பிரமிடுகளை கட்ட பிரமாண்ட கற்களை எகிப்தியர் எடுத்து வந்தது எப்படி? விஞ்ஞானிகள் புதிய கண்டுபிடிப்பு

எகிப்தில் உலகப் புகழ்பெற்ற `கிசா’ உட்பட 31 பிரமிடுகள் உள்ளன. இவை 4,000 ஆண்டுகளுக்கு முன்பு எவ்வாறு கட்டப்பட்டன என்ற மர்மத்துக்கு தற்போது விடை கிடைத்துள்ளது என விஞ்ஞானிகள் தெரிவித்துள்ளனர்.

வட கரோலினா வில்மிங்டன் பல்கலைக் கழகத்தைச் சேர்ந்த ஒரு ஆய்வுக் குழு, நைல் நதியின் அழிந்து போன ஒரு கிளை நதியை ஒட்டி பிரமிடுகள் கட்டப்பட்டிருக்கலாம் என்று கண்டுபிடித்துள்ளனர். தொன்மையான அந்த நைல் நதியின் கிளை வறண்டு, பாலைவனம் மற்றும் விவசாய நிலங்களுக்கு அடியில் புதைந்து இருக்கலாம் என்று விஞ்ஞானிகள் கருதுகின்றனர்.

எகிப்திய பிரமிடுகள் குறித்து நீண்ட காலமாக ஆராய்ச்சிகள் நடைபெற்று வருகின்றன. நதியின் மீது பிரமிடுகளை உருவாக்கிய போது, பண்டைய எகிப்தியர்கள் கட்டுமானப் பொருட்களை கொண்டு செல்வதற்கு அருகில் இருந்த நீர்வழிப்பாதையை பயன்படுத்தியிருக்க வேண்டும் என்று தொல்பொருள் ஆராய்ச்சியாளர்கள் நம்புகின்றனர்.

"பிரமிடுகளுக்கு அருகில் இருந்ததாக கருதப்படும் மிகப்பெரிய நீர்வழியின் இருப்பிடம், வடிவம், நீளம் போன்ற எந்த தகவலும் தற்போது வரை துல்லியமாக கண்டறிய முடியவில்லை" என்று ஆய்வு மேற்கொள்ளும் ஆராய்ச்சியாளர்களில் ஒருவரான பேராசிரியர் எமன் கோனிம் கூறுகிறார்.

அமெரிக்கா, எகிப்து மற்றும் ஆஸ்திரேலியாவைச் சேர்ந்த ஆராய்ச்சியாளர்கள் அனைவரும் நைல் நதியின் கிளையை வரைபடமாக்கும் பணியில் ஈடுபட்டுள்ளனர். பிரமிடுகள் தொடர்பான இந்த கண்டம் தாண்டிய முயற்சியில் ஆராய்ச்சியாளர்கள் குழு, ரேடார் செயற்கைக்கோள் படங்கள், வரலாற்று வரைபடங்கள், புவி இயற்பியல் ஆய்வுகள் மற்றும் செடிமெண்ட் கோரிங், (தொல்பொருள் ஆராய்ச்சியாளர்கள், மாதிரிகளில் இருந்து பண்டைய ஆதாரங்களை மீட்டெடுக்கும் ஒரு நுட்பம்) ஆகியவற்றைப் பயன்படுத்தி நைல் கிளையின் தடயத்தை வரைபடமாக்கினர்.

ஆயிரக்கணக்கான ஆண்டுகளுக்கு முன்பு கடுமையான வறட்சி மற்றும் மணற்புயல் ஏற்பட்டு இந்த கிளை நதி பூமியில் புதையுண்டு போயிருக்கலாம் என்று ஆய்வாளர்கள் நம்புகின்றனர்.

"ரேடார் தொழில்நுட்பத்தைப் பயன்படுத்தி, மணல் பரப்பில் ஊடுருவி, புதையுண்டிருக்கும் சுவடுகளின் படங்களை இந்தக் குழு உருவாக்கியது” என்று `நேச்சர்’ ஆய்வு இதழில் வெளியிடப்பட்ட ஆய்வில் தெரிவிக்கப்பட்டுள்ளது. இந்த ஆய்வில் புதைந்து போன ஆறுகள் மற்றும் பழங்கால கட்டுமானங்கள், பண்டைய எகிப்திய பிரமிடுகள் ஆகியவற்றின் தடயங்கள் கிடைத்ததாக பேராசிரியர் கோனிம் கூறினார்.

பிபிசியிடம் பேசிய ஆய்வின் இணை ஆசிரியர்களில் ஒருவரான டாக்டர் சுசான் ஆன்ஸ்டைன், "பிரமிடுகள் கட்டுமானத்தில் நீர்வழிப் பாதையை பயன்படுத்தினர் என்ற தகவலை தாண்டி பல்வேறு விஷயங்கள் ஆய்வில் கண்டறியப்பட்டன. கிளை நதி இருந்த பகுதி மற்றும் பிரமிடு கட்டுமானத்தின் போது கனமான கற்கள், உபகரணங்கள் ஆகியவற்றை கொண்டு செல்லவும், மக்கள் கடந்து செல்லவும் பயன்படுத்தப்பட்ட நீர்வழிப் பாதை ஆகியவற்றை குறிக்கும் தரவுகள் உள்ளன. அவை எங்களுக்கு பிரமிடு கட்டுமானத்தில் இருக்கும் மர்மத்தை விளக்க உதவின" என்றார்.

ஆய்வு குழுவின் கூற்றுபடி, அழிந்து போனதாக நம்பப்படும் அந்த ஆற்றின் கிளைக்கு அஹ்ரமத் கிளை (Ahramat) என்று பெயர். `அஹ்ரமத்’ என்றால், அரபு மொழியில் பிரமிடுகள் என்று பொருள். ஆற்றின் கிளை தோராயமாக 64 கி மீ (39 மைல்கள்) நீளமும் 200-700 மீ (656 - 2,296 அடி) அகலமும் கொண்டது என்பதை குழு கண்டறிந்தது. 4,700 - 3,700 ஆண்டுகளுக்கு முன்பு எழுப்பப்பட்ட 31 பிரமிடுகளும் இந்த கிளை நதியின் கரையில் அமைந்துள்ளதாக ஆய்வாளர்கள் குறிப்பிடுகின்றனர்.

அழிந்துபோன அஹ்ரமத் நதியின் கண்டுபிடிப்பு, கிசா மற்றும் லிஷ்ட் இடையே அதிக பிரமிடுகள் இருந்ததை விளக்க உதவுகிறது. இந்த பகுதி தற்போது சஹாரா பாலைவனத்தில் மக்கள் நடமாட்டமே இல்லாத பகுதியில் உள்ளது. பிரமிடுகள் அருகில் கிளை நதி இருந்ததற்கான தடயம் இருப்பதால், பிரமிடுகளின் கட்டுமான பணிகளின் போது இந்த நதியில் நீரோட்டம் இருந்திருக்கும் என்று அந்த ஆய்வு அறிக்கையில் குறிப்பிட்டுள்ளனர்.

"பண்டைய எகிப்தியர்கள் பிரமிடுகளில் பயன்படுத்தப்பட்டிருக்கும் கனமான கற்களை (அதிகபட்சம் ஒரு கல்லின் எடை 10 டன் வரை இருக்கலாம்) கொண்டு வர மனித உழைப்பை காட்டிலும் நதியின் ஆற்றலைப் பயன்படுத்தி இருக்கலாம். அதாவது நதி வழியாக அவற்றை கொண்டு வந்திருக்கலாம் " என்று டாக்டர் ஆன்ஸ்டைன் விளக்குகிறார்.

நைல் நதி பண்டைய எகிப்தின் உயிர்நாடியாக இருந்துள்ளது என்பது இந்த ஆய்வில் புலப்படுகிறது. இன்றளவும் நைல் நதி எகிப்தியர்களின் உயிர்நாடியாக தான் உள்ளது.

(சமூக ஊடகங்களில் பிபிசி தமிழ் ஃபேஸ்புக், இன்ஸ்டாகிராம், எக்ஸ் (டிவிட்டர்) மற்றும் யூட்யூப் பக்கங்கள் மூலம் எங்களுடன் இணைந்திருங்கள்.)