Soomaali iyo Ajaanib hor leh oo ku lug yeeshay khiyaamada wax-isdaba marinta Minnesota

Xeer-ilaaliyeyaasha federaalka Maraykanka ayaa Khamiistii ku dhawaaqay eedeymo cusub oo la xiriira fadeexadda khiyaanada ee sii fidaysa ee Minnesota, markan waxaa ku lug leh laba nin oo deggan Philadelphia kuwaas oo lagu eedeeyay inay u safreen Minneapolis kadib markii qof ay saaxiib yihiin uu u sheegay in barnaamijyada ay dawladdu maalgeliso halkaas ay yihiin "fursad wanaagsan oo lacag lagu sameeyo."

Anthony Waddell Jefferson iyo Lester Brown waxaa lagu eedeeyay inay malaayiin doolar ka lunsadeen barnaamijyo ay maalgeliso dawladda federaalka oo ay maamulaan mas'uuliyiinta Minnesota, kuwaas oo loogu talagalay inay caawiyaan dadka naafada ah iyo kuwa la tacaalaya balwadda.

Si ka duwan sida dad badan oo horey ugu lug yeeshay fadeexadda weyn ee khiyaanada ee gobolka, labadan nin uma muuqdaan inay xiriir la leeyihiin bulshada ballaaran ee Soomaaliyeed ee Minnesota. Xeer-ilaaliyeyaashu waxa ay sheegeen inaysan u muuqan inay wax xiriir ah la leeyihiin Minnesota haba yaraatee.

"Minnesota waxay noqotay meel soo jiidata khiyaanoolayaasha, ilaa heer la abuuray warshad ee lagu khiyaano ganacsiga dalxiiska — dad ayaa u imaanaya gobolkeenna oo keliya si ay uga faa'iideystaan una khiyaaneeyaan barnaamijyadiisa," ayuu yiri Kaaliyaha Xeer-ilaaliyaha Mareykanka Joseph Thompson, oo soo oogay dacwadaha cusub.

"Tani waa xaqiiqo aad u argagax badan oo dhammaan reer Minnesota ay tahay inay fahmaan." ayuu yiri.

Fadlan halkan riix oo ku soo biir janalka WhatsApp ee BBC Somali si aad u hesho wararkii ugu dambeeyey ee caalamka, iyo kuwa gobolka

Dukumentiyada maxkamaddu waxa ay sheegayaan in raggu ay gudbiyeen ilaa $3.5 milyan oo ah "kharashaad been abuur ah ama la buunbuuniyay" si ay uga helaan lacag celin gargaarka caafimaadka, kadib markii ay sameeyeen shirkad loogu talagalay bixinta guryo iyo adeegyo kale oo loogu talagalay dadka u qalma barnaamijka. Waxaa lagu eedeeyay inay khiyaaneeyeen barnaamijka guryeynta ee Minnesota inkastoo ay "ku noolaayeen dhinaca kale ee dalka, isla markaana aysan wax shabakad ah ama xiriir la lahayn Minnesota ama bulshooyinkeeda".

Jefferson iyo Brown waxay ka mid ahaayeen lix qof oo Khamiistii lagu soo oogay dacwado khiyaano.

Dadka kale ayaa kala ah Abdinajib Xasan, Xasan Axmed Xuseen, Kaamil Cumar Saalax iyo Caasha Farxaan Xasan.

Abdinajib Xasan ayaa lagu eedeeyay inuu diiwaangeliyay shirkad loogu talagalay in hantida gobolka loogu gudbiyo qoysaska carruurta qaba autism-ka, isaga oo qaar ka mid ah $6 milyan oo uu barnaamijka ka qaatay ku iibsaday gaari xamuul ah oo nooca Freightliner-ah.

Xasan Axmed Xuseen iyo Axmed Cabdirashiid Maxamed ayaa agu eedeeyay inay jeebka ku shubteen $750,000 oo loogu talagalay caawinta dadka qaata gargaarka caafimaadka si ay u helaan guryo, ka dibna lacagtaas u adeegsadeen safarro caalami ah.

Kaamil Cumar Saalax ayaa lagu eedeeyay inuu gudbiyay $1.4 milyan oo ah dacwooyin khiyaano ah oo la xiriira qorshe khiyaano oo adeegyada xasillinta guryaha ah. Waxaa la sheegay inuu $150,000 ku bixiyay lacagaha dijitaalka ah (crypto) isla markaana uu u baxsaday Amsterdam kadib markii loo diray amar maxkamadeed.

Caasha Farxaan Xuseen oo horey loogu soo oogay dacwado badan oo khiyaano ah, ayaa Khamiistii qiratay dambiga hal qodob oo khiyaano lacag xawilid ah.

Xeer-ilaaliyeyaashu waxa ay sheegeen Khamiistii inay baarayaan ku dhowaad $18 bilyan oo lagu bixiyay barnaamijyada bulshada ee Minnesota tan iyo 2018.

CBS News ayaa waydiisay inta ay dhan yihiin lacagaha ay aaminsan yihiin inay khiyaamo ahayd, Thompson wuxuu soo jeediyay in kala bar ama ka badan $18 bilyan ay noqon karto khiyaano.