මිලී බොබී බ්‍රවුන්, ජේක් බොන්ජියෝවි සමග විවාහ ගිවිසගැනීම නිවේදනය කරයි

ස්ට්‍රේන්ජර් තින්ග්ස් (Stranger Things) කතා මාලාවෙන් ප්‍රසිද්ධියට පැමිණි නිළි මිලී බොබී බ්‍රවුන්, වසර දෙකහමාරක සිට ඇගේ පෙම්වතා වන ජේක් බොන්ජියෝවි සමග විවාහ ගිවිසගැනීම ප්‍රකාශයට පත්කළා ය.

ඇය බොන්ජියෝවි සමග සිටින ඡායාරූපයක් පලකළ 19 හැවිරිදි තාරකාව ටේලර් ස්විෆ්ට්ගේ 'ලවර්' නම් ගීයේ පද පෙළක් ද සටහන් කර තිබුණි. එහි දළ අදහස වූයේ "මම ඔබට ගිම්හානයන් තුනක් පුරා පෙම්කර තිබේ. සොඳුර, මට දැන් සියල්ල ලබාගන්නට අවශ්‍ය ය" යන්න යි. එය එනමින්ම පළවූ ඇගේ හත්වන ස්ටුඩියෝ ඇල්බමයෙන් උපුටාගෙන තිබුණි.

ඇගේ ඇඟිල්ලෙහි විවාහ ගිවිසගැනීමේ මුදුවක් පැළඳ තිබෙණු ඡායාරූපයේ දැක්වෙන අතර, බොබී ඇගේ පෝස්ටුව අවසානයට සුදු පැහැ හාට් ඉමොජියක් ද එක්කර තිබුණි.

විසි හැවිරිදි බොන්ජියෝවි නළුවෙකි. ඔහු ජනාදරය දිනූ ගායක ජෝන් බොන් ජෝවිගේ පුත්‍රයා ද වේ.

ගායිකා පික්සී ලොට්, බ්‍රවුන්ගේ පෝස්ටුවෙහි කමෙන්ට් කළ තරු අතර සිටියි. ඇය, "ඕ මයි ගෝඩ්!!! සුබ පැතුම් ඔය දෙන්නට. හරිම සතුටු යි ඊඊඊඊඊ," යනුවෙන් සඳහන්කර තිබුණා ය.

බොන්ජියෝවි ද ඔහුගේ පිටුවෙහි මෙම පුවත බෙදාගනිමින්, යුවළගේ ඡායාරූප දෙකක් සමග සරලවම "සදාකාලයටම" යනුවෙන් සටහනක් තබා තිබුණි.

මෙම නිවේදනය නිකුත්වුණේ, යුවළ විවාහ ගිවිසගෙන ඇතැයි සති කීපයක් තිස්සේ සමාජ මාධ්‍යයන්හි ඉදිරිපත්වූ සැක පළකිරීම්වලින් පසුව ය.

2021 ජුනි මාසයේ දී බ්‍රවුන් ඇගේ බොන්ජියෝවිගේ ඡායාරූපයක් ඉන්ස්ටග්‍රෑම්හි පළකරමින් ඇගේ ෆලෝවර්ස්ලා වෙත ඔහු හඳුන්වා දුන්නා ය. පසුව, යුවළ විසින් ඔවුන් පෙම්වතුන්බව තහවුරු කෙරිණි.

ජනවාරියේ දී පලකළ තවත් ඉන්ස්ටග්‍රෑම් පෝස්ටුවක් මඟින් බ්‍රවුන්, බොන්ජියෝවි ඇගේ "ජීවන සගයා" ලෙස හැඳින්වූ අතර යුවළ එක්ව සිටිනු දැක්වෙන ඡායාරූප මාලාවක් ද පලකළා ය.

මේ ඉංග්‍රීසි නිළිය ජනප්‍රියත්වයට පත්වූයේ නෙට්ෆ්ලික්ස් කතා මාලාවක් වන ස්ට්‍රේන්ජර් තින්ග්ස්හි ළමා තරුවක් ලෙසිනි. එම මාලාවේ පස්වන සීසන් එක ඉදිරියේ දී නිකුත්වීමට නියමිත අතර, එය එහි අවසාන සීසන් එක ද වෙයි.

කෙසේ නමුත්, ස්ට්‍රේන්ජර් තින්ග්ස්හි පූර්විකාවක් ලන්ඩනයේ වෙස්ට් එන්ඩ්හි වේදිකාගත කිරීමට නියමිත වන අතර, නෙට්ෆ්ලික්ස් (Netflix) විසින් එහි සජීවිකරණ රූපවාහිනී කතා මාලාවක් ද නිවේදනයකර ඇත.

මෑතක දී, නව යෞවනයන් නිසි වයසට පත්වීම පිළිබඳව නිපදවෙන 'රොක්බොටම්' නම් චිත්‍රපටය සඳහා බොන්ජියෝවි ඔහු මෙතෙක් ලද දෙවන ප්‍රධාන චරිතය ලැබීය.