ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
ECG වාර්තාව හොඳ වූ පමණින් ඔබේ හදවත නිරෝගී බව කිව හැකි ද?
- Author, ඉම්රාන් කුරේෂි
- Role, බීබීසී හින්දි
නාග්පූර්හි ස්නායු ශල්ය වෛද්ය චන්ද්රශේකර් පක්මෝඩේ පසුගිය සතියේදී මිය ගියේ රෝහලට රැගෙන යාමටත් පෙර ය.
53 හැවිරිදි වියේ පසු වෙද්දී සිදුවූ ඔහුගේ හදිසි වියෝව පිළිබඳ ශෝකය පළ කළ පිරිස අතර රෝගීන් සහ වෛද්ය ක්ෂේත්රයේ පුද්ගලයින් විශාල පිරිසක් වූහ.
මධ්යම රජයේ අමාත්ය නිතින් ගඩ්කාරි සහ මහාරාෂ්ට්ර ප්රාන්තයේ මහ ඇමති දේවේන්ද්ර ෆඩ්නාවිස් ද ඔහුගේ අභාවය පිළිබඳ ශෝකය පළ කළහ.
වෛද්ය පක්මෝඩේ දින තුනකට පෙර ECG හෙවත් විද්යුත් හෘද රෝග පරීක්ෂණයක් සිදු කර තිබූ අතර ඉන් තහවුරු වූයේ, ඔහුගේ හෘදයේ ක්රියාකාරීත්වය සාමාන්ය තත්ත්වයක පැවති බව ය.
කෙසේ වෙතත්, හෘද රෝග විශේෂඥයන් පවසන්නේ ECG පරීක්ෂණයේ නිරවද්යතාව පමණක් හෘදය ආශ්රිත රෝග හඳුනා ගැනීමට ප්රමාණවත් නොවන බව ය.
ECG පරීක්ෂණයක් යනු හදවතේ විද්යුත් ක්රියාකාරිත්වය වාර්තා කරන සරල පරීක්ෂණයකි. මෙය වෛද්යවරුන්ට හදවතේ රිද්මය සහ විද්යුත් සංඥා පරීක්ෂා කිරීමට ඉඩ සලසයි.
ECG පරීක්ෂණයේදී "ඉලෙක්ට්රෝඩ්" ලෙස හැඳින්වෙන සංවේදකයක් පපුව සහ අත් වටා තබන අතර ඒවාගේ උපකාරයෙන් හෘද ස්පන්ධනයෙන් ජනනය වන විද්යුත් සංඥාව හඳුනාගත හැක.
'ECG යනු එක ම මාර්ගය නොවේ'
නාග්පූර්හි නියුරෝන් රෝහලේදී වෛද්ය අනිල් ජවහරානි වෛද්ය පක්මෝඩේට ප්රතිකාර කළේ ය.
වෛද්ය ජවහරානි හෘද රෝග විශේෂඥයෙකු වන අතර වෛද්ය පක්මෝඩේගේ උපදේශකවරයෙකු ද විය. ඔහුගේ මරණයට පෙර වෛද්ය ෆුල්වානි තම මිතුරා වූ වෛද්ය පක්මෝඩ් සමඟ රාත්රී ආහාරය ලබාගෙන තිබිණි.
"හෘද රෝග හඳුනා ගැනීමට ඇති එක ම ක්රමය ECG එක නෙමෙයි. ඒක ගැන තීරණය කරන්න ECG එකකට අඩු ම තරමේ සියයට 10ක වත් හැකියාවක් නැහැ," ඔහු බීබීසී හින්දි සේවයට පැවසුවේ ය.
ECG පරීක්ෂණයක් යනු හෘද රෝග පිළිබඳ මුලික හඳුනාගැනීම සඳහා අත්යවශ්ය කොටසකි. මෙම ක්රියාවලිය මගින් හෘදයේ මූලික ව්යුහය සහ විද්යුත් සන්නායක පද්ධතිය සමාලෝචනය කරයි.
වෛද්යවරයෙකුට හෘද රෝගයක් පිළිබඳ සැකයක් ඇති වුවහොත්, ECG පරීක්ෂණයක් සිදු කිරීම සඳහා අවශ්ය උපදෙස් ලබා දිය හැක. ECG පරීක්ෂණය මගින් හෘදයේ සාමාන්ය පරාසය පෙන්වා දී, හෘදය ආශ්රිතව ගැටලුවක් තිබේ ද යන්න තීරණය කිරීමට උපකාරී වේ.
නාග්පූර්හි ශ්රී ක්රිෂ්ණා රෝහලේ හෘද රෝග විශේෂඥ සහ අධ්යක්ෂ වෛද්ය මහේෂ් ෆුල්වානි බීබීසී හින්දි සේවයට පැවසුවේ, "සාමාන්ය ECG එකක් කියන්නේ පුද්ගලයෙක් පැය කිහිපයක්, මාස හෝ අවුරුදු ගණනක් ජීවත් වන බවට ලබා දෙන සහතිකයක් නෙමෙයි. හදවත කියන්නේ නිරන්තරයෙන් වෙනස් වන ඉන්ද්රියක්."
එහි ඇතුළත ක්රියාකාරකම් රැසක් සිදුවෙමින් පවතින අතර, ඒවා තක්සේරු කිරීමට භාවිත කරන එක් ක්රමයක් ලෙස ECG පරීක්ෂණය හැඳින්වේ.
වෛද්ය පක්මෝඩේට මෙවැන්නක් සිදුවූයේ ඇයි?
වෛද්ය පක්මෝඩේට මෙය සිදු වූයේ කෙසේ ද සහ ඇයි? මේවා නිතර අසන ප්රශ්න වේ. එම ප්රශ්නවලට වැඩි වශයෙන් පිළිතුරු ලබා දී ඇත්තේ ඔහුගේ පෞද්ගලික හෘද රෝග විශේෂඥ වෛද්ය ජවහරානි ය.
"ඔහු ඉතා කඩිසර පුද්ගලයෙක්. ඔහු උදේ පහට අවදි වෙනවා. ඔහු ජිම් එකට යනවා, බයිසිකලයක් පදිනවා නැතිනම් ට්රෙඩ්මිල් එක පාවිච්චි කරනවා. ඔහු උදේ 06.00 විතර වෙනකොට රෝහලට ගිහින් රෝගීන් බැලීම ආරම්භ කරනවා,'' වෛද්ය ජවහරනි පැවසුවා ය.
ඔහු උදෑසන 9 සිට පස්වරු 3 දක්වා ශල්යාගාරයේ සිටියි. දිවා ආහාරයෙන් පසු, ඔහු සවස 5.00ට නැවත බාහිර රෝගී අංශයට පැමිණෙයි.
රෑ 11 විතර වෙනකම් ඔහු බාහිර රෝගී අංශයේ රෝගීන් 150කට වැඩිය බලනවා. රෑ 11ත් 12ත් අතර වෙලාවක රාත්රී ආහාරය අරගෙන නින්දට යන්න තමයි ඔහු පුරුදු වෙලා හිටියේ. දශක දෙකකට වැඩි කාලයක් පුරාවට ඔහුගේ වෘත්තීය ජීවිතයේ ජීවන රටාව වුණේ මේක තමයි,'' ඔහු පැවසුවේ ය.
''ඔහු රෝගීන්ට දෙවියෙක් වගෙයි. නිතර ම වඩා හොඳින් වැඩ කිරීම ම කෙනෙකුට පීඩනය ඇති වන්න ප්රමාණවත්. එවැනි පීඩනයට හේතුව ආතතිය යි.''
වෛද්ය ෆුල්වානි වෛද්ය පක්මෝඩිගේ පෞරුෂයේ වෙනත් පැත්තක් පිළිබඳව ද සඳහන් කළේ ය.
"දිනපතා ඇති වන ආතතිය කාලයත් සමග එකතු වෙනවා. ඔහු ඉතා හොඳ, හිතවත් පුද්ගලයෙකු වූ නිසා, ඔහු වෙත රෝගියෙකු පරීක්ෂා කිරීමට යොමු කරන තම සහකාර වෛද්යවරුන්ගේ ඉල්ලීම් කිසිවිටෙකත් ප්රතික්ෂේප කළේ නැහැ. ඔහු සියලු ම වැඩ භාර ගත්තා. ඔහු අඩුවෙන් නිදාගෙන වැඩියෙන් වැඩ කළා.''
''ඇත්තට ම ඔහු ඕනෑවට වඩා වැඩ කළා. ඔහු තම රැකියාවට කැපවී සිටියා. වෛද්ය පක්මෝඩේ මිය යා යුතු නැහැ. ඔහුට ECG එකක් කළා කියලාවත් දින තුනකට පෙර පපුවේ අමාරුවක් තිබුණා කියලාවත් ඔහු කිසි ම වෙලාවක මට කිව්වේ නැහැ."
හෘද රෝගයක් ඇති දැයි පරීක්ෂා කරන්නේ කෙසේ ද?
වෛද්ය පක්මෝඩේ තම ECG වාර්තාව පිළිබඳ වෛද්ය ජවහරානි සමග සාකච්ඡා නොකළේ ය. කෙසේ වෙතත්, ඔහු රෝගියෙකුගේ සෞඛ්යය තත්ත්වය සම්බන්ධයෙන් ඇය සමග සාකච්ඡා කළේ ය.
"මම හිතන්නේ ඔහුට ඔහුගේ වාර්තාව ගැන කතා කරන්න තිබුණා. ඒක වැරදුණා," වෛද්ය ජවහරානි කනගාටුවෙන් පවසයි.
නිර්වින්දන වෛද්යවරියක වන වෛද්ය පක්මෝඩේගේ බිරිඳට උදෑසන 5:15ට පමණ ඇමතුමක් ලැබුණු අතර පක්මෝඩේ පපුවේ වේදනාවක් ඇති වී ඇඳ මත වැටී සිටි බව එමගින් දන්වා තිබිණි. නිවසේදී සහ රෝහලේදී ඔහුට නැවත ජීවිතය ලබාදීමට ගත් උත්සාහයන් අසාර්ථක විය.
"හෘදයාබාධයක් වැනි බරපතළ ගැටලුවක් තිබෙනවා ද කියලා ECG එකෙන් හොයා ගන්න පුළුවන්. රෝගීන්ගෙන් සියයට 65 ත් 70 ත් අතර සංඛ්යාවකගේ ECG එකේ රෝග ලක්ෂණ පේන්න තියෙනවා. නමුත් හෘදයාබාධය සුළු නම්, එය ECG එකෙන් අනාවරණය වෙන්නේ නෑ."
"එවැනි තත්ත්වයකදී එක විකල්පයක් තියෙනවා පැයකට පමණ පසුව නැවත ECG එකක් සිදු කිරීමට. නමුත් ECG සමග රුධිර පරීක්ෂණ සහ වෙනත් පරීක්ෂණ කිරීමට ද සිදුවෙනවා."
වෛද්යවරුන් දෙදෙනා ම තහවුරු කළේ හෘදයාබාධයක් ඇති පුද්ගලයන්ගෙන් අවම වශයෙන් 65%කට පූර්ව අනතුරු ඇඟවීමේ ලක්ෂණ පවතින බව ය.
"මෙම රෝග ලක්ෂණ වන්නේ නොසන්සුන් බව, උදරයේ ආම්ලිකතාව, ගෑස් පිටවීම, කොන්දේ සහ උගුරේ වේදනාව, ඇවිදින විට තෙහෙට්ටුව, කකුල්වල අස්ථාවරත්වය, හුස්ම හිරවීම වගේ දේවල්. මෙම රෝග ලක්ෂණ හෘදයාබාධයකට දින හතකට පෙර පේන්න ගන්නවා,"වෛද්ය ෆුල්වානි පැවසීය.
වෛද්යවරු රෝගියාගේ වයස, ස්ත්රී පුරුෂ භාවය, පවුලේ සාමාජිකයින්ගේ රෝග ඉතිහාසය, රුධිර පීඩනය හෝ ශරීර කොටස්වල වේදනාව වැනි සාධක ද සොයා බලති.
"පපුව, උරහිස හෝ කොන්දේ වේදනාව දින දෙකක් වගේ තිබෙනවා නම්, ට්රොපොනින් වගේ පරීක්ෂණයකින් හෘද එන්සයිම පරීක්ෂා කරනවා. රෝගියා දින කිහිපයක් තිස්සේ වේදනාවෙන් ඉන්නවා නම්, ට්රෙඩ්මිල් පරීක්ෂණයක් (TMT) කරනවා," වෛද්ය ෆුල්වානි පැවසුවේ ය.
"අවසාන පරීක්ෂණය CT ඇන්ජියෝග්රෑම් (CT Angiogram) එහෙම නැත්නම්, CT කිරීටක ඇන්ජියෝග්රෑම් (CT Coronary Angiogram) තමයි. රෝගයක් නැහැ කියලා තහවුරු කර ගන්න මේ සියලු ම පරීක්ෂණ සිදු කරනවා."
වෛද්ය ෆුල්වානි පවසන්නේ, "සරල ම දේ තමයි ඔබේ සෞඛ්ය තොරතුරු දැනගෙන ඉන්න එක."
ඔවුන් අදහස් කරන්නේ, රෝගියාගේ ශරීරයේ කොලෙස්ටරෝල් මට්ටම, රුධිර සීනි මට්ටම සහ උදරයේ මේද මට්ටම සොයා ගැනීම ය.
උදරයේ තැන්පත් වී තිබෙන මේදය අඩු කිරීම සඳහා, හෘද රෝග විශේෂඥයින් ආහාර පාලනය සහ ව්යායාම සිදු කිරීම නිර්දේශ කරයි.
"මේදය අඩු ආහාර පරිභෝජනය, අඩු කාබෝහයිඩ්රේට් පරිභෝජනය, අත්යවශ්ය ප්රෝටීන් වර්ග ලබා ගැනීම සහ සෑම දිනක ම මිනිත්තු 50ක් පමණ ව්යායාම කිරීම. හැකි සෑම දිනක ම ව්යායාම් මධ්යස්ථානයකට යාම, පිහිනීම, මාංශ පේශි ශක්තිමත් කිරීමේ ව්යායාම කිරීම සහ ආතතිය අඩු කර ගැනිම. හෘද රෝග වළක්වා ගැනීමට මේවා අවශ්ය ම වෙනවා."
