ம.பி.யில் 11 குழந்தைகள் பலி: இருமல் மருந்து எப்போது ஆபத்தாகிறது? கவனிக்க வேண்டிய முக்கிய விஷயங்கள்

மத்திய பிரதேசத்தில் இருமல் மருந்து குடித்ததால் ஏற்பட்ட பாதிப்பு காரணமாக குழந்தைகள் உயிரிழந்ததாக குற்றச்சாட்டு எழுந்துள்ளது.

அந்த மருந்து தமிழ்நாட்டில் காஞ்சிபுரத்தில் தயாரிக்கப்பட்டது என்றும், அந்த மருந்தில் ஆபத்தான டைஎத்திலின் கிளைக்கால் இருந்தது கண்டுபிடிக்கப்பட்டிருப்பதாகவும் எஃப்.ஐ.ஆரில் தெரிவிக்கப்பட்டுள்ளது.

இதுதொடர்பாக உரிய நடவடிக்கை எடுக்க கோரி தமிழ்நாடு அரசுக்கு மத்திய பிரதேச அரசு கடிதம் எழுதியுள்ளது.

இதனைத் தொடர்ந்து 2 வயதுக்கும் குறைவான குழந்தைகளுக்கு இருமல் மருந்து கொடுக்க வேண்டாம் என மத்திய அரசு அறிவுறுத்தியுள்ளது.

அந்த நிறுவனம் தயாரிக்கும் இருமல் மருந்தை குழந்தைகள் மட்டுமின்றி எந்த வயதினரும் பயன்படுத்த வேண்டாம் என்று தமிழக மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் கேட்டுக் கொண்டுள்ளார்.

டை எத்திலின் கிளைக்கால் குழந்தைகளின் உயிருக்கு எவ்வாறு ஆபத்தானதாக மாறுகிறது? குழந்தைகளுக்கு இருமல் மருந்து வாங்கும் போது செய்ய வேண்டியது என்ன? செய்யக்கூடாதது என்ன?

மத்திய பிரதேசத்தில் என்ன நடந்தது?

மத்திய பிரதேசம் மாநிலம் சந்த்வாரா மாவட்டத்தில் நேற்று முன்தினம் வரை (அக். 3) இருமல் மருந்து குடித்ததால் ஏற்பட்ட பாதிப்பால் 11 குழந்தைகள் உயிரிழந்ததாக ஏஎன்ஐ செய்தி வெளியிட்டுள்ளது.

இவர்கள் செப்டம்பர் 7ஆம் தேதி முதல் சிறுநீரக செயலிழப்பு காரணமாக உயிரிழந்ததாக அதில் குறிப்பிடப்பட்டுள்ளது.

இதுதொடர்பாக போலீசார் பதிவு செய்துள்ள முதல் தகவல் அறிக்கையில், அரசு மருத்துவமனை மருத்துவர் பிரவீன் சோனி மற்றும் ஸ்ரீசன் என்ற இருமல் மருந்து தயாரிப்பு நிறுவனத்தின் மேலாளர்களின் பெயர்கள் இடம் பெற்றுள்ளன.

எஃப்ஐஆர் படி, "கடந்த ஆகஸ்ட் முதல் செப்டம்பர் வரை 5 வயதுக்கு உட்பட்ட பல குழந்தைகள் சளி, இருமல் மற்றும் காய்ச்சல் தொந்தரவால் பாராசியாவில் உள்ள அரசு மருத்துவமனைக்கு அழைத்துவரப்பட்டனர். . அவர்களில் பலருக்கும் மருத்துவர் சோனி இருமல் மருந்து உள்ளிட்ட மருந்துகளை பரிந்துரைத்துள்ளார். சில நாட்கள் கழித்து குழந்தைகளுக்கு சிறுநீர் கழிப்பதில் பிரச்னை, முக வீக்கம் மற்றும் வாந்தி போன்ற பிரச்னைகள் ஏற்பட்டுள்ளன. ஆய்வில் அவர்களுக்கு சிறுநீரகம் செயலிழந்தது தெரியவந்தது"

"தமிழ்நாட்டைச் சேர்ந்த ஸ்ரீசன் பார்மாசூட்டிகல்ஸ் நிறுவனம் தயாரித்த அந்த இருமல் மருந்தில் ஆபத்தான டைஎத்திலின் கிளைக்கால் இருந்தது தெரியவந்தது. இந்த மருந்து குழந்தைகளுக்கு ஆபத்தாகக் கூடும் என்று தெரிந்த போதிலும் கூட விற்பனைக்கு கொண்டுவரப்பட்டு, சிறு குழந்தைகளுக்கு பரிந்துரைக்கப்பட்டிருக்கிறது" என்று அந்த எஃப்ஐஆர் மேலும் கூறுகிறது.

தமிழ்நாட்டில் காஞ்சிபுரத்தில் தயாரிக்கப்பட்ட கோல்ட்ரிஃப் இருமல் மருந்தை மத்திய பிரதேச அரசு தடை செய்துள்ளது. அந்த சிரப் மட்டுமின்றி, அந்த நிறுவனத்தின் பிற தயாரிப்புகளும் தடை செய்யப்படுவதாக அம்மாநில முதல்வர் மோகன் யாதவ் தனது எக்ஸ் பக்கத்தில் கூறியுள்ளார். அத்துடன், இது தொடர்பாக விசாரணை நடத்தக்கோரி அக்டோபர் ஒன்றாம் தேதி தமிழக அரசுக்கு அம்மாநில அரசு கடிதமும் எழுதியுள்ளது.

இதற்குப் பிறகு, ஸ்ரீசான் பார்மாசூட்டிகல்ஸ் தயாரித்த கோல்ட்ரிஃப் இருமல் சிரப்பில் "கலப்படம்" இருந்ததாக தமிழக மருந்து கட்டுப்பாட்டுத் துறை உறுதிப்படுத்தியது.

தமிழக அரசு கூறுவது என்ன?

இதுதொடர்பாக தமிழக மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் நேற்று (அக்.4) செய்தியாளர்களைச் சந்தித்தார். அப்போது பேசிய அவர் "இந்த விவகாரத்தில் மருந்து கட்டுப்பாட்டு துறைக்கு தகவல் தெரிவித்து நடவடிக்கை எடுக்க உத்தரவிட்டுள்ளோம். அனைத்து கோணங்களிலும் விசாரணை நடத்தப்படும். விசாரணையின் முடிவில் சட்டப்பூர்வ நடவடிக்கை எடுக்கப்படும்" என்றார்.

"தமிழ்நாட்டில் இதுவரை இதுபோன்ற புகார் வரவில்லை. எனினும் முன்னெச்சரிக்கையாக கோல்ட்ரிப் இருமல் மருந்தை குழந்தைகளுக்கு மட்டுமின்றி எந்த வயதினரும் பயன்படுத்த வேண்டாம்" என்று அவர் கூறினார்.

குழந்தைகளுக்கு இருமல் மருந்து கொடுக்கலாமா?

சளி, இருமல் போன்ற அறிகுறிகள் உள்ள 2 வயதுக்கு கீழ் உள்ள குழந்தைகளுக்கு Over the counter மருந்துகளை (அதாவது மருந்துவர்கள் பரிந்துரை இல்லாமல் மருந்து கடைகளில் வாங்கப்படும் மருந்துகள்) பரிந்துரைக்க வேண்டாம் என அமெரிக்க உணவு மற்றும் மருந்து நிர்வாகம் (FDA) தெரிவித்துள்ளது.

ஏனெனில் இது தீவிரமான மற்றும் உயிருக்கே ஆபத்தை விளைவிக்கக் கூடியதாக அமையும் என தெரிவிக்கப்பட்டுள்ளது.

குறிப்பாக குழந்தைகளுக்கு மருந்துவர்களின் பரிந்துரைகளின்றி சளி மற்றும் இருமல் மருந்துகள் வாங்குவது ஆபத்து எனவும் எஃப்டிஏ (FDA) எச்சரித்துள்ளது. இதற்கான காரணங்களையும் அது பட்டியலிட்டுள்ளது.

ஏனெனில்,

இதுகுறித்து தெளிவான தகவலை பெற சென்னை அப்போலோ மருத்துவமனையின் யூராலஜிஸ்ட் (சிறுநீரக மருத்துவர்) சந்தீப் பாஃப்னாவை தொடர்புகொண்டோம். நமது சந்தேகங்களுக்கு அவர் பதில் அளித்தார்.

"பெரும்பாலும் குழந்தைகளுக்கு தானாகவே இருமல், சளி சரியாகிவிடும். அதேசமயம் 5 வயதுக்கு கீழ் உள்ளவர்களுக்கு சரியான அளவில், முறையாக மருத்துவர்களின் பரிந்துரையுடன் மருந்தை உட்கொள்வது சிறந்தது" என மருத்துவர் சந்தீப் பாஃப்னா கூறினார்.

அதேபோல சரியான அளவில் மருந்தை உட்கொள்வதும் அவசியம். இதை எப்படி கண்டுபிடிப்பது என்பது பற்றியும் அமெரிக்க உணவு மற்றும் மருந்து நிர்வாகம் குறிப்பிட்டுள்ளது. அதன்படி,

சிறுநீரக பாதிப்பு ஏன்?

மத்திய பிரதேசத்தில் இருமல் மருந்து உட்கொண்டதால் உயிரிழந்த குழந்தைகளுக்கு சிறுநீரகம் பாதிப்பு ஏற்பட்டதாக செய்திகள் வெளியாகின. இது குறித்து மருத்துவர் சந்தீப் பாஃப்னாவிடம் கேட்டபோது, "தொழிற்சாலைகளில் பயன்படுத்தப்படும் டைஎத்திலின் கிளைகால் (diethylene glycol), எத்திலின் கிளைகால் (ethylene glycol) போன்றவற்றின் மூலக்கூறுகள் நம் உடலில் உள்ள சிறுநீரகக் குழாயை (renal tubule) பாதிக்கும்." என்றார்.

மேலும் இதுபற்றி விரிவாக விளக்கும்போது, "சிறுநீரகக் குழாய் (Renal tubule) என்பது தேநீர் வடிகட்டியைப் போல, இது சிறுநீரகத்தின் வடிகட்டியாகும். டைஎத்திலின் கிளைகால் (diethylene glycol), எத்திலின் கிளைகால் (ethylene glycol) மூலக்கூறுகளால் சிறுநீரகத்தின் சுத்திகரிப்பு தன்மை பாதிக்கப்படும். இதனால்தான் சிறுநீரக கோளாறு, கல்லீரல் பிரச்னை, மூச்சுத்திணறல் போன்ற பாதிப்புகள் ஏற்படுகின்றன" எனக் கூறினார்.

சளி, இருமலை போக்க என்ன செய்யலாம்?

இரண்டு வயதுக்கு உட்பட்ட குழந்தைகளுக்கு சளி, இருமலை குணப்படுத்துவதற்கான சில வழிகளை அமெரிக்க உணவு மற்றும் மருந்து நிர்வாகம் பரிந்துரைத்துள்ளது.

இருமல் மருந்து வாங்கும் போது என்ன செய்ய வேண்டும்?

மருத்துவர் சந்தீப் கூறுகையில், "ஒருவரின் வயது, உடல் எடையைப் பொறுத்து இருமல் மருந்தின் அளவு மாறுபடும். பெரியவர்களுக்கு (adult) பரிந்துரைக்கும் மருந்து அளவை குழந்தைகளுக்கு கொடுக்கக் கூடாது. ஏனென்றால் பெரியவர்களின் சிறுநீரகம் முதிர்ச்சி அடைந்திருக்கும். அதேசமயம் குழந்தைகளுக்கு சிறுநீரகம் முழுமையாக முதிர்ச்சி அடைந்திருக்காது. இதனால் இது அவர்களுக்கு பாதிப்பை ஏற்படுத்த வாய்ப்புள்ளது." என்றார்.

இருமல் மருந்து வாங்கும்போது என்ன செய்ய வேண்டும், என்ன செய்யக்கூடாது என்பதையும் அவர் விளக்கினார்.

செய்யக்கூடாதவை:

செய்ய வேண்டியவை:

எப்போது மருத்துவரை அணுகலாம்?

குழந்தைகளுக்கு சளி, இருமல் ஏற்படும்போது எந்தெந்த அறிகுறிகள் இருந்தால் உடனடியாக மருத்துவரை அணுக வேண்டும் என அமெரிக்க உணவு மற்றும் மருந்து நிர்வாகம் சில அறிகுறிகளை வெளியிட்டுள்ளது. அதில்,

இதுபோன்ற அறிகுறிகள் இருந்தால் உடனடியாக மருத்துவரை அணுகுவது நல்லது என அறிவுறுத்தப்படுகிறது.

இது, பிபிசிக்காக கலெக்டிவ் நியூஸ்ரூம் வெளியீடு