Суръати ҳавопаймои куреӣ барои фуруд 'бисёр кам' будааст

Коршиносони омрикоӣ мегӯянд суръати Буйнг-777-и ширкати куреии Осиёно, ки шанбе дар фурудгоҳи Сон-Фронсиску суқут кард, "бисёр камтар" аз он буда, ки барои фуруд муносиб бошад ва халабон қасд дошта фурудро мутаваққиф кунад ва пас аз авҷ гирифтан омодаи фуруди муносиб шавад.

Ба гуфтаи ин коршиносон халабон 1.5 сония пеш аз суқут дархост карда буд, то авҷ бигирад ва як "даври дигар" пеш аз фуруд бизанад.

Ҳавопаймо, ки 307 мусофир дошт, рӯзи шанбе пеш аз мавқеъи дар бонди фуруди Сон-Фронсиску ба замин нишаст ва думи он ба як мавҷшикан бархӯрд кард ва канда шуд.

Мусофирон ва хадамаи ҳавопаймо бо истифода аз сурсураҳои изтирорӣ ҳавопайморо ки оташ гирифт, тахлия карданд.

Ширкати куреии Осиёно таъйид карда ду духтари навҷавони чинӣ, ки ақиби ҳавопаймо нишаста буданд, дар ин ҳодиса ҷон бохтанд.

Пизишки қонунии Сон-Фронсиску дар ҳоли баррасии ин эҳтимол аст, ки яке аз ин ду духтар ин буда, ки як худрави имдодӣ ӯро дар бонди фурудгоҳ зер гирифтааст.

Дебуро Ҳерсман, раиси ҳайъати мудираи амнияти ҳавоии Омрико, дар кунфронси хабарӣ гуфт суръати ҳавопаймо дар ҳинни фуруд бисёр камтар аз 254 килуметр дар соъат будааст.

Ба гуфтаи хонумт Ҳерсман баррасии муколимоти кобини халабон ва иттилоъоти парвоз нишон медиҳад, ки тақрибан ду сония пеш аз бархӯрд бо замин аз халабон хоста шуда буда суръатро афзоиш диҳад ва халабон ҳам ба ҷои дархости фуруд дархост карда буда як даври дигар бизанад.

Хонуми Ҳерисман таъкид кард баҳс бар сари чанд килуметр дар соъат нест ва суръати ҳавопаймо ба "мизони қобили мулоҳизае камтар" аз он буда, ки бояд бошад.

Ӯ гуфт далоили мухталифе метавонанд боъиси ин вазъият шуда бошад ва "ҳар эҳтимоле мумкин аст" ва "ҳанӯз хеле зуд аст гузинае канор гузошта шавад."

Акнун мушаххас шуда халабони ҳавопаймо бо он ки таҷрибаи даҳҳазор соъат парвоз дошта, аммо фақат 43 соъат бо ин навъ Буйнг-777 парвоз карда будааст.

Аммо Юн Юнг Ду, раиси ширкати ҳавопаймойии Осиёно,дар кунфронсе хабарӣ дар Сеул гуфт: "Мутури ҳавопаймо ва ё нуқси фаннӣ далели ин сонеҳа набудааст."

Раиси ширкати ҳавопаймойии Осиёно зимни мунтафӣ надонистани хатои инсонӣ гуфт халабонҳо ботаҷруба будаанд

Ба ҷуз ду нафаре, ки дар замони ҳодиса кушта шуданд 181 нафар ба бемористон мунтақил шуданд, ки бархе аз онҳо ҷароҳоти ҷузъӣ доштанд, аммо ба гуфтаи сухангӯйи бемористони умумии Сон-Фронсиску ҳоли панҷ нафар вахим аст ва 15 нафар ҳам ҳанӯз ба ҳӯш наомадаанд.

Яке аз мусофирон ба Би-би-сӣ гуфта "ҳамаи чиз бисёр сареъ иттифоқ афтод ва касе нигарони чизе набуд."

Ба гуфтаи яке дигар аз мусофирон ҳавопаймо дар лаҳзаи фуруд "хориҷ аз кунтрул" ба назар мерасид ва "мусофирон баъд аз ин ки садои баланде шуниданд, диданд ҳавопаймо дар дуду абр фурӯ рафтааст."

Бо ин ҳол мусофирон оромиши худро сареъ пайдо карданд ва ба навбат ва бидуни ҳуҷум овардан аз ҳавопаймо хориҷ шуданд."