Wasiirka Arrimaha Dibadda Israel ayaa Hargeysa booqasho ku tagay

Tebin toos ah

1. 6 Jannaayo 202622 Itoobiyaan ah ayaa ku dhimatay shil baabuur oo ka dhacay gobolka Cafarta

   

   Xigashada Sawirka, Afar Communication Bureau/Facebook

   Ugu yaraan 22 ayaa ku dhimatay 65 kalena way ku dhaawacmeen kaddib markii uu la rogmaday gaari xamuul ah ay ku safrayeen gobolka waqooyiga bari ee Cafarta, sida uu sheegay sarkaal sare oo lagu magacaabo Mohammed Ali Biedo.

   Ku dhawaad 85 muhaajirin ah ayaa ku safrayay wadada bariga dalka markii gaariga uu ku rogmaday magaalada Semera saakay.

   Halka ay u socdeen lama oga balse wadadaas waxay isku xirtaa Itoobiya, Jabuuti iyo ilaa iyo Yemen kadidbna waxaa laga sii aadaa Sacuudiga iyo dalalka kale ee Bariga Dhexe.

   Yemen ayaa ah jidka ugu weyn ee muhaajirinta ka imaanaya Bariga Afrika sii maraan si ay shaqo uga helaan wadamada Khaliijka.

   Beido wuxuu kaloo sheegay in 30 qof oo wax ku noqday shilka in xaaladoodu ay aad u liidato.

   Hay’ada caalamiga ee muhaajirinta IOM waxay ku tilmaantay safarka geeska Afrika ee dalalka Soomaaliya, Jabuuti, Itoobiya iyo Eritrea ilaa Yemen in uu yahay kan mashquulka badan.

   In ka badan 60-kun oo muhaajirin ah ayaa yimid Yemen sanadkii 2024-kii oo kaliya, intooda badan waxay galeen Sacuudiga sida ay IOM sheegtay

2. 6 Jannaayo 2026Nigeria: Sagaal askari ayaa ku dhintay qarax loo dhigay wadada dhinaceeda

   

   Xigashada Sawirka, Getty Images

   Wararka ka imaanaya Nigeria ayaa sheegaya in bam la dhigay wadada dhinaceeda ay ku dhinteen sagaal askari, waxaana ku dhaawacmay tiro kale gobolka Borno.

   Qaraxa ayaa ka dhacay Axadii meel u dhow tuulada Bindundul. Ciidamada ayaa la kulmay qaraxa iyagoo ka soo baxay Maiduguri kuna socotay Damasak. Askarta ilaa iyo hadda kama hadal sida ay wax u dhaceen.

   Goobta uu qaraxa ka dhacay waa meel lagu yaqaan dagaallamayaal taageersan kooxda la baxday dowladda Islaamka. Wararka waxay sheegayaan in kooxaha jihaad doonka ay geliyeen walxaha qaraxa wadada dhinaceeda ka hor inta aysan rasaas ku furin.

   Gaari kuwa gaashaaman ayaa la qarxiyay kaddibna rasaas ayaa lagu bilaabay ciidanka. Dadka deegaanka ayaa ku tilmaamay in falaagada ay weerar gaadmo ah ku qaadeen ciidanka.

   Weerarkan ayaa dhacay iyadoo Golaha Nabadda iyo Amaanka Midowga Afrika ay cusbooneysiiyeen shaqada ciidanka isku dhafka ah iyagoo ku kordhiyay 12 bilood.

   Ciidamada isku dhafka ah ayaa ka kooban dalalka Benin, Cameroon, Chad iyo Nigeria balse Chad ayaa ka baxday sanadkii hore iyadoo xogga saartay siyaasadeeda gudaha.

3. 6 Jannaayo 2026Soomaaliya ayaa kulan degdeg ah isugu yeertay Golaha Nabadda iyo Ammaanka ee Midowga Africa (AU PSC)

   

   Xigashada Sawirka, Somalia foreign ministry

   Wasiirka arrimaha dibadda Soomaaliya, Cabdisalaan Cabdi Cali, ayaa maanta kulan degdeg ah oo khadka internetka ah la yeeshay Golaha Nabadda iyo Ammaanka ee Midowga Africa (AU PSC) kaas oo looga hadlay arrimaha saameynaya midnimada iyo madaxbannaanida dhuleed ee Soomaaliya.

   Kulankan oo ay guddoomineysay wasiirka arrimaha dibadda Jamhuuriyadda Dimuqraadiga Congo, Thérèse Wagner, ayey Soomaaliya ku dalbatay qodobka 7(o) oo dhigaya in ay ka fiirsadaan xaalada marka dal xubin ka ah madaxbannaanidiisa ay khatar gasho.

   Wasiirka arrimaha dibadda Soomaaliya, Cabdisalaan Cabdi Cali, ayaa sheegay in Soomaaliya ay diidan tahay wax ay ku tilmaantay tallaabo hal dhinac ah oo Israel ku dooneyso in ay ku aqoonsato gobolka waqooyiga Soomaaliya.

   Wasiirka ayaa ku celiyay markale in Soomaaliya ay tahay hal dal oo aan lakala qeybin karin iyadoo Somaliland ay ka mid tahay Jamhuuriyadda Federalka Soomaaliya

   Wasiirka waxa uu ka digay in tallaabooyinka xaqiraya madaxbannaanida dhuleed ee Soomaaliya ay khatar ku yihiin nabadda iyo xasiloonida geeska Afrika iyo Badda Cas. Wuxuuna ka dalbaday xubnaha Midowga Afrika in ay xaqiijiyaan midnimada iyo madaxbannaanida dhuleed ee Soomaaliya.

4. 6 Jannaayo 2026Madaxweyne Cirro ayaa aqbalay in uu booqasho ku tago Israel

   

   Xigashada Sawirka, Madaxtooyada SL

   Kulanka dhexmaray madaxweynaha Jamhuuriyadda Iskeed ugu dhawaaqday madaxbannaanida Somaliland iyo wasiirka arrimaha dibadda Israel ayaa looga hadlay iskaashi dhexmara labada dhinac.

   Madaxweyne Cabdiraxmaan Maxamed Cabdullaahi Cirro ayaa uga mahadceliyay Israel go’aanka ay ku aqoonsadeen isagoo ku tilmaamay mid leh saameyn diblomaasiyadeed, mid dhaqaale iyo mid horumarineed.

   Madaxweynaha Somaliland wuxuu kaloo caddeeyey in ay diyaar u yihiin iskaashi iyo wada shaqayn buuxda oo dhinacyo badan leh in ay la yeeshaan Israa’iil.

   Qoraal uu soo dhigay bartiisa Facebook, wasiirka arrimaha dibadda Israel, Gideon Saar, ayuu kaga hadlay ujeedka booqashadiisa.

   “Booqashada waxaan ku gudbineynaa fariin ah in ay naga go’an tahay in aan sii wadno xiriirka nagala dhexeeya Somaliland” ayuu yiri wasiirka oo intaas ku daray.

   “Israel iyada ayaa iska leh go’aanka cidda ay aqoonsaneyso iyo cidda ay la yeelaneyso xiriir diblomaasiyadeed”

   Wasiirka waxa uu sheegay in maanta uu madaxweynaha iyo xubno kale oo sare uu kala hadlay sidii loo sameyn lahaa xiriir buuxa. Wasiirka wuxuu kaloo sheegay madaxweyne uu aqbalay martiqaadka raysalwasaare Netanyahu.

5. 6 Jannaayo 2026Degdeg: Dowladda Soomaaliya oo si adag uga hadashay wasiirkii Israa’iil ee maanta yimid Somlailand

   War ay soo saartay wasaaradda arimaha dibadda ee Soomalaiya ayay ku sheegtay in socdaalkii uu maanta Haregysa ku yimid wasiirka arimaha dibadda Isreal uu ahaa “Mid sharci darro ah”.

   “Waxaan sida ugu adag u cambaareyneynaa duulaanka socdaalka sharci darrada ah ee wasiirka arimaha dibadda ee Israa’iil ku tagay Hargeysa”.

   Dowladda Soomaaliya ayaa sheegtay in tallaabada wasiirku ay "xadgudub ku tahay madaxbanaanida dhuleed iyo midnimada siyaasadeed ee Soomaaliya".

   Waxa ay intaa lagu daray in "tallaabadaani ay ka dhigantahay faragalin aan la aqbali karin oo ku aadan arimo gudaha ee waddan xubin ka ah Qaramada Midoobay".

6. 6 Jannaayo 2026Wasiirka Arrimaha dibadda Isreal ee saakay yimid Hargeysa ayaa dib u laabtay

   

   Xigashada Sawirka, AFP via Getty Images

   Wafdiga Israel ka socday ee uu hoggaaminayay wasiirka arrimaha dibadda, Gideon Saar, ayaa soo gabogabeeyay booqashadii ay ku joogeen Hargeysa.

   Wasiirka arrimaha dibadda Israel, Gideon Saar, ayaa soo gaaray Jamhuuriyadda Iskeed ugu dhawaaqday madaxbannaanida ee Somaliland saakay iyadoo la filayay in ay saaxafada la hadlaan.

   Ilaa iyo hada ma jiraan war ka soo baxay dhinaca Somaliland oo lagu faahfaahinayo waxa laga hadlay iyo ujeedka booqashada

7. 6 Jannaayo 2026Yurub ayaa wajaheysa caqabad la xiriirta Greenland

   

   Xigashada Sawirka, EPA/Shutterstock

   Wasiirka caafimaadka UK ayaa u sheegay barnaamijka Today ee BBC-da ka baxa in raysalwasaare Keir Starmer uu ka fiirsanayo luuqadiisa la xiriirta howlgalka Venezuela.

   Tifaftiraha BBC-da ee Yurub, Katya Adler, ayaa sidoo kale u sheegtay barnaamijka Today in madaxda qaaradda ay wajahayaan caqabad adag oo kordheysa, waxayna isku dayayaan in ay wax ka qabtaan halkii ay ka hor’imaan lahaayeen madaxweynaha Mareykanka Donald Trump.

   “Waxaan ku jirnaa xili siyaasada quwadaha waa weyn sida Shiinaha, Ruushka, Mareykanka iyo gaar ahaan Midowga Yurub ay u muuqato in ay geeska ka daawanayaan” ayey tiri Katya Adler.

   Madaxda Yurub ayaa magaalada Paris kula kulmaya wakiilo ka socda Mareykanka. Isbahaysigan ayaa ka shiraya arimo la xiriira nabadda Ukraine.

   Hanjabaada Trump ee ah in uu qaadanayo Greenland ayaa hareysay shirka madaxda taas oo khatar ku ah madaxbannaanida dhuleed dal ka tirsan Midowga Yurub ama wadan kale oo xubin ka ah NATO.

   Ma jiro hadal wadajir ah oo ka soo baxay dalalka Midowga Yurub kaas oo lagu taageerayo Denmark. Quwada Yurub ee London, Paris iyo Berlin ayaa ka aamusay arrintaas ilaa shalay oo raysalwasaaraha UK sheegay in Denmark iyo Greenland ay go’aanka leeyihiin.

8. 6 Jannaayo 2026Wasiirka Arrimaha dibadda Israel ayaa booqasho ku jooga Hargeysa

   

   Xigashada Sawirka, Reuters

   Wasiirka arrimaha dibadda Israel, Gideon Saar, ayaa soo gaaray Jamhuuriyadda Iskeed ugu dhawaaqday madaxbannaanida ee Somaliland maanta.

   Inta uu joogo dalka waxa wasiirka kulamo la yeelanayaa madaxda dalka oo ugu horeeyay madaxweyne Cabdiraxmaan Maxamed Cabdullaahi Cirro.

   Labada mas’uul ayaa la filayaa in ay qabaan shir jaraa’id maanta sida ay sheegayaan ilo wareedyo ka soo baxay Israel.

   Tan iyo markii ra'iisul wasaaraha Israa'iil Benjamin Netanyahu uu ku dhawaaqay 26-kii Disembar in ay Somaliland u aqoonsatay dal madax-bannaan, waxaa soo baxayay cambaareyn ballaaran oo ka imaaneysay qeybaha bulshada oo ay ku jiraan culumaa'udiinka, waxaana dhacay dibadbaxyo waaweyn oo looga soo horjeedo tallaabadaas.

   Sidoo kale magaalada Hargeysa, ayaa waxaa ka dhacay bannaanbax ballaaran oo lagu taageerayo aqoonsiga Israa'iil ee Somaliland, waxaana lagu qabtay isu soo baxyo lagu taageerayo go'aankaas.

9. 6 Jannaayo 2026Maxay noqon kartaa faa'iidada Somaliland ugu jirta aqoonsiga Israa'iil

   Jimcihii ay bisha Disembar 26ka ahayd ayaa lagu baraarugay ictiraafkii ugu horreeyey ee Somalland ay ka heshay dal awood iyo miisaan kuleh fagaarayaasha caalamka.

   Waxaa baraha bulshada ka soo muuqday ra'iisul wasaaraha Israa'iil, Benjamin Netanyahu, oo saxiixaya sharci uu dalkiisu ku aqoonsanayo Somaliland. Waxaa kale oo isla xilligaas Khadka ku jiray madaxweynaha Somaliland Cabdiraxmaan Cirro oo dhoollo-caddaynaya.

   Wixii intaas ka dambeeyey waxaa iska soo daba dhacayey diidmada iyo aqoonsigaas, mana jirin dal taageero u muujiyey, marka laga reebo Taiwan oo iyada qudheeda sheegata in ay ka go'day Shiinaha, sidaa darteed Israa'iil waxay noqonaysaa dalkii ugu horreeyey ee dal madax banaan u aqoonsada Somaliland.

   Somaliland iyo Israa'iil si furan oo toos ah uma aysan soo bandhigin waxa uu midba kan kale ka doonayo ee xiriirkan iyo aqoonsigan uu ku helayo. Dadka wax indha indheeya waxay aad isha ugu hayaan laba qodob oo Israa'iil dan u ah. Midi waa in ay saldhig ku yeelato badda cas si ay isaga ilaaliso khaatarta kaga imaanaysa Xuutiyiinta. Qodobka labaad oo ah mid aysan Somaliland ilaa hadda ogolaan ah, hase yeeshee jaamacadda carabtu ay sheegtay inuu ku jiro qorshaha Israa'iil ayaa ah in ay hesho dhul la dejiyo falastiiniyiinta ka dib marka la soo musaafuriyo.

   Sii akhri

10. 6 Jannaayo 2026Iran oo loogu baaqay inay tixgeliso xuquuqda dibedbaxayaasha

    Xoghayaha Guud ee Qaramada Midoobay, Antonio Guterres, ayaa Iran ku boorriyay inay ixtiraamto xuquuqda dadka dibedbaxaya.

    Iska horimaadyo rabshado wata ayaa ka socday dalkaas muddo sagaal maalmood ah, kuwaas oo looga soo horjeedo maamul xumada dhaqaale, waxaana la dilay in ka badan toban qof. Guddoomiyaha Baarlamaanka (Mohammed Bagher ayaa Isniintii sheegay in doonista dibedbaxayaasha ay tahay in la dhageysto .

11. 6 Jannaayo 2026Xubno ka tirsan Al-Shabaab oo lagu dilay Gedo

    

    Xigashada Sawirka, Google

    Ciidamada dowladda Federaalka ee Soomaaliya ayaa sheegay, inay howlgal qorsheysan ka fuliyeen aagga Ceel Cilaan, oo qiyaastii 30 kilomitir dhanka bari ka xigta degmada Baardheere ee gobolka Gedo.

    War-saxaafadeed ay soo saareen ayay ku sheegeen, in howlgalka lala beegsaday kooxda Al-Shabaab oo sida ay sheegeen dhibaatooyin ku hayay dadka deegaankaas.

    Intii uu howlgalka socday, waxaa la sheegay in la dilay shan ka tirsan kooxda Al-Shabaab, waxaana la burburiyay guud ahaan joogitaanka kooxda ee aagaas, sida ay ku soo warrameen ciidamada dowladda.

    Howlgalkan ayaa qeyb ka ahaa dedaallada ciidamada dowladda ee sugidda amniga, iyadoo yoolku yahay ilaalinta nolosha iyo hantida shacabka.

12. 6 Jannaayo 2026Yaa iibsada shidaalka Venezuela?

    

    Xigashada Sawirka, Getty Images

    Maduro ayaa marar badan ku eedeeyay Maraykanka in uu isku dayayo in uu xilka ka tuuro si uu u xakameeyo shidaalka Venezuela.

    Markii la weydiiyay waxa ku dhici doona shidaalka haddii Maraykanku qabto maraakiibta shidaal ee ka baxaysa xeebaha Venezuela, Trump waxa uu ku jawaabay: "Waa qaadaneynaa".

    Mas'uuliyiin Maraykan ah ayaa diiday eedda ah in ay doonayaan in ay afgembiyaan Maduro si ay u hantaan kheyraadka ballaaran ee dalka.

    Venezuela waxa ay leedahay keydka shidaal ee ugu weyn adduunka, waxaana iibka shidaalku ka badan yahay kala bar miisaaniyadda dowladda.

    Si kastaba ha ahaatee, shidaalka ay dhoofiso waa xaddidan yahay sababo la xiriira cunaqabataynta, waxaana la rumeysan yahay in la musuqmaasuqo shirkadda shidaalka maamusho.

    Sida laga soo xigtay Hay'adda Macluumaadka Tamarta ee Maraykanka (EIA), sannadka 2023 Venezuela waxa ay soo saartay oo keliya 0.8% shidaalka cayriin ee dunida.

    Waxay hadda dhoofisaa qiyaastii 900,000 foosto maalintii, iyadoo Shiinuhu yahay dalka ugu badan ee ka iibsada.

    Maamulka Trump, oo sheegay in uu xilka ka qaaday Nicolas Maduro kuna xiray xabsi, ayaa sheegay:

    "Venezuela waxa hoggaamin doona Maraykanka ilaa laga gaaro kala-guur ammaan ah."

    Waxaad sidoo kale akhrisan kartaa:

    Waa kuwee dalalka uu Trump beegsan karo kadib Venezuela

    Ku xigeenkii Maduro daacadda u ahayd hadda ma la shaqayn doontaa Trump?

    Intee ayay la egtahay awoodda militariga Venezuela?

    Brooklyn MDC, xabsiga lagu tilmaamay "cadaabta dhulka ku taal" ee lagu hayo Maduro

    Maxaa Maduro indhaha iyo dhegaha looga xiray markii la qabtay

    Maxaynu ka naqaan madaxweyne ku xigeenka Venezuela ee maxkamadda sare u magacawday in ay bedesho Maduro?

    Saddex arrimood oo muhiim ah oo laga diiwaan galiyay qabashadii taariikhiga aheed ee Maduro

13. 6 Jannaayo 2026Kumanaan taageerayaasha Nicolas Maduro oo dalbanaya in la siidaayo hogaamiyahooda

    Kumanaan taageerayaasha Nicolas Maduro ayaa isugu soo baxay caasimadda Venezuela ee Caracas, iyaga oo dalbanaya in laga soo celiyo Mareykanka - halkaas oo uu ka soo muuqday maxkamad iyada oo loo heysto dacwado la xiriira ka ganacsiga daroogada iyo falal argagixisannimo.

    Dhageysiga maxkamadda ee New York, Mr Maduro wuxuu ku adkeystay inuu weli yahay madaxweynaha Venezuela, isaga oo “afduub” ku tilmaamay soo qabashadii ay soo qabteen ciidamada Mareykanka Sabtidii.

    Isaga iyo xaaskiisa, oo sidoo kale la qabtay, ayaa beeniyay eedeymaha loo soo jeediyay.

    Ku xigeenkiisa, haweeneyda la yiraahdo Delcy Rodriguez, ayaa loo dhaariyay madaxweynaha ku-meel gaarka ah ee Venezuela.

14. 6 Jannaayo 2026Intee ayay la egtahay awoodda militariga Venezuela?

    

    Xigashada Sawirka, AFP

    Militeriga Maraykanka aad ayey uga awood badan yihiin kuwa Venezuela. Awooda ciidamada Venezuela lama barbardhigi karo kuwa Mareykanka. Waxaa haysta dhibaatooyin ay ka mid yihiin mushaarka oo ku yar iyo tayada oo hooseysa.

    Wadanka waa uu leeyahay awood difaac oo cirka iyo mid badda ah oo adag. Qalabka militeri uu dalka ku tiisran yahay waxaa sameeyay Shiinaha iyo Ruushka. Wadanka waxa uu awood u leeyahay in uu meel fog ka ogaado weerarada ku soo socda.

    Cunaqabateynta wadanka saarneyd ayaaa keentay in qalabka militeri iyo dayactirkaba yaraadaan, taasna waxay keentay in ay daciifto awoodda radaar-rada.

    Qalabka milateriga waa kuwa inta badan Ruushku sameeyay oo tobannaan sano soo shaqeynayay, tayadooduna waa kuwa liita. Caracas waxay iibsatay ku dhowaad 20 diyaaradaha dagaalka Ruushku sameeyo ee Sukhoi ah. Laga soo bilaabo sanadihii 2000 ilaa iyo hada ayey diyaaradaha soo gadaneysa.

    Sii akhri

15. 6 Jannaayo 2026Rasaas laga soo sheegayo meel u dhow madaxtooyada Venezuela

    

    Xigashada Sawirka, Getty Images

    Waxaa jira warar laga soo xigtay waladda wararka ee AFP oo sheegaya, in rasaas laga maqlay agagaarka aqalka madaxtooyada Venezuela.

    Goobjoogayaal ayaa sheegay in rasaas laga maqlay goobta, halka ilo wareedyo ku dhow dowladda ay sheegeen, in xaaladda la xakameeyay.

    Waxay ilo wareedyadu sheegeen, in diyaarado aan duuliye lahayn oo aan la aqoonsan lagu arkay iyagoo dul heehaabaya Aqalka Miraflores ee ku yaal bartamaha caasimadda Caracas, ka dib ciidamada amniga ayaa ka jawaabay iyaga oo rasaas ku furay abaaro 8-da fiidnimo ee xilliga maxalliga ah.

    Wararkani waxa ay imanayaan saacado yar ka dib markii Madaxweyne Ku Xigeenka Delcy Rodriguez loo dhaaryay madaxweyne ku xiigeenka dalkaas Venezuela.

    Aqalka Madaxtooyada Venezuela, oo si rasmi ah loogu yaqaan Aqalka Miraflores, waa xafiiska ugu weyn ee Madaxweynaha waxaana uu ku yaalaa magaalada Caracas ee caasimadda Venezuela.

    Waxaad sidoo kale akhrisan kartaa:

    Ku xigeenkii Maduro daacadda u ahayd hadda ma la shaqayn doontaa Trump?

    Intee ayay la egtahay awoodda militariga Venezuela?

    Brooklyn MDC, xabsiga lagu tilmaamay "cadaabta dhulka ku taal" ee lagu hayo Maduro

    Maxaa Maduro indhaha iyo dhegaha looga xiray markii la qabtay

    Maxaynu ka naqaan madaxweyne ku xigeenka Venezuela ee maxkamadda sare u magacawday in ay bedesho Maduro?

    Saddex arrimood oo muhiim ah oo laga diiwaan galiyay qabashadii taariikhiga aheed ee Maduro

16. 6 Jannaayo 2026Dalal Carbeed oo wadajir u tagaeeray Soomaaliya

    

    Xigashada Sawirka, Egyptian Ministry of Foreign Affairs

    Kulan ay iskugu yimaadeen wasiirada Arimaha DIbadda ee dalalka Sacuudiga iyo Masar ayeey kaga wadahleen qoddoba ay ka mid ayihiin arimaha Soomaaliya.

    Wasiirrada ayaa xaqiijiyeen in gebi ahaanba la diiday tallaabooyin kasta oo hal dhinac ah ah oo taabanaya madax-bannaanida Soomaaliya, gaar ahaan aqoonsiga Israa’iil ee Soomaliland. Taas oo xadgudub bareer ah ku ah beey yiraahdeen mabaadi’da sharciga caalamiga ah iyo heshiiska Qaramada Midoobay, isla markaana wiiqaya aasaaska nabadda iyo amniga gobolkaas muhiimka ah.

    Dhinacyadu waxay ku nuuxnuuxsadeen mowqifka adag ee Masar iyo Sucuudiga ee ay ku taageerayaan midnimada, madaxbannaanida iyo amniga dhulka Soomaaliyeed, waxayna kasoo hor jeesteen isku dayo kasta oo lagu doonayo in lagu kala qaybiyo Soomaaliya ama lagu nusqaamiyo dawladnimadeeda.

    Kulanka ayaa sidoo kale looga hadlay arimo ay kamid yihiin Marinka Gaza iyo Yemen.

    Dhanka kale, madaxweynaha Turkiga, Recep Tayyip Erdogan, ayaa Axaddii sheegay in Türkiye ay "si dhow" ula socoto horumarada ka socda Yemen iyo Soomaaliya, kadib markii uu khadka telefoonka kula hadlay dhaxal sugaha Sacuudiga.

    Waxaa uu Erdogan dhanka kale ku nuuxnuuxsaday muhiimadda ay leedahay xasiloonida ilaalinta midnimada dhuleed ee labada dal.

    Sida laga soo xigtay Agaasimaha Isgaarsiinta ee Turkiga, intii wada hadalku socday, Erdogan iyo Maxamed bin Salman, waxay ka wada hadleen xiriirka laba geesoodka ah iyo arrimaha gobolka iyo caalamka.

    Erdogan wuxuu sheegay in Türkiye ay diyaar u tahay inay gacan ka geysato dadaallada la isugu keenayo dhinacyada is haya ee Yemen.

    Wuxuu sidoo kale sheegay, in Ankara ay hiigsaneyso inay xoojiso iskaashiga u dhexeeya Türkiga iyo Sacuudi Carabiya, iyadoo la qaadayo tallaabooyin dheeraad ah maalmaha soo socda.

    Isagoo ka digaya in xaaladda bini'aadantinimo ee Gaza ay sii xumaaneyso marka la gaaro xilliga qaboobaha, Erdogan wuxuu intaas ku daray in Türkiga uu sii wadi doono ka shaqeynta xabad joojin waarta iyo dib u dhiska goobaha dagaalku saameeyay.

    Waxaad sidoo kale akhrisan kartaa:

    Warar dheeraad ah oo ka soo kordhay taariikhda la bilaabi doono qodista shidaalka Soomaaliya iyo maraakiibta qodaysa

    Madaxweynayaasha Turkiga iyo Soomaaliya oo ku dhawaaqay xilliga la bilaabayo qodista shidaalka Soomaaliya

    Baaritaan ku aa qaabka uu u dhintay taliyihii ciidnka Liibiya oo bilowday

17. 6 Jannaayo 2026Muxuu yahay deegaanka muhiimka ah ee al Shabab laga saaray?

    Ciidamada dowladda Soomaaliya ayaa qabsaday deegaanka Jilib-marka oo Al-shabaab ay ka talinayeen muddo aad u dheer. Deegaanka Jilib-Marka waxa uu u dhexeeya Muqdisho iyo magaalada Marka ee gobolka Shabeellaha Hoose.

    Milateriga Soomaaliya oo ay taageerayaan ciidamada hay'adda sirdoonka iyo kuwa qabaa'ilka deegaanka ayaa sii wada in Al-Shabaab laga saaro dhul hor leh oo ku yaala waddada xeebta ah ee isku xirta Muqdisho iyo Marka.

    Deegaankii ugu dambeeyay ee hawlgalka loo bixiyay Seefta Qarsoon looga saaray Al-Shabaab waxa uu ahaa Jilib-Marka oo muddo toban sano ka badan ay gacanta ku hayeen kooxdaasi.

    Hawgalkan loogu magac daray Seefta Qarsoon waxa uu dhawrkii todobaad ee ugu dambeeyay ka socday deegaannada xeebta ah ee u dhaxeeya magaala madaxda Muqdisho iyo magaalada Marka, waxana horey Al-Shabaab looga saaray deegaannada Gandershe iyo Dhanaane.

    BB-da ayaa la xiriirtay wasiirka amniga dawlad goboleedka Koonfur Galbeed, Xasan Cabdiqaadir, oo sharaxay sida uu u dhacay howgalkaaas.

    Sii akhri

18. 6 Jannaayo 2026Madaxweynaha ku-meel gaarka ah ee Venezuela oo la dhaariyay

    

    Xigashada Sawirka, Reuters

    Delcy Rodríguez ayaa loo dhaariyay madaxweynaha ku- meel gaarka ah ee Venezuela kadib kulan baarlamaan oo ku bilowday dalabaad ah in xabsiga Mareykanka laga siidaayo hoggaamiyihii xilka laga tuuray, Nicolás Maduro.

    Rodríguez, oo 56 jir ah, oo ahayd madaxweyne ku xigeenka tan iyo sanadkii 2018-kii, ayaa sheegtay inay ka xun tahay waxa ay ugu yeertay "afduubka" Maduro iyo xaaskiisa, Cilia Flores, kuwaas oo ay qabteen ciidamada Maraykanka kadib weerar dhacay habeenimadii Sabtida.

    Maduro oo la so taagat maxkamadda, ayaa waxaa uu ku adkaystay inuu weli yahay madaxweynaha Venezuela, isagoo beeniyay afarta dacwadood ee ah ka ganacsiga daroogada iyo argagixisannimada.

    Dhanka kale, Maraykanku waxa uu la kulmay dhaleecayn xooggan oo Qaramada Midoobay ah, laakiin safiirka Maraykanka ayaa ku jawaabay in kaydka tamarta ugu weyn adduunka aan gacanta loo gelin karin hoggaamiye sharci darro ah, oo "ka fog cadaaladda."

    Waxaad sidoo kale akhrisan kartaa:

    Ku xigeenkii Maduro daacadda u ahayd hadda ma la shaqayn doontaa Trump?

    Intee ayay la egtahay awoodda militariga Venezuela?

    Brooklyn MDC, xabsiga lagu tilmaamay "cadaabta dhulka ku taal" ee lagu hayo Maduro

    Maxaa Maduro indhaha iyo dhegaha looga xiray markii la qabtay

    Maxaynu ka naqaan madaxweyne ku xigeenka Venezuela ee maxkamadda sare u magacawday in ay bedesho Maduro?

    Saddex arrimood oo muhiim ah oo laga diiwaan galiyay qabashadii taariikhiga aheed ee Maduro

19. 6 Jannaayo 2026Maduro oo maxkamadda ka xaqiijiyay inuusan wax dembi ah gelin

    Maduro ayaa maxkamada New York u sheegay inuu weli yahay hogaamiyaha Venezuela, sida ay sheegtay CBS News.

    "Ma ihi wax dambi ah. Ma ihi dambiile. Waxaan ahay nin hufan, madaxweyne ka ah dalkayga," ayuu ku yiri turjumaan hadlayay.

20. 6 Jannaayo 2026Maxaa ka jira in Somaliland ay joojisay duulimaadkii Air Djibouti ku tagi jirtay magaalooyinkeeda

    

    Xigashada Sawirka, Cardiff Aviation

    Warar BBC-du ay heshay ayaa sheegaya in jamhuuriyadda iskeed madax bannaanida ugu dhawaaqaday ee Somaliland ay ku war-gelisay shirkadda diyaaradaha dalka Jabuuti ee Air Djibouti in ay joojiso duulimaadka ay ku tagto Somaliland isla markaana waqti kama dambeys ah u qabatay.

    Ilo xog ogaal ah ayaa BBC-da u xaqiijiyay in Arbacada soo aaddan oo bishaan Jannaayo ku beegantahay toddobo uu ku ekyahay waqtiga loo qabtay duulimaadka Air Djibouti ee Somalilnd tagi jiray.

    Warku wuxuu intaasi ku darayaa in shirkaddu ay arrintaan war ka soo saari doonto. Air Djibouti ayaa toddobaadkii Somaliland ku tagi jirtay dhowr duulimaad.

    Inkasta oo aysan weli Somaliland iyo Air Djibouti-ba aaney si faahfaahsan uga hadlin arrintaan, haddan waxaa la fahamsanyahay in uu jiro khilaaf u dhaxeeya Jabuuti iyo Somaliland kaas oo salka ku haya aqoonsigii Israa’iil siisay Somaliland oo Jabuuti ay ka mid noqtay dalalka ka horyimid.

    Jamhuuriyadda Jabuuti iyo dalal kale ayaa tallaabada Israa’iil ka horyimid iyagoo taageero u muujiyay dowladda federaalka Soomaaliya iyo guudahaan madaxbannaanida dhuleed ee Soomaaliya.

    Sidoo kale khilaafku waxaa uu keenay in Somaliland dhawaan ay u yeerato wakiilkii u joogay dalka Jabuuti.