எப்போதும் இல்லாத ஆபத்தை நோக்கி நகர்கிறது வடகொரியா: சிஐஏ இயக்குநர்

அமெரிக்கா - வடகொரியா இடையே பதற்றங்கள் அதிகரித்து வரும் நிலையில், வடகொரியாவுடன் உடனடியாக அணு ஆயுத போர் ஏற்படுவதற்கான அச்சுறுத்தல்கள் எதுவும் இல்லை என அமெரிக்க அரசின் உளவு நிறுவனத்தின் (சிஐஏ) இயக்குநர் கூறியுள்ளார்.

வடகொரியா தனது அணு ஆயுத திட்டத்தால் `எப்போதும் இல்லாத ஆபத்தை` நோக்கி நகர்வதாக சிஐஏ இயக்குநர் மைக் பாம்பேயோ கூறியுள்ளார்,

வட கொரியா மற்றொரு ஏவுகணை சோதனையை நடத்தினாலும் ஆச்சரிப்படுவதற்கு இல்லை என ஃபாக்ஸ் நியூஸுக்கு அளித்த நேர்காணலில் அவர் கூறியுள்ளார்.

அமெரிக்காவின் `பொறுமை` இனி நீடிக்காது என்றும் வட கொரியாவை அவர் எச்சரித்தார்.

வட கொரிய தலைவர் கிம் ஜோங்-உன், நாட்டின் ஆயுத திட்டத்தை அபிவிருத்தி செய்ய தொடர்ந்து முயற்சிப்பார் என்பதில் தான் `மிகவும் நம்பிக்கையுடன்` இருப்பதாக மைக் கூறுகிறார்.

அமெரிக்காவைத் தாக்கும் ஒரு அணு ஆயுதத்தை, அமெரிக்காவுக்கு எவ்வளவு நெருக்கமாக வட கொரியாவால் வைக்க முடியும் எனக் கேட்கப்பட்டதற்கு,`அவர்கள் நெருக்கமாக உள்ளனர்` என தெரிவித்துள்ளார்.

ஆனால், உடனடியாக அணு ஆயுத போர் ஏற்படுவதற்கான ஆபத்துகள் இருப்பதாகக் கூறப்படுவதை அவர் மறுத்துள்ளார்.

`` எல்லோரும் ஒரு அணு ஆயுதப் போர் பற்றி பேசுவதைப் பற்றி நான் அறிவேன். ஆனால், அணு ஆயுதப் போர் இப்போதே நடக்கும் வாய்ப்புகள் இருப்பதாக உளவுத்துறை அறிக்கை கூறவில்லை`` என்கிறார் மைக்.

பிற செய்திகள்:

சமூக ஊடகங்களில் பிபிசி தமிழ் :