Trump oo loo sheegay in “dilku ka istaagay” gudaha Iiran

Tebin toos ah

1. 16 Jannaayo 2026Maxay tahay baqdinta iyo walaaca ay Mareykanka u gudbiyeen qaar ka mid ah dalalka Carabta?

   

   Aqalka Cad ee looga arrimiyo dalka Mareykanka ayaa Khamiistii sheegay in Iran ay hakisay xukunkii dilka ahaa ee lagu fulin lahaa 800 oo mudaaharaadayaal ah, sababo la xiriira cadaadis uga yimid madaxweynaha Mareykanka Donald Trump oo ku aaddan dibadbaxyada.

   Arrintan ayaa ku soo beegmaysa iyadoo wakaaladda wararka ee AFP ay ka soo xigatay sarkaal sare oo Sucuudi ah oo sheegay in Sucuudiga, Qatar iyo Cumaan ay horseedeen dadaallo xooggan oo lagu doonayay in lagu qanciyo madaxweynaha Maraykanka Donald Trump inuu ka fogaado weerarrada uu Iran ku qaado xillligan.

   Waxaay dalalkan sheegeen in weerar xilligan lagu qaado Iran ay ka cabsi qabaan inay horseeddo “falcelin khatar ah oo gobolka ka dhacda”.

   Sida uu sheegay mas’uulka, "Saddexda waddan ee Gacanka ayaa dadaallo diblomaasiyadeed oo xooggan ku bixiyay daqiiqadii ugu dambeysay si ay u qanciyaan Madaxweyne Trump inuu Iran fursad siiyo si ay u muujiso niyad wanaagsan… kanaalada isgaarsiineed weli waa furan yihiin si loo xoojiyo kalsoonida wadajirka ah iyo niyadda wanaagsan ee haatan jirta."

2. 15 Jannaayo 2026Xog kale oo laga helay saldhiga wayn ee Mareykanka ku leeyahay Qadar

   

   Xigashada Sawirka, TSGT Scott Reed, USAF

   Mareykanka ayaa hoos u dhigay heerka feejignaanta amni ee saldhiggiisa milatari ee Udeid Air Base ee dalka Qadar.

   Warkan waxaa werisay wakaaladda Reuters, iyadoo soo xiganaysa saddex ilo-wareed oo xog-ogaal ah oo aan magacyadooda la shaacin.

   Digniin dhanka ammaanka ah ayaa laga soo saaray saldhiggan shalay oo Arbaco ahayd.

   Sida ay Reuters sheegtay, iyadoo soo xiganaysa hal il-wareed, diyaaradaha millatariga Mareykanka ee Arbacadii laga qaaday saldhigga ayaa hadda si tartiib tartiib ah dib ugu soo laabanaya.

   Laba ilo-wareed oo kale, oo Reuters ku tilmaantay diblomaasiyiin, ayaa sheegay in qaar ka mid ah shaqaalaha saldhigga, kuwaas oo shalay lagu amray inay ka baxaan, hadda loo oggolaaday inay dib ugu laabtaan shaqooyinkooda.

   Reuters ayaa sidoo kale la xiriirtay Safaaradda Mareykanka ee Qadar si ay wax uga weydiiso warkan, balse waxay sheegeen inaysan ka hadli karin arrintan.

3. 15 Jannaayo 2026Mareykanka oo qabtay markab lixaad oo nooca Shidaalka qaada ah xeebaha Venezuela

   

   Xigashada Sawirka, .

   Ciidamada millatariga Mareykanka ayaa mar kale gacanta ku dhigay markab shidaal xilli uu ku sugnaa Badda Caribbean-ka, kaas oo ay sheegeen inuu jebinayay waxa ay ugu yeereen “xannibaada maraakiibta la saaray iyo cunaqabataynta” Madaxweyne Trump uu soo rogay.

   “Muuqaal lagu baahiyay baraha bulshada ayaa muujinaya askar ka tirsan ciidanka badda Mareykanka oo hubeysan oo ku sii dhowaanaya ka dib-na fuulaya markabka nooca shidaalka qaada ah ee Veronica, taas oo lagu tilmaamay howlgal dhacay waaberigii hore isla markaana si nabad ah ku dhammaaday.

   Waa markabkii lixaad ee Mareykanku gacanta ku dhigo toddobaadyadii u dambeeyay, iyadoo lagu eedeeyay inay wadeen shidaalka Venezuela ee la mamnuucay.”

4. 15 Jannaayo 2026Trump oo shaaciyay qorshihiisa xiga haddii aysan joogsan dibadbaxyada Minnesota

   

   Xigashada Sawirka, Bloomberg via Getty Images

   Madaxweynaha Mareykanka Donald Trump ayaa Khamiistii ku hanjabay in uu dhaqan gelin doono Xeerka ka hortaga rabshadaha si uu ciidamo milatari ugu diro Minnesota, ka dib maalmo mudaharaadyo caro leh oo ka dhashay ku soo kordhista wakiillada socdaalka ee waddooyinka Minneapolis, sida ay qortay wakaalada wararka ee Reuters.

   Trump ayaa sheegay in haddii siyaasiyiinta Minnesota aysan joojin mudaaharaadayaasha weeraraya askarta laanta socdaalka, uu sharci ahaan adeegsan doono xeerkaan si uu “si degdeg ah ugu joojiyo xaaladda xun ee ka jirta.”

   Rabshadaha iyo isku dhacyada ayuu sii xoogaysanayaa kadib markii toddoba maalmood ka hor sarkaal ka tirsan hay’adda socdaalka ee ICE loo soo gaabiyo uu rasaas ku dilay muwaadin Mareykan ah, Renee Good, intii uu socday howlgalka Minneapolis, taasoo keentay mudaharaadyo ballaaran.

   Hanjabaaddii ugu dambeysay ee Trump ayaa timid saacado yar kadib markii askari ka tirsan waaxda socdaalka uu toogtay nin u dhashay dalka Venezuela oo ay dowladdu sheegtay in uu baxsanayay ka dib markii ay ICE ay isku dayeen in ay baabuurkiisa ku joojiyaan Minneapolis.

5. 15 Jannaayo 2026Qowmiyadda aan Soomaalida ahayn ee ka walaacsan hawl-gallada Minnesota ee ICE

   

   Xigashada Sawirka, Getty Images

   Ololaha adag ee maamulka Trump uu ku qaaday muhaajiriinta aan haysan dukumentiyada sharciyeysan ee Maraykanka ayaa sababay walaac weyn, gaar ahaan gobolka Minnesota, oo ah gobol ay ku badan yihiin bulshooyinka Soomaalida iyo Oromada.

   Saraakiil badan oo ka tirsan booliiska hay'adda socdaalka ayaa sidoo kale la keenay Minnesota. Taas awgeed, dad badan ayaan ka bixin guryahooda maalmihii lasoo dhaafay.

   Dadku waxa ay joojiyeen dhammaan dhaq-dhaqaaqyadii iyo in aadaan goobaha waxbarashada, caafimaadka iyo shaqooyinka. Sida lasoo sheegayo xitaa waxay bilaabeen inay xiraan dukaamadooda iyagoo ka baqaya in waddooyinka kulmaan ciidamada socdaalka iyo xuduudaha Maraykanka sida ay BBC-da u sheegeyn dad degan halkaas.

   Sii akhri warbixinta

6. 15 Jannaayo 2026Itoobiya oo Eritrea ku eedeysay hubaynta fallaagada iyada oo dagaalka afku sii xoogeystay

   

   Xigashada Sawirka, france24

   Booliiska Itoobiya ayaa sheegay inay qabteen kumannaan rasaas ah oo ay Eritrea u dirtay fallaagada ka dagaallama gobolka Amxaarada ee Itoobiya, eedeyntaas oo ay Eritrea ku tilmaantay been lagu doonayo marmarsiiyo ah bilaabista dagaal.

   Eedeynta ay jeediyeen booliiska federaalka Itoobiya ayaa sii hurisay khilaafka u dhexeeya Itoobiya iyo Eritrea, oo ah laba dal oo colaad soo jireen ah u dhaxeysay, balse heshiis nabadeed gaaray 2018, kaas oo hadda isu beddelay hanjabaado iyo xiisad cusub.

7. 15 Jannaayo 2026Faa'iidooyinka ku jira Is-aqoonsiga labada dhinac ee Israa'iil iyo Somaliland

   

   Xigashada Sawirka, arabcenterdc

   Tan iyo markii Ra'iisul Wasaaraha Israel, Benjamin Netanyahu uu sheegay in dalkiisa uu aqoonsaday Jamhuuriyadda iskeed ugu dhawaaqday madaxbanaanida ee Somaliland, waxaa isa soo tarayay baaqyada caalamiga ah ee lagu taageerayay Dowladda Soomaaliya.

   Ra'iisul Wasaare Netanyahu ayaa markii uu saxiixay warqadda aqoonsiga Somaliland, wuxuu taleefonka ugu sheegay madaxweynaha Somaliland, Cabdiraxmaan Maxamed Cabdillaahi Cirro in rabitaanka Somaliland ee ah inay ku biirto heshiiskii Abraham Accord uu ku wargelin doona madaxweyne Trump marka ay kulmaan.

   Inkastoo BBC-da ay si madaxbanaan u xaqiijin karin, haddana wargeyska The New York post ee kasoo baxa dalka Mareykanka ayaa ku warramay in madaxweynaha Mareykanka, Donald Trump ay wax ka weydiiyeen in uu aqoonsanayo Somaliland kadib go'aankii Israa'il, waxayna sheegen in hogaamiyaha Mareykanka uu u sheegay "in uusan diyaar u aheyn aqoonsiga Somaliland".

   Sii akhri warbixinta

8. 15 Jannaayo 2026Firdhiye iyo Fiqi oo gaaray deegaanka Guumays

   

   Xigashada Sawirka, Baraha Bulshada

   Madaxweynaha Dowlad-goboleedka Waqooyi Bari Soomaaliya, oo uu wehliyo Wasiirka Gaashaandhigga XFS ayaa booqasho ugu tagay Ciidamada Daraawiishta Waqooyi Bari iyo kuwa Xoogga Dalka ee ku sugan difaacyada aagga Guumays, sida lagu baahiyay warbaahinta DFS Soomaaliya.

   Wasiirka Gaashaandhiga Soomaaliya Axmed Macalin Fiqi oo ka hadlay goobta ayaa yiri sida warbaahinta doewladda lagu daabacay “Waxaan idin kula dardaarmayaa adkaynta nabadda, ilaalinta midnimada iyo wadajirka dalka, iyo ka hortagga faragelin kasta oo shisheeye oo lagu doonayo kala-goynta Soomaaliya.”

9. 15 Jannaayo 2026Sanadkan cusub 2026 iyo kaalinta uu ku jiro Baasaboorka Soomaaliya

   

   Xigashada Sawirka, Henley Passport Index

   Tusmada Baasaboorka Henley (Henley Passport Index) waxay isbarbardhigtaa helitaanka safar-fiiso-la'aan ah ee 199 baasaboor oo kala duwan, kuwaas oo loo safri karo 227 meelood oo caalamka ah.

   Haddii aan fiiso loo baahnayn, baasaboorkaasi wuxuu helayaa dhibco qiimaheedu yahay 1. Sidoo kale waa sidaas haddii aad heli karto fiiso markaad timaaddo (Visa on Arrival), oggolaansho ah ama booqde (visitor's permit), ama oggolaansho safar elektaroonik ah (ETA) markaad gelayso meesha loo socdo.

   Haddii fiiso loo baahdo, ama haddii qofka haysta baasaboorka uu khasab ku yahay inuu helo fiiso elektaroonik ah (e-Visa) oo ay dowladdu ansixisay ka hor inta uusan bixin, markaas waxaa la siinayaa dhibco qiimaheedu yahay 0. Tani sidoo kale waxay khusaysaa haddii loo baahdo oggolaansho dowladeed oo horudhac ah si loo helo fiiso markaad timaaddo.

   Sii akhri warbixinta

10. 15 Jannaayo 2026Ciidamo militari oo Yurub ah oo gaaray Greenland xilli Trump sheegay in Maraykanku u baahan yahay jasiiradda

    

    Xigashada Sawirka, AFP VIA GETTY IMAGES

    Kooxo militari oo Faransiis ah oo tiradoodu gaarayso ilaa 15 ayaa gaaray caasimadda Greenland ee Nuuk, iyadoo dalal Yurub ah oo dhowr ah ay ciidamo halkaas u direen.

    Ciidamo gaynta oo sidoo kale ay ka qaybqaadanayaan shaqaale ka socota Jarmalka, Sweden, Norway, Netherlands iyo Boqortooyada Ingiriiska, ayaa timid iyada oo Madaxweyne Donald Trump uu sii wado sheegashadiisa ku aaddan jasiiradda dhacda Arctic-ga, oo ah dhul iskiis isu maamula hoostaga Denmark.

    Madaxweynaha Faransiiska, Emmanuel Macron, ayaa sheegay in kooxda hore la xoojin doono dhawaan iyadoo lagu darayo “ciidamo dhul, hawada, iyo badda ah”.

    Diblumaasi sare oo lagu magacaabo Olivier Poivre d'Arvor ayaa u arka howlgalkan inuu yahay fariin siyaasadeed oo xooggan: “Tani waa jimicsi ugu horreeya... waxaan u muujin doonaa Maraykanka in NATO ay joogto.”

11. 15 Jannaayo 2026Sawirro satellite-ka oo muujinaya waddo cusub oo laga dhisay waqooyiga Qaza ee ay Israel haysato

    Sawirro lagu qaaday satellite-ka oo dhowaan la soo bandhigay ayaa muujinaya in Israa’iil ay ka dhistay waddo ciidan qayb ka mid ah waqooyiga Qaza ee hoos timaadda maamulka milateriga ee Israa’iil.

    Sawirrada ayaa la daabacay dhammaadkii bishii la soo dhaafay waxaana ay muujinayaan waddada weli dhismaheedu socdo, taas oo ka bilaabanaysa agagaarka Beit Hanoun ee waqooyi-bari Qaza, iyada oo maraysa Beit Lahia ilaa xeebta Badda Dhexe.

    Marka la barbardhigo sawirro laga qaaday waqtigii xabbad-joojinta Israa’iill iyo Xamaas bishii Oktoobar, waddadan horey uma jirin.

    

    Dhinaca koonfureed ee waddada waxaa lagu xoojiyaa difaacyo ka samaysan dhagxaan iyo ciid si loo ilaaliyo gaadiidka maraya waddadaas.

    Waddadan waa mid ka mid ah dhismayaasha cusub ee dhowaan laga sameeyay Qaza ee Israa’iil haysato, kuwaas oo ay ku jiraan waddooyin dheeraad ah, saldhigyo cusub, goobaha tababarka, iyo difaacyada waddooyinka.

12. 15 Jannaayo 2026CAF oo ganaaxday madaxweynaha xiriirka kubadda cagta Cameroon, Samuel Eto’o

    

    Xigashada Sawirka, Getty Images

    Xiriirka Kubadda Cagta Afrika (CAF) ayaa ku soo rogtay madaxweynaha Xiriirka Kubadda Cagta Cameroon, Samuel Eto’o, ganaax afar kulan ah iyo lacag dhan $20,000, kaddib eedeymo la xiriira anshax-xumo intii uu socday tartanka AFCON.

    Hay’adda maamusha kubadda cagta Afrika ayaa bayaan ku sheegtay in Eto’o lagu helay inuu ku xadgudbay mabaadi’da ciyaaraha intii lagu jiray ciyaar ka tirsanayd wareegga siddeed dhammaadka ah oo dhexmartay Cameroon iyo Morocco.

    Dhankooda, xiriirka kubadda cagta Cameroon (Fecafoot) ayaa diidday go’aanka CAF, iyaga oo ku tilmaantay habraaca mid “keenaya shaki weyn oo ku saabsan shuruudaha aasaasiga ah ee maxkamadeyn caddaalad ah”.

    Xiriirku wuxuu bayaan Arbacadii soo saaray ku muujiyay taageerada uu u hayo madaxweynahooda, iyaga oo tilmaamay in Eto’o uu racfaan ka qaadan doono ganaaxa.

13. 15 Jannaayo 2026Museveni oo muddo xileedkiisii todobaad raadinaya hoggaaminta Uganda oo codeeyay

    

    Xigashada Sawirka, AFP via Getty Image

    Guddiga Doorashooyinka Uganda ayaa mar kale u adeegsanaya diiwaanka codbixiyayaasha ee gacanta (manual) meelo ka mid ah dalkaasi, kaddib markii qalabkii biometric-ga uu fashilmay guud ahaan dalka xilli internet-ka la xiray.

    Waxaa jiray dib-u-dhacyo baahsan oo ka dhacay xarumaha codbixinta, iyadoo codbixintu ay carqaladeeyeen dhibaatooyin saadka la xiriira.

    Koox ka tirsan BBC-da oo ku sugan caasimadda Kampala ayaa sheegtay in niyad-jab sii kordhaya laga dareemayay codbixiyayaasha safafka ku jira.

    Madaxweyne Yoweri Museveni—oo raadinaya xilkiisa toddobaad kaddib ku dhowaad afartan sano oo uu talada hayay—ayaa codkiisa dhiibtay. Ninka sida weyn ula tartamaya waa fannaan-siyaasi noqday Robert Kyagulanyi, oo loo yaqaan Bobi Wine.

14. 15 Jannaayo 2026Turkiga oo ku eedeeyay sirdoonka Israa'iil kicinta mudaharaadyada Iiraan

    

    Xigashada Sawirka, Reuters

    Wasiirka Arrimaha Dibadda Hakan Fidan, wareysi bixiyay 10-kii bishaan Janaayo, ayaa sheegay in rajadii shacabka Iiraan aan la fulin sababo la xiriira cunaqabataynno soo jiray sanado badan, wuxuuna ku dooday in Israa'iil ay u aragto arrintan fursad.

    "Inkasta oo mudaharaadyadani ka dhasheen sababo dhab ah iyo dhibaatooyin qaab-dhismeed, haddana waa run in dibadda looga maamulo laguna kicinayo dadka dowladda, iyadoo ay sameynayaan dad ka soo horjeeda Iiraan."

    "Mossad arrintan ma qariyo; waxay adeegsadaan akoonnadooda internetka, akoonnadooda Twitter-ka, si ay ugu baaqaan shacabka Iiraan inay kacaan oo ka hor yimaadaan nidaamka Iiraan."

    Sii akhri warbixinta

15. 15 Jannaayo 2026Duuliyihii Kenyan-ka ahaa ee meydka Siyaad Barre sida qarsoodiga ku keenay Soomaaliya

    

    Xigashada Sawirka, somtribune

    31 sano ka hor maanta oo kale, Xuseen Maxamed Canshuur iyo Maxamed Aadan (Maxamed Dheere) oo ah laba duuliye oo Kenyaan ah waxaa xafiiskooda ku yaallay garoonka diyaaradaha ee Wilson oo ku dhow caasimadda Nairobi, soo gaartay shaqo aan la filayn, taas oo xasaasi ahayd, halis waynna ay ku hoos duugneyd.

    Xuseen iyo Maxamed oo shaqo maalmeedkooda ku jira waxaa u yimid diblomaasi u dhashay dalka Nayjeeriya, kaas oo ka codsaday in meydka hoggaamiyihii hore ee Soomaaliya, Maxamed Siyaad Barre ay diyaaradooda u soo qaado dalkiisa hooyo si loogu aaso, kaddib markii uu ku geeriyooday Lagos oo uu magangalyo siyaasadeed ku joogay Nayjeeriya isagoo 80 jir ah.

    Sii Akhri warbixinta

16. 15 Jannaayo 2026Trump oo loo sheegay 'dilka ka socday Iiraan uu istaagay'

    

    Xigashada Sawirka, Reuters

    Donald Trump ayaa sheegay in loo sheegay in “dilkii ka socday Iiran uu istaagay”, balse madaxweynaha Maraykanka ma meesha kama uusan saarin suurtagalnimada in tallaabo ciidan laga qaado dalkaas, kaddib tallaabadii adag ee rabshadaha watay ee ay xukuumadda Iiran kula kacday mudaharaadayaasha kasoo horjeeday dowladda.

    Sida ay sheegayaan ururrada u dooda xuquuqda aadanaha, in ka badan 2,400 oo qof ayaa lagu dilay howlgalkii ugu dambeeyay ee ay sameeyeen masuuliyiinta Iiran si ay uga jawaabaan mudaharaadyo guud ahaan dalkaasi ka dhacay.

    Hadallada Trump ee Arbacadii ayaa yimid kaddib markii Maraykanka iyo Ingiriiska ay labaduba yareeyeen tirada shaqaalaha jooga saldhigga cirka ee Al-Udeid ee dalka Qadar. Saraakiil ayaa u sheegay CBS, oo ah bahwadaagta BBC ee Maraykanka, in ka bixitaanka qayb ka mid ah ciidamada Maraykanka uu ahaa “tallaabo taxaddar ah”.

    Hawada Iiran ayaa la xiray ku dhowaad dhammaan duulimaadyada muddo shan saacadood ah habeenkii, iyadoo dhowr shirkadood oo diyaaradeed ay ku dhawaaqeen in ay duulimaadyadooda ka leexin doonaan hawada Iiran.

17. 15 Jannaayo 2026Cirbixiyeenno lagu soo celiyay dhulka kaddib daadgureyntii caafimaad ee ugu horreysay abid ee laga sameeyo saldhigga hawada sare

    

    Xigashada Sawirka, Nasa TV

    Afar cirbixiyeen oo ka soo ambabaxay Saldhigga Caalamiga ah ee Hawada Sare (ISS) bil ka hor waqtigii loo qorsheeyay ayaa dib ugu soo laabtay dhulka, iyaga oo ku degay badda ka baxsan xeebaha California.

    Kooxda oo ka kooban 11 ayaa ka soo degay diyaaradda Dragon Endeavour qiyaastii 01:30 waqtiga maxalliga ah oo ku beegan (09:30 GMT), kaddib safar ku dhowaad 11 saacadood qaatay oo ay dib ugu soo laabteen dhulka.

    Tani waa markii ugu horreysay ee cirbixiyeenno laga soo daadgureeyo saldhigga hawada sare sababo la xiriira arrin caafimaad tan iyo markii ISS lagu wareejiyay meeraha Dhulka sanadkii 1998.

18. 15 Jannaayo 2026Puntland ''Waxaa mamnuuc ah khamaarka (1xBet)''

    

    Xigashada Sawirka, trustpilot

    Dowlad goboleedka Puntland ayaa mamnuucday khamaarka (1XbET) oo sida ay sheegeen dhibaato weyn ku haya bulshada.

    ''Golaha Wasiirada ayaa mar kale ku celiyay in Puntland uu mamnuuc ka yahay Khamaarka (1XBET) oo hore dowladdu go'aan ugasoo saartay, waxaana lagu wageliyay hay'adaha iyo shirkadaha isgaarsiinta in si dhammaystiran loo joojiyo (IXBET) oo dhibaato weyn ku haya bulshadeena'' ayaa lagu yiri qoraal lasoo saaray shirka golaha wasiirada Puntland.

19. 15 Jannaayo 2026Tiro badan oo Alshabaab ah oo la dilay

    

    Xigashada Sawirka, STANDARD DIGITAL

    Ciidamada xoogga dalka Soomaaliya oo kaashanaya ciidamada nabad ilaalinta midowga Afrika ee AUSOM ayaa sheegay inay fuliyeen howlgal culus.

    In ka badan 30 Alshabaab ayaa lagu dilay howlgalka oo ka dhacay Bulungaad ee gobolka Shabeellada Hoose.

20. 15 Jannaayo 2026Khilaaf soo kala dhex galay hogaanka sare ee Taliban

    

    Xigashada Sawirka, Getty Images

    BBC-da ayaa heshay cod sir ah oo laga soo dusiyay madaxa Taliban ee Afgaanistaan, Xibatullah Akhundzada, kaas oo ka digaya in khilaafaadka gudaha ay ridi karaan xukuumaddiisa.

    Baaritaan socday sanad oo ay sameysay BBC Afghan Service, ayaa lagu ogaaday in laba kooxood ay u loolamayaan hoggaanka Taliban.

    Mid ka mid ah ayaa la safan hoggaamiyaha sare iyo siyaasadihiisa adag.

    Midka kale ayaa la sheegay inuu doorbidayo ka qeyb galka caalamiga ah iyo in haweenka la siiyo fursado ballaaran oo waxbarasho ah.

    Afhayeen sare oo u hadlay Taliban ayaa beeniyay in uu jiro kala qeybsanaan balse waxa uu qiray in ay jiraan kala duwanaansho xagga aragtida ah.