Тазоҳуроти густарда дар Афғонистон дар вокуниш ба куштори ғайринизомиён
Садҳо тан аз шаҳрвандони афғон ва фаъолони мадании зану мард дар Кобул ва чанд шаҳри дигари Афғонистон дар вокуниш ба куштори ғайринизомиён даст ба эътирозҳои маданӣ заданд.
Роҳпаймоӣ ҳамзамон дар Кобул, пойтахт, Мазори Шариф дар шимол, Ҳирот дар ғарб, Бомиён дар марказ ва вилояти Ғур, ки ахиран чаҳордаҳ шаҳрванди он ба рагбор рафтанд, баргузор шуд.
Дар Кобул муътаризон тасовири аҷсоди қурбониёни рӯйдоди Ғур ва Аргуни Пактикоро бо худ ҳамл карданд ва аз давлат хостанд, ки омилони куштори ғайринизомиёнро дар ин рӯйдод шиносоӣ ва онҳоро ба додгоҳ бикашонанд.
Дар инфиҷори худравҳои бумбгузоришудаи Аргуни Пактико, ки ду ҳафта пеш дар як бозор иттифоқ афтод, дастикам панҷоҳ ғайринизомӣ, ки барои хариди ид берун шуда буданд, кушта шуданд. Дар рӯйдоди мушобеҳи баъдӣ дар вилояти Тахор дар шимоли Афғонистон 9 ғайринизомӣ кушта шуданд.
Рӯзи ҷумъа ҳам мардони мусаллаҳ чаҳордаҳ мусофири як минибусро дар вилояти Ғур куштанд. Як наварӯс ва домод ҳам дар миёни кушташудаҳои ин рӯйдод буд, ки хашми шаҳрвандони афғон ва фаъолони маданиро барангехт.
Муътаризон дар Кобул шиъорҳои тунду тез алайҳи гурӯҳи Толибон ва дигар мухолифони мусаллаҳи давлати Афғонистон сар медоданд ва бо худ плокорд ҳамл мекарданд, ки дар он "Марг бар Толибон " , "Толибон, душмани инсоният" , "Куштани моро бас кунед" , "Ҳомиёни Толибон бадтар аз Толибон" ва .. . навишта шуда буд.
Роҳпаймоии Кобул дар порки Зарнигор дар марказ ва дар наздикии раёсати ҷумҳурии Афғонистон баргузор шуд. Муътаризон аз давлати Афғонистон хостанд, ки аз пуштибонии мухолифони мусаллаҳ даст бикашад ва фавран омилони куштори ғайринизомиёнро, ба вижа тирборони ғайринизомиён дар Ғурро, ба додгоҳ бикашонад.
Дар вилояти Ҳирот дар ғарби Афғонистон ҳам даҳҳо тан таҷаммуъ карданд ва "куштори ҳадафманди низомиён" ба вижа рӯйдоди ахир дар Ғурро қобили нигаронӣ хонда ва онро маҳкум карданд. Хабарнигори Би-би-сӣ дар Ҳирот мегӯяд, ки қарор аст дар поёни рӯз ҳам шуморе аз шаҳрвандони Ҳирот дар яке аз чаҳорроҳ ба ёди қурбониёни рӯйдоди ахири Афғонистон шамъ рӯшан кунанд.
Роҳпаймоии дигар дар вулусволии Лаъл ва Сарҷангали вилояти Ғур бо иштироки садҳо нафар баргузор шуд. Наварӯсе, ки дар рӯйдоди рӯзи ҷумъаи Ғур кушта шуд, дар Ғур ба дунё омада буд ва бо писаре аз Бомиён издивоҷ карда буд, ки дар масири роҳ афроди мусаллаҳ ҳар ду нафарро бо аъзои хонаводаҳояшон тирборон карданд.
Тасовире аз аҷсоди қурбониёни рӯйдоди ахири Ғур дар шабакаҳои иҷтимоӣ байни корбарони афғон даст ба даст мешавад ва ба нишонае барои эътирозоти густардаи корбарони Фейсбук ва Твиттари афғон бадал шудааст.
Дар шаҳри Мазори Шариф низ муътаризон дар маҳкумияти ҳамалоти ахир, ки ба куштори ғайринизомиён мунтаҷ шуда, роҳпаймоӣ карданд ва аз ҳукумати Афғонистон хостанд, ки "банои ёдбуде"ро барои қурбониёни ғайринизомӣ бисозад.
Ҳамчунин дар вилояти марказии Бомиён , шаҳрвандон ва фаъолони маданиву ҳуқуқӣ ва ҷавонон бо таҷаммуъ дар маркази шаҳр бар алайҳи гурӯҳи Толибон шиъори тунд сар доданд ва гуфтанд, ки дигар роҳпаймоӣ натиҷа намедиҳад ва "ягона роҳи мубориза бо гурӯҳи Толибон" мусаллаҳ шудани мардум аст.
Фармони Ҳомид Карзай
Гурӯҳи Толибон, ки дар сездаҳ соли гузашта бо ҳукумати Афғонистон ва ҳузури нерӯҳои хориҷӣ ҷангида, даст доштан дар рӯйдоди Аргуни Пактико ва куштори мусофирони Ғурро напазируфтааст. Мақомҳои афғон омилони ин рӯйдодро душманони мардуми Афғонистон медонанд.
Давлати Афғонистон дар солҳои гузашта аз суи мунтақидон ва ҳатто гоҳе аз суи шуморе аз мақомҳои аршади давлатӣ, ки бо сиёсатҳои давлат дар мавриди Толибон мухолифат доранд, дар мавриди шеваи бархурд бо Толибон мавриди интиқод қарор гирифтааст.
Ҳомид Карзай, раиси ҷумҳурии Афғонистон, ки интизор меравад дар яке ду моҳи оянда қудратро ба ҷонишинаш мунтақил кунад, дар солҳои ҳукумати худ аз сиёсати сулҳу оштӣ дар канори набарди мусаллаҳона кор гирифтааст.
Аз як су барои тарғиби мухолифони мусаллаҳ ба раванди сулҳ бо онҳо аз роҳи гуфтугӯи сулҳ пеш омада ва аз суе ҳам сарбозонаш дар ҷабҳа бо мухолифони мусаллаҳ, аз ҷумла гурӯҳи Толибон, рӯдаррӯ ҷангидаанд.
Раҳоии зиндониён аз зиндонҳои Афғонистон, ба вижа озодии афроди Толибон аз зиндони Багром, интиқоди зиёде ба ҳамроҳ дошта ва мунтақидони оқои Карзай ҳамчунин гуфтаанд, ки афроде ки аз ин зиндонҳо раҳо шудаанд, дубора ба сафи мухолифони мусаллаҳи давлат пайваста ва нерӯмандтар аз гузашта мусаллаҳ шудаанд.
Ҳомид Карзай, раиси ҷумҳурии Афғонистон рӯйдоди Ғурро дар силсилаи маҳкумиятҳои ҳамалоти интиҳорӣ ва инфиҷорҳо бо алфози шадиде маҳкум карда ва онро ҳамлае "ваҳшиёна" хондааст.
Оқои Карзай бо судури фармоне ҳайатеро барои таҳқиқ дар мавриди рӯйдоди Ғур муваззаф карда ва ҳамчунин ваъда карда, ки ба ҳар кадом аз хонаводаҳои қурбониёни ин рӯйдод сад ҳазор афғонӣ муъодили беш аз ду ҳазор дулори омрикоӣ кумак мекунад.
