగాల్సిన ఓటింగ్ కొంత ఆలస్యమవుతుందని మాత్రం పుతిన్ తాజాగా ప్రకటించారు.

'సమయానుగుణంగా' తీసుకున్న చర్యల వల్ల తమ దేశంలో కోవిడ్-19 వ్యాప్తి 'నియంత్రణలోనే' ఉందని ఆయన తెలిపారు.

Skip ఎక్కువమంది చదివినవి and continue reading
ఎక్కువమంది చదివినవి

End of ఎక్కువమంది చదివినవి

శుక్రవారం నాటికి రష్యాలో 1036 కరోనావైరస్ కేసులు నమోదయ్యాయి.

కరోనావైరస్ విషయంలో యూరప్‌ 'నిర్వహణ వైఫల్యం'ఉందని విమర్శిస్తూ, యురోపియన్ యూనియన్‌లో ఐక్యత లోపించిందని పేర్కొంటూ రష్యా ప్రభుత్వ మీడియా కథనాలు ప్రసారం చేసింది.

కరోనావైరస్ సంక్షోభం, క్వారంటీన్ చర్యల్లో యురోపియన్ నేతలంతా తలమునకలైన సమయంలో, పుతిన్ మాత్రం ఉక్రెయిన్ నుంచి కొంత భూభాగం రష్యాలో కలిసి ఆరేళ్లు పూర్తవుతున్న సందర్భంగా సంబరాలు జరుపుకునేందుకు క్రిమియాకు పయనమయ్యారు.

అంతా సజావుగా, ఎప్పటిలానే సాగుతోందని చెప్పేందుకు కావాలనే చేస్తున్న ప్రయత్నం ఇది. పుతిన్ బయట తిరుగుతున్నారు. జనాలను కలుస్తున్నారు. కరచాలనం చేస్తున్నారు. 'సోషల్ డిస్టెన్సింగ్' అసలు పాటించడం లేదు. కానీ ఇదంతా ఒక షో.

అంతా సజావుగానే సాగుతున్నట్లు చర్యలు

పుతిన్‌కు దగ్గరగా వచ్చే ప్రతి ఒక్కరికీ ముందే అధికారులు కరోనావైరస్ నిర్ధారణ పరీక్షలు చేస్తున్నారు.

ఈ వారం క్రిమియాలో పుతిన్ చేతుల మీదుగా పతకాలు పొందే వాళ్లందరికీ పరీక్షలు జరుగుతున్నాయి. క్రెమ్లిన్ సిబ్బందికి, పాత్రికేయులకు కూడా పరీక్షలు చేస్తున్నారు. కొన్ని వారాల క్రితం శరీర ఉష్ణోగ్రత మాత్రమే చూసేవారు.

''అధ్యక్షుడు ఏ అనుమానమూ లేకుండా తన పనిని తాను కొనసాగించేందుకు ఈ చర్యలు అవసరమని మేం భావిస్తున్నాం'' అని అధ్యక్షుడి అధికార ప్రతినిధి దిమిత్రి పెస్కోవ్ బీబీసీతో చెప్పారు.

పుతిన్‌ మాత్రం పరీక్షలు చేయించుకోలేదు.

''ఆయనకు లక్షణాలేవీ లేవు. చక్కగా సమయం ప్రకారం పనులు చేసుకుంటున్నారు'' అని పెస్కోవ్ అన్నారు.

కలవర పెడుతున్న అధికారిక గణాంకాలు

రష్యా అధికారిక గణాంకాల ప్రకారం చూసినా, దేశంలో కరోనావైరస్ ఇన్ఫెక్షన్ల రేటు పెరుగుతోంది. ఆ లెక్కలను తప్పుగా చూపిస్తున్నారని చాలా మంది అనుమానిస్తున్నారు.

కోవిడ్-19ను పుతిన్ 'విదేశీ ముప్పు'గా చూపిస్తున్నా, దేశంలో నివారణ చర్యలైతే పెరుగుతున్నాయి.

సరిహద్దులు, పాఠశాలలను మూసివేయడం నుంచి గుంపులు కట్టడాన్ని నిషేధించడం వరకూ చాలా చర్యలు తీసుకుంటున్నారు.

కాగా, వచ్చే వారం దేశవ్యాప్తంగా సెలవులు ప్రకటిస్తున్నట్లు పుతిన్ తెలిపారు. మార్చి 28వ తేదీ నుంచి ఏప్రిల్ 5వ తేదీ వరకు దేశంలో రెస్టారెంట్లు, కెఫేలు, పార్కులను మూసేస్తున్నట్లు ప్రకటించారు. నిత్యావసర వస్తువులు, ఫార్మసీలు మినహా మిగతా అన్ని షాపుల్ని కూడా మూసేస్తామని తెలిపారు.

ప్రజలు చర్చిలకు కూడా వెళ్లొద్దని ప్రభుత్వం సూచించింది.

కానీ, జనాలు పూర్తిగా ఇళ్లకే పరిమితం కావాలన్న ఆదేశాలు మాత్రం ఇవ్వలేదు. మాస్కో లాక్‌డౌన్ గురించి తాము కనీసం చర్చించడం కూడా లేదని ప్రభుత్వం గత శుక్రవారం వ్యాఖ్యానించింది.

రష్యా పాటిస్తున్న ఈ నిగ్రహానికి.. రాజ్యాంగ మార్పులపై ఓటింగ్ జరపాలన్న ఆలోచన, సాధ్యమైనంత త్వరగా తిరిగి ఎన్నిక కావాలని పుతిన్ పడుతున్న ఆరాటం కారణాలని చాలా మంది అనుమానిస్తున్నారు.

ఈ ప్రక్రియలో ఆశ్చర్యపరిచే స్థాయికి వేగం పెరిగింది. ముందు నుంచీ దీన్ని ఓ 'స్పెషల్ ఆపరేషన్' అని పిలుస్తున్నారు

రష్యన్లనూ భయపెడుతున్న కరోనా

కరోనావైరస్ మహమ్మారిలా వ్యాపిస్తున్న సమయంలో పెన్షనర్లను మూకుమ్మడిగా ఓటింగ్‌కు తీసుకురావడం 'నేరమే' అవుతుందని ప్రతిపక్ష నాయకుడు అలెక్సీ నావల్నీ హెచ్చరించారు. ఓటింగ్‌ను వాయిదావేయడమో, లేక ఆన్‌లైన్ పద్ధతిలో నిర్వహించడమో జరగొచ్చని అధికారులు చెబుతూ వచ్చారు.

కానీ, రష్యా ఎలక్టోరల్ కమిషన్ పరిమిత సంఖ్యలోనే జనాలు వచ్చేలా బ్యాలెట్ పద్ధతిలో వారం పాటు ఓటింగ్ నిర్వహించేందుకు ప్రణాళికలు వేస్తున్నట్లు శుక్రవారం తెలిపింది.

''వాయిదా వేయకుండా, ఈ ఓటింగ్‌ను జరిపి తీరాలన్న బలమైన కాంక్ష కనిపిస్తోంది. రష్యాకు ఏ నష్టమూ జరగకుండానే పరిస్థితులు కుదుటపడుతాయని అధికారులు గట్టి నమ్మకంతో ఉన్నారు'' అని రాజకీయ విశ్లేషకుడు కాన్‌స్టాంటీన్ కలాషెవ్ నెజవిసిమయా గెజెటా వార్తా పత్రికతో అన్నారు.

భవిష్యత్తు భయంకరంగానే

ప్రభుత్వ వైఖరి భరోసా ఇచ్చేలా ఉందని కొందరు అంటున్నారు. 'ఎంత తక్కువ తెలుసుకుంటే, అంత బాగా నిద్రపడుతుంది' అన్న సామెత ఇక్కడ చాలా మందికి తెలుసు.

''మాకు ఇంకా తెలుసుకోవాలని లేదు. దాని వల్ల భయం కలుగుతుంది. చేతులు కడుక్కోవాలని, బయటకు ఎక్కువగా వెళ్లొద్దని మాకు తెలుసు. జనాలు వస్తువులన్నీ ఇప్పుడే కొనేసి పెట్టుకుంటున్నారు. పరిస్థితి భయానకంగా ఉంది'' అని మాస్కో పట్ణణవాసి క్సెనియా అన్నారు. ఆమె ఐస్‌క్రీమ్‌లు అమ్ముతుంటారు.

కానీ, ఆమె దుకాణానికి కొన్ని కి.మీ.ల దూరంలోనే సంక్షోభానికి సాక్ష్యంగా ఓ పెద్ద ఆసుపత్రి వేగంగా రూపుదిద్దుకుంటోంది. కరోనావైరస్ రోగుల కోసం 500 మందికి సరిపోయేలా దీన్ని రష్యా నిర్మిస్తోంది.

వైరస్ నియంత్రణపై అత్యవసర డ్రిల్స్ నిర్వహించామని, రష్యాలోని ప్రాంతాలన్నింటినీ హైఅలెర్ట్‌లో పెట్టామని రష్యా రక్షణ శాఖ తెలిపింది.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)