Ma raaci lahayd diyaarad doonaysa inay ku miisaanto

Shirkadda diyaaradaha ee Finnair ayaa ku dhawaaqday in ay miisaami doonto rakaabka ka hor inta aysan raacin diyaaradahooda.

Horaantii isbuucaan, shirkaddu waxay ku dhawaaqday in ay bilaabi doonto miisaamidda rakaabka. Bayaan ay soo saartay, afhayeen u hadashay shirkadda diyaaradaha Kaisa Tikkanen ayaa tiri: "miisaamiddu waxay ka billaabatay garoonka diyaaradaha ee Helsinki Isniintii toddobaadkan”.

Bayaan lagu daabacay shabakadda internet-ka ee shirkadda ayaa lagu yiri: “Finnair waxay aruurin doontaa xog, iyada oo ku miisaamaysa macaamiisha iyo boorsooyinka ay sitaan albaabka hore. Miisaanka ayaa ah mid ikhtiyaari ah oo qarsoodi ah, xogtana waxaa loo isticmaali doonaa oo kaliya si kor loogu qaado xisaabinta dheelitirka diyaaradaha ee Finnair”.

"Ilaa hadda, in ka badan 500 oo macaamiil aan lagu qasbin ah ayaa ka qaybqaatay miisaanidda."

Shirkaddu waxay sheegtay in ka shaqaynta culayska la isku daray ee diyaarada oo ay ku jiraan "miisaanka shidaalka, boorsooyinka iyo xamuulka, cuntada dusheeda, haamaha biyaha, iyo dabcan, macaamiisha" ay qayb ka tahay in safarku ahaado mid nabad ah.

Rakaabka oo aan lagu qasbin waxaa lala miisaami doonaa shandaddooda, oo kaliya wakiilka adeegga macaamiisha ee ka shaqeeya qaybta miisaanka oo kaliya ayaa ogaan doona miisaanka qofka.

“Xogta la ururiyay sinaba looguma xidhi doono xogta shakhsiga ee rakaabka,” ayay tidhi shirkaddu.

Iyadoo shirkaduhu ay og yihiin miisaanka dhammaan dhinacyada kale, miisaanka rakaabka iyo boorsooyinka ay wataan waxaa lagu xisaabiyaa iyadoo la isticmaalayo celceliska miisaanka ay bixiso Hay'adda Duulista Rayidka (CAA).

Ikhtiyaarka kale waa in shirkadaha diyaaraduhu ay isticmaalaan cabbiradooda ama miisaanka caadiga ah ee ay qeexday Hay'adda Badbaadada Duulimaadyada Yurub EASA.

Laga soo bilaabo 2018, Finnair waxay isticmaashay celceliska miisaannada lagu go'aamiyay cabbirkeeda, laakiin mas'uuliyiintu waxay u baahan yihiin in tirooyinkan la cusbooneysiiyo shantii sanoba mar.

Waxa ay sheegtay in la gaaray waqtigii la uruurin lahaa xog cusub si kor loogu qaado xisaabinta dheelitirka diyaaradda.

"Qiyaastii hore ee shan sano ka hor, tiro wanaagsan oo mutadawiciin ah ayaa doonayey in ay ka qaybqaataan miisaanka, waxaana rajeyneynaa inaan helno muunad wanaagsan oo mutadawiciin ah, ganacsi iyo safarro waqti firaaqo ah, sidoo kale markan, si aan u helno xogta ugu saxsan. macluumaadka suurtogalka ah ee xisaabinta dheelitirka muhiimka ah," ayuu yiri Satu Munnukka, madaxa nidaamyada dhulka ee shirkadda Finnair.

Arrintani waxay hadal hayn ka dhalisay baraha bulshada, iyada oo dadka qaar ay leeyihiin waxay u muuqataa arrin cayil nacayb ah ama lagu takoori doono dadka miisaanka culus.

Bulshooyinka ku dhaqan dalalka Yurub iyo guud ahaan galbeedka ayaa ceeb u arka miisaanka culus oo lala xiriiriyo caafimaad darro iyo cunta cunis badan.

Shirkaddani ma aha tii ugu horreysay ee soo jeedisa qorshe lagu miisaamayo rakaabka diyaaradaha, shirkadda diyaaradaha ee Korean Air ayaa bishii Agoosto ee sannadkii tagay ku dhawaaqday in ay miisaami doonto rakaabka raacaya diyaaradaheeda ka hor safarka.

Si la mid ah Finnair, shirkadda Korean air waxay sheegtay “rakaabka iyo shandadaha labadaba waxaa loo miisaami doonaa si qarsoodi ah, waxaana xogta markaas lala wadaagi doonaa wasaaradda dhulka, kaabayaasha dhaqaalaha iyo gaadiidka ee dalka”.

Haddii rakaabku doorbido inaan la ururin xogta miisaankooda, Korean Air waxay xaqiijinaysaa in ay ka bixi karaan axdigaas iyagoo ogaysiinaya xubin shaqaale ah.

In kasta oo qaar ka mid ah dadka safarka ah ay la yaabi karaan in la weydiiyo in ay ku istaagaan miisaan, go'aankan ma aha mid ay sameeyeen shirkadaha diyaaradaha - inta badan waxaa soo saaray maamulayaasha diyaaradaha ee dawladda.

Horraantii 2023, Air New Zealand waxay fulisay barnaamij kan la mid ah iyada oo la miisaamay qaar ka mid ah macaamiisha u duulayey meelaha caalamiga ah, sida duullimaadka dheer ee u dhexeeya Auckland iyo New york.

"Waan ognahay in ku joogsiga miisaanku ay tahay wax adag. Waxaan rabnaa in aan u xaqiijino macaamiisheena in aysan jirin wax muuqaal ah oo muuqda meelna. Qofna ma arki karo miisaankaaga, xitaa annaga, "wakiil ka socda Air NZ, gudbiyaha qaranka ee dalka, ayaa yiri wakhtigaas.

Marka xogta la ururiyo, waxay ka caawisaa shirkadaha diyaaradaha in ay go'aan ka gaadhaan baahida shidaalka iyo dheelli tirka miisaanka diyaaradda.