வருமான வரிச் சலுகை: மாத சம்பளம் வாங்குவோர் கூடுதலாக எவ்வளவு சேமிக்கலாம்?
பட மூலாதாரம், Getty Images
மத்திய பட்ஜெட்டில் வருமான வரியில் இரண்டு முக்கிய மாற்றங்கள் செய்யப்பட்டுள்ளதாக நிதியமைச்சர் சீதாராமன் கூறினார்.
புதிய வருமான வரி திட்டத்தை தேர்வு செய்திருக்கும் நபர்களுக்கு நிலையான கழிவு (Standard Deduction) ரூ.50,000 லிருந்து ரூ.75,000 ஆக அதிகரிக்கப்பட்டுள்ளது.
இந்த பட்ஜெட்டில் பழைய வருமான வரி திட்டத்தில் (Old Regime) எந்த மாற்றமும் செய்யப்படவில்லை.
பிபிசி தமிழ் வாட்ஸ்ஆப் சேனலில் இணைய இங்கே கிளிக் செய்யவும்.
பட மூலாதாரம், Getty Images
புதிய வருமான வரி திட்டத்தில் வரும் மாற்றங்கள்
தற்போதைய மத்திய பட்ஜெட் அறிவிப்பின் படி, புதிய வருமான வரி திட்டத்தை (New Tax Regime) தேர்வு செய்திருக்கும் நபர்களுக்கு 3 லட்சம் வரை வரி கிடையாது.
- ரூ. 3 முதல் ரூ. 7 லட்சம் வரை - 5% வரி (பிரிவு 87A இன் கீழ் வரி தள்ளுபடி கிடைக்கும்)
- ரூ. 7 முதல் ரூ. 10 லட்சம் வரை - 10% வரி (பிரிவு 87A இன் கீழ் வரி தள்ளுபடி கிடைக்கும்)
- ரூ. 10 முதல் ரூ. 12 லட்சம் வரை - 15% வரி
- ரூ. 12 முதல் ரூ. 15 லட்சம் வரை - 20% வரி
- ரூ. 15 லட்சத்துக்கு மேல் - 30% வரை வரி
பிப்ரவரி 2024 இல் அறிவிக்கப்பட்ட புதிய வருமான வரி முறை:
ஒன்றிய நிதியமைச்சர் நிர்மலா சீதாராமன் பிப்ரவரி 2024 இல் இடைக்கால பட்ஜெட்டை அறிவித்திருந்தார். அதன்படி, புதிய வருமான வரி திட்டத்தில் ரூ. 3 லட்சம் வரை வரி இல்லை,
- ரூ. 3 முதல் ரூ. 6 லட்சம் வரை - 5% வரி (பிரிவு 87A இன் கீழ் வரி தள்ளுபடி கிடைக்கும்)
- ரூ. 6 முதல் ரூ. 9 லட்சம் வரை - 10% வரி ( ரூ. 7 லட்சம் வரை பிரிவு 87A இன் கீழ் வரி தள்ளுபடி கிடைக்கும்)
- ரூ. 9 முதல் ரூ. 12 லட்சம் வரை - 15% வரி
- ரூ. 12 முதல் ரூ. 15 லட்சம் வரை - 20% வரி
- ரூ. 15 லட்சத்துக்கு மேல் - 30% வரை வரி
பழைய வருமான வரி திட்டம்
இந்த பட்ஜெட்டில் பழைய வருமான வரியில் எந்த மாற்றமும் செய்யப்படவில்லை. 2025 ஆம் நிதியாண்டு வரை தற்போதைய நிலையே தொடரும். அதன்படி,
- மூத்த குடிமக்களான (60 முதல் 80 வயதுக்குட்பட்ட நபர்களுக்கு) ரூ. 3 லட்சம் வரை வரி இல்லை.
- 80 வயதுக்கு மேலான சிறப்பு மூத்த குடிமக்களுக்கு ரூ. 5 லட்சம் வரை வரி இல்லை.
மற்றவர்களுக்கான பழைய வருமான வரி முறை:
- ரூ. 2.5 லட்சம் வரை வருமான வரி இல்லை
- ரூ. 2.5 முதல் ரூ. 5 லட்சம் வரை - 5% வரி
- ரூ. 5 முதல் ரூ. 10 லட்சம் வரை - 20% வரி
- ரூ. 10 லட்சத்துக்கு மேல் - 30% வரி
பட மூலாதாரம், Getty Images
மாத சம்பளம் வாங்குவோர் கூடுதலாக எவ்வளவு சேமிக்கலாம்?
மத்திய பட்ஜெட்டில் புதிய வருமான வரி திட்டத்தில் அறிவிக்கப்பட்டுள்ள சலுகைகளால், மாத சம்பளம் வாங்குவோர் செலுத்தவிருக்கும் வரியில் ஏற்படும் மாற்றங்கள் என்ன? என்பது குறித்து ஆடிட்டர் ஜுவைஸ் அரங்கட் அளித்த தகவலின் அடிப்படையில், ஆண்டு வருமானம் ரூ. 9 லட்சம் வரை இருக்கும் நபர்களுக்கு வருமான வரியில் பின்வரும் மாற்றங்கள் இருக்கும்.
நிலையான கழிவு தொகை ரூ.75,000 போக, ரூ.8,25,000
- ரூ. 3 லட்சம் வரை - வரி இல்லை
- ரூ. 3 முதல் ரூ. 7 லட்சம் வரை - 5% வரியின் அடிப்படையில், கூடுதல் ரூ. 4 லட்சத்திற்கு ரூ.20,000 வரி செலுத்த வேண்டி இருக்கும்.
- ரூ. 7 முதல் ரூ. 9 லட்சம் வரை - 10% வரியின் அடிப்படையில் கூடுதல் ரூ.2 லட்சத்திற்கு ஆண்டுக்கு ரூ.12,500 வரி செலுத்த வேண்டி இருக்கும்.
ஆக, பொது வரி ரூ.32,000 உடன் 4% செஸ் வரி ரூ.1,300 சேர்த்து மொத்தம் ரூ.33,800 புதிய வருமான வரியின் கீழ் செலுத்த வேண்டி இருக்கும்.
இதற்கு முந்தைய புதிய வருமான வரியின் அமைப்பின் கீழ், ஆண்டுக்கு 9 லட்சம் வரை ஊதியம் பெறுவோர் செலுத்தி வந்த வரி எவ்வளவு?
நிலையான கழிவு தொகை ரூ.50,000 போக, ரூ.8,50,000
- ரூ. 3 லட்சம் வரை - வரி இல்லை
- ரூ. 3 முதல் ரூ. 6 லட்சம் வரை - 5% வரியின் அடிப்படையில், கூடுதல் ரூ.3 லட்சத்திற்கு ரூ.15,000 வரி செலுத்த வேண்டி இருந்தது.
- ரூ. 6 முதல் ரூ. 9 லட்சம் வரை - 10% வரியின் அடிப்படையில், கூடுதல் ரூ. 3 லட்சத்திற்கு ரூ.25,000 வரி செலுத்த வேண்டி இருந்தது.
ஆக, பொது வரி ரூ.40,000 உடன் 4% செஸ் வரி ரூ.1,600 சேர்த்து மொத்தம் ரூ.41,600 செலுத்த வேண்டி இருந்தது.
புதிய வருமான வரி திட்டத்தை தேர்வு செய்த நபர் ஆண்டுக்கு ரூ.9 லட்சம் ஊதியம் பெறுபவராக இருக்கும் பட்சத்தில், இன்றைய மத்திய பட்ஜெட் அறிவிப்பின் மூலம் கூடுதலாக ரூ.7,800 வரை சேமிக்கலாம்.
(சமூக ஊடகங்களில் பிபிசி தமிழ் ஃபேஸ்புக், இன்ஸ்டாகிராம், எக்ஸ் (டிவிட்டர்) மற்றும் யூட்யூப் பக்கங்கள் மூலம் எங்களுடன் இணைந்திருங்கள்.)
