74 ਸਾਲ ਬਾਅਦ ਪਾਕਿਸਤਾਨ ਪਹੁੰਚੇ ਸਿੱਕਾ ਖ਼ਾਨ ਭਰਾ ਨੂੰ ਮਿਲੇ, 'ਰਹਿੰਦੀ ਉਮਰ ਇਕੱਠੇ ਬਤੀਤ ਕਰਨ ਦੀ ਇੱਛਾ'
1947 ਵਿੱਚ ਵੰਡ ਮਗਰੋਂ ਆਪਣੇ ਪਰਿਵਾਰ ਤੋਂ ਵਿਛੜੇ ਸਿੱਕਾ ਖਾਨ (ਹਬੀਬ) ਅਟਾਰੀ ਸਰਹੱਦ ਰਸਤੇ ਆਪਣੇ ਭਰਾ ਮੁਹੰਮਦ ਸੱਦੀਕ ਨੂੰ ਮਿਲਣ ਪਾਕਿਸਤਾਨ ਪਹੁੰਚ ਗਏ ਹਨ। ਉਨ੍ਹਾਂ ਦੀ ਆਪਣੇ ਭਰਾ ਨਾਲ ਮੁਲਾਕਾਤ ਵੀ ਹੋ ਗਈ ਹੈ।
ਪਾਕਿਸਤਾਨ ਵਾਸੀ ਸੱਦੀਕ ਆਪਣੇ ਭਰਾ ਨੂੰ ਮਿਲ ਕੇ ਬਹੁਤ ਖੁਸ਼ ਹਨ। ਉਹ ਕਹਿੰਦੇ ਹਨ, ''ਬਹੁਤ ਖੁਸ਼ੀ ਹੋਈ ਹੈ ਜੀ। ਹੱਦ ਤੋਂ ਜ਼ਿਆਦਾ ਖੁਸ਼ੀ ਹੋਈ ਹੈ। ਅਸੀਂ ਦੋ ਭਰਾ ਮਿਲ ਪਏ।''
ਪਾਕਿਸਤਾਨ ਪਹੁੰਚੇ ਸਿੱਕਾ ਖ਼ਾਨ ਭਰਾ ਨੂੰ ਮਿਲ ਕੇ ਕੀ ਬੋਲੇ
ਪਾਕਿਸਤਾਨ ਵਾਲੇ ਪਾਸਿਓਂ ਬੀਬੀਸੀ ਪੱਤਰਕਾਰ ਅਲੀ ਕਾਜ਼ਮੀ ਨੇ ਦੋਵਾਂ ਭਰਾਵਾਂ ਨਾਲ ਗੱਲਬਾਤ ਕੀਤੀ। ਗੱਲਬਾਤ ਦੌਰਾਨ ਉਨ੍ਹਾਂ ਨੇ ਕਿਹਾ, ''ਜਿਹੜੀ ਚਾਰ ਦਿਨ ਦੀ ਜ਼ਿੰਦਗੀ ਰਹਿ ਗਈ ਇਕੱਠੇ ਲੰਘਾ ਲਈਏ, ਹਕੂਮਤ ਅੱਗੇ ਕਹਾਂਗੇ। ਚਲੋ ਬਈ, ਇਸ ਨੂੰ ਇਜਾਜ਼ਤ ਦੇ ਦੇਣ। ਇਸਦਾ ਓਧਰ ਕੋਈ ਨਹੀਂ ਸਿਵਾਏ ਸਾਥੋਂ।''
ਤਸਵੀਰ ਸਰੋਤ, AlI KAZMI
''ਚਾਰ ਦਿਨ ਇਸ ਨੂੰ ਇਜਾਜ਼ਤ ਦੇ ਦੇਣ। ਚਾਰ ਦਿਨ ਦੀ ਸਾਡੀ ਜ਼ਿੰਦਗੀ ਹੈ। ਦੁੱਖ-ਸੁੱਖ ਹੀ ਕਰਨਾ, ਕੀ ਹੋਈ, ਕਿੱਦਾਂ ਹੋਇਆ, ਕੀ ਨਾ ਹੋਇਆ।''
ਸਿੱਕਾ ਖਾਨ ਨੇ ਆਪਣੇ ਭਰਾ ਨੂੰ ਮਿਲਣ ਤੋਂ ਬਾਅਦ ਕਿਹਾ, ''ਬਹੁਤ ਹੀ ਵਧੀਆ ਲਗਦਾ। ਜਿੰਨਾ ਕਹਿ ਲਈਏ ਓਨਾ ਹੀ ਵਧੀਆ ਲਗਦਾ।''
ਕਰਤਾਰਪੁਰ ਸਾਹਿਬ ਵਿਖੇ ਹੋਈ ਮੁਲਾਕਾਤ ਬਾਰੇ ਉਹ ਕਹਿੰਦੇ ਹਨ, ''ਓਦਣ ਮੈਨੂੰ ਤਾਂ ਬਹੁਤ ਵਧੀਆ ਲੱਗਿਆ ਪਰ ਇਹ ਰੋਣ ਲੱਗ ਪਿਆ। ਮੈਂ ਇਸ ਨੂੰ ਵਰਾਇਆ ਕਿ ਆਪਣਾ ਮਾਂ-ਪਿਓ ਤਾਂ ਮਰ ਹੀ ਗਿਆ ਪਰ ਐਨਾ ਸ਼ੁਕਰ ਕਰ ਕਿ ਆਪਾਂ ਇਕੱਠੇ ਹੋ ਗਏ।
ਤਸਵੀਰ ਸਰੋਤ, Ali Kazmi
''ਜੇ ਤੈਨੂੰ ਕੁਝ ਹੋ ਜਾਂਦਾ, ਮੈਨੂੰ ਕੁਝ ਹੋ ਜਾਂਦਾ, ਫੇਰ ਕੀ ਕਰਦੇ। ਆਪਾਂ ਤਾਂ ਫੇਰ ਵੀ ਮਿਲਪੇ। ਭਰਾ-ਭਰਾ, ਤੇ ਹੁਣ ਬੱਸ ਕਰ।
''ਸਿੱਕਾ ਖਾਨ ਨੇ ਦੱਸਿਆ ਕਿ ਪਿੰਡ ਵਾਲਿਆਂ ਨੇ ਉਨ੍ਹਾਂ ਨੂੰ ਕਿਹਾ ਸੀ ਕਿ ਜਿੰਨੀ ਦੇਰ ਦਾ ਤੇਰਾ ਵੀਜ਼ਾ ਲੱਗਿਆ ਹੈ ਓਨੀ ਦੇਰ ਤਾਂ ਤੂੰ ਰਹੀ ਫੇਰ ਆਕੇ ਮਿਲੀਂ ਅਤੇ ਫਿਰ ਭਾਵੇਂ ਚਲਾ ਜਾਵੀਂ, ਮੈਂ ਕਿਹਾ ਚੰਗਾ।
''ਲੋਕ ਕਹਿੰਦੇ ਨੇ ਉਹਨੂੰ ਕਿਉਂ ਨਹੀਂ ਸੱਦਦਾ ਤੂੰ, ਮੈਂ ਕਿਹਾ ਮੈਂ ਜਾਨਾਂ ਲੈਕੇ ਆਊਂਗਾ।''
ਇਹ ਵੀ ਪੜ੍ਹੋ:
ਬਾਰਡਰ ਪਾਰ ਕਰਨ ਤੋਂ ਪਹਿਲਾਂ ਸਿੱਕਾ ਖਾਨ ਨੇ ਕੀ ਕਿਹਾ ਸੀ?
ਬਾਰਡਰ ਜਾਣ ਤੋਂ ਪਹਿਲਾਂ ਤਰਨਤਾਰਨ ਵਿੱਚ ਬੀਬੀਸੀ ਸਹਿਯੋਗੀ ਰਵਿੰਦਰ ਸਿੰਘ ਰੌਬਿਨ ਨੇ ਉਨ੍ਹਾਂ ਨਾਲ ਗੱਲਬਾਤ ਕੀਤੀ। ਇਸ ਮੌਕੇ ਉਹ ਕਾਫ਼ੀ ਖੁਸ਼ ਨਜ਼ਰ ਆਏ।
ਸਿੱਕਾ ਖਾਨ ਨੇ ਆਪਣੇ ਭਰਾ ਨੂੰ ਮਿਲਣ ਦੇ ਮੌਕੇ ਬਾਰੇ ਆਪਣੇ ਭਾਵ ਇੰਝ ਦੱਸੇ,''ਬਹੁਤ ਜ਼ਿਆਦਾ ਖੁਸ਼ੀ ਹੈ। ਜਿੰਨੀ ਦੇਰ ਦਾ ਵੀਜ਼ਾ ਹੈ ਓਨੀ ਦੇਰ ਤਾਂ ਮੈਂ ਉਹਦੇ ਕੋਲ ਰਹਿ ਸਕਦਾਂ ਹਾਂ। ਫਿਰ ਪਿੰਡ ਵਾਲਿਆਂ ਨੇ ਬਹੁਤ ਜ਼ੋਰ ਲਗਾਇਆ ਸੀ, ਉਨ੍ਹਾਂ ਨੂੰ ਵੀ ਮਿਲਣਾ ਹੈ।''
ਉਨ੍ਹਾਂ ਨੇ ਕਿਹਾ ਕਿ ਉਹ ਆਪਣੇ ਭਰਾ ਦੇ ਪਰਿਵਾਰ ਲਈ ਸੌਗਾਤਾਂ ਲੈ ਕੇ ਜਾ ਰਹੇ ਹਨ।
ਉਨ੍ਹਾਂ ਨੇ ਦੱਸਿਆ, ''ਅਸੀਂ ਕੱਪੜੇ ਲੈ ਕੇ ਗਏ ਸੀ, ਪਟਵਾਰੀ ਵੀ ਉਨ੍ਹਾਂ ਲਈ ਕੱਪੜੇ ਲੈ ਕੇ ਆਇਆ। ''
''ਦੋ ਕੁ ਸੂਟ ਉਹ ਭੁੱਲ-ਭੱਲ ਗਏ ਸਨ ਜਾਂਦੇ ਹੋਏ, ਕਾਹਲ ਵਿੱਚ ਟਾਈਮ ਥੋੜ੍ਹਾ ਸੀ। ਔਰਤਾਂ ਲਈ ਚਾਦਰਾਂ ਤੇ ਚੂੜੀਆਂ ਲੈ ਕੇ ਦਿੱਤੀਆਂ ਹਨ।''
ਉਨ੍ਹਾਂ ਨੇ ਦੱਸਿਆ, ''ਪਟਵਾਰੀ ਦੀ ਨੂੰਹ ਨੇ ਬਹੁਤ ਕੀਤਾ ਸਾਡੇ ਲਈ। ਉਹ ਕਹਿੰਦੀ ਮੈਂ ਆਪਣੇ ਕੋਲੋ ਦੁਬਾਰਾ ਦੇਵਾਂਗੀ।''
ਆਪਣੇ ਭਰਾ ਨਾਲ ਹੋਈ ਪਿਛਲੀ ਮੁਲਾਕਾਤ ਬਾਰੇ ਉਨ੍ਹਾਂ ਨੇ ਦੱਸਿਆ, ''ਪਛਲੀ ਮੁਲਾਕਾਤ ਮੌਕੇ ਗੱਲਾਂ ਥੋੜ੍ਹੀਆਂ ਹੋਈਆਂ ਟਾਈਮ ਥੋੜ੍ਹਾ ਸੀ। ਉਹ ਰੋਈ ਗਿਆ। ਰੋਈ ਹੀ ਗਿਆ। ਸਾਰੇ ਹੀ ਰੋਣ ਲੱਗ ਗਏ।'' ਇਹ ਕਹਿੰਦਿਆਂ ਸਿੱਕਾ ਖਾਨ ਦਾ ਗਲ਼ ਭਰ ਆਇਆ ਪਰ ਉਨ੍ਹਾਂ ਨੇ ਅੱਗੇ ਕਿਹਾ, ''ਟਾਈਮ ਥੋੜ੍ਹਾ ਸੀ। ਲੇਟ ਹੋ ਗਏ ਉਹ, ਆਉਣ ਵਿੱਚ, ਅਸੀਂ ਪਹਿਲਾਂ ਪਹੁੰਚ ਗਏ ਸਨ।''
ਇਸ ਵਾਰ ਬਾਰੇ ਹਾਲਾਂਕਿ ਉਨ੍ਹਾਂ ਨੇ ਕਿਹਾ, ''ਜਿੰਨੀ ਦੇਰ ਦਾ ਵੀਜ਼ਾ ਹੈ ਓਨੀ ਦੇਰ ਤਾਂ ਮੈਂ ਰਹਾਂਗਾ। ਮਿਲਾ ਗਿਲਾਂਗਾ। ਗੱਲਾਂ-ਬਾਤਾਂ ਕਰਾਂਗੇ। ਫੇਰ ਹੀ ਮੈਨੂੰ ਪਤਾ ਲੱਗੂ, ਆਹ ਤੇਰਾ ਦੋਹਤਾ ਹੈ, ਆਹ ਤੇਰੀ ਭਾਣਜੀ ਹੈ। ਐਂ ਪਤਾ ਲੱਗੇਗਾ। ''
''ਉਦੋਂ ਕੋਈ ਪਤਾ ਨਹੀਂ ਲੱਗਿਆ। ਉਦੋਂ ਰੋਣੋ ਨੀ ਹਟੇ, ਮੇਰਾ ਤਾਂ ਆਪ ਰੋਣ ਨਿਕਲੀ ਗਿਆ। ਗੱਲਾਂ ਕੀ ਹੋਣ?''
ਪਾਕਿਸਤਾਨ ਜਾਣ ਵੇਲੇ ਕੀ ਬੋਲੇ ਸਿੱਕਾ ਖ਼ਾਨ
ਸਿੱਕਾ ਖ਼ਾਨ ਨੂੰ ਛੱਡਣ ਲਈ ਪਿੰਡ ਦੇ ਕਈ ਜਣੇ ਵੀ ਨਾਲ ਪਹੁੰਚੇ। ਉਨ੍ਹਾ ਨਾਲ ਮੌਜੂਦ ਡਾ਼ ਜਸਬੀਰ ਸਿੰਘ ਨੇ ਦੱਸਿਆ, ''ਉਹ ਵੀ ਨਾਲ ਜਾਣਾ ਚਾਹੁੰਦੇ ਸਨ ਪਰ ਜਦੋਂ ਸਿੱਕਾ ਖਾਨ ਦਾ ਵੀਜ਼ਾ ਲਗਵਾਉਣ ਗਏ ਤਾਂ ਉਹ ਆਪਣਾ ਪਾਸਪੋਰਟ ਨਹੀਂ ਲਿਜਾ ਸਕੇ।''
ਜਨਵਰੀ ਦੇ ਦੂਜੇ ਹਫ਼ਤੇ ਦੋਵਾਂ ਭਰਾਵਾਂ ਦਾ ਕਰਤਾਰਪੁਰ ਸਾਹਿਬ ਵਿਖੇ 74 ਸਾਲ ਬਾਅਦ ਮੇਲ ਹੋਇਆ ਸੀ। ਇਹ ਮੁਲਾਕਾਤ ਕੁਝ ਹੀ ਪਲਾਂ ਦੀ ਸੀ ਅਤੇ ਇਸ ਭਾਵੁਕ ਵੀਡੀਓ ਦੇ ਵਾਇਰਲ ਹੋਣ ਤੋਂ ਬਾਅਦ ਪਾਕਿਸਤਾਨ ਵੱਲੋਂ ਸਿੱਕਾ ਖਾਨ ਨੂੰ ਵੀਜ਼ਾ ਦਿੱਤਾ ਗਿਆ ਸੀ।
ਕਰਤਾਰਪੁਰ ਵਿੱਚ ਕਿਵੇਂ ਬਣਿਆ ਸੀ ਮੁਲਾਕਾਤ ਦਾ ਸਬੱਬ
ਦੋਵਾਂ ਭਰਾਵਾਂ ਦੀ ਮੁਲਾਕਾਤ 'ਪੰਜਾਬੀ ਲਹਿਰ' ਨਾਂਅ ਦੇ ਇੱਕ ਯੂਟਿਊਬ ਚੈਨਲ 'ਤੇ ਮੁਹੰਮਦ ਸੱਦੀਕ ਦਾ ਇੱਕ ਵੀਡੀਓ ਪੈਣ ਤੋਂ ਬਾਅਦ ਹੋਈ।
ਤਸਵੀਰ ਸਰੋਤ, NASIR DHILLON
ਕਰਤਾਰਪੁਰ ਵਿੱਚ ਦੋਵਾਂ ਭਰਾਵਾਂ ਦੀ ਮੁਲਾਕਾਤ ਦੇ ਗਵਾਹ ਫੁੱਲਾਂਵਾਲ ਪਿੰਡ ਦੇ ਜਗਸੀਰ ਸਿੰਘ ਨੇ ਜਨਵਰੀ ਦੀ ਮੁਲਾਕਾਤ ਤੋਂ ਬਾਅਦ ਬੀਬੀਸੀ ਪੱਤਰਕਾਰ ਸਰਬਜੀਤ ਧਾਲੀਵਾਲ ਨੂੰ ਦੱਸਿਆ ਸੀ ਕਿ ਫ਼ੋਨ ਉੱਤੇ ਤਾਂ ਦੋਵੇਂ ਭਰਾ ਦੋ ਸਾਲਾਂ ਤੋਂ ਗੱਲ ਕਰ ਰਹੇ ਸਨ ਪਰ ਵਿਅਕਤੀਗਤ ਮੁਲਾਕਾਤ 10 ਜਨਵਰੀ ਨੂੰ ਹੋਈ ਸੀ।
ਉਨ੍ਹਾਂ ਦੱਸਿਆ ਕਿ ਸਿੱਕਾ ਖ਼ਾਨ ਸਮੇਤ ਪਿੰਡ ਦੇ 13 ਵਿਅਕਤੀ ਕਰਤਾਰਪੁਰ ਸਾਹਿਬ ਵਿਖੇ ਗਏ ਸਨ। ਜਦੋਂ ਭਰਾਵਾਂ ਨੇ ਇੱਕ ਦੂਜੇ ਨੂੰ ਜੱਫੀ ਪਾਈ ਤਾਂ ਉਹ ਪਲ ਬੇਹੱਦ ਭਾਵੁਕ ਕਰਨ ਵਾਲਾ ਸੀ। ਨਾ ਸਿਰਫ਼ ਦੋਵੇਂ ਭਰਾਵਾਂ ਦੀਆਂ ਅੱਖਾਂ ਵਿਚ ਅੱਥਰੂ ਸਨ ਬਲਕਿ ਉੱਥੇ ਮੌਜੂਦ ਹਰ ਵਿਅਕਤੀ ਦੀ ਅੱਖ ਨਮ ਸੀ।
ਜਦੋਂ ਪਾਕਿਸਤਾਨ ਸਰਕਾਰ ਨੇ ਸਿੱਕਾ ਖ਼ਾਨ ਨੂੰ ਵੀਜ਼ਾ ਦਿੱਤਾ ਸੀ
ਬੇਹੱਦ ਗ਼ਰੀਬੀ ਵਿੱਚ ਬੀਤੀ ਜ਼ਿੰਦਗੀ
ਦੋਵਾਂ ਭਰਾਵਾਂ ਦਾ ਜੱਦੀ ਪਿੰਡ ਮੋਗਾ ਜ਼ਿਲ੍ਹੇ ਵਿੱਚ ਸੀ ਅਤੇ ਵੰਡ ਤੋਂ ਪਹਿਲਾਂ ਸਿੱਕਾ ਖ਼ਾਨ (ਹਬੀਬ) ਆਪਣੀ ਮਾਂ ਦੇ ਨਾਲ ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਫੁੱਲਵਾਲਾ ਨਾਨਕੇ ਪਿੰਡ ਆਇਆ ਹੋਇਆ ਸੀ।
ਵੰਡ ਦੌਰਾਨ ਹੋਈ ਕਤਲੋਗਾਰਤ ਵਿੱਚ ਇਹਨਾਂ ਦੇ ਪਿਤਾ ਦੀ ਮੌਤ ਹੋ ਗਈ ਸੀ। ਅੱਧਾ ਪਰਿਵਾਰ (ਭਰਾ ਅਤੇ ਭੈਣ) ਪਾਕਿਸਤਾਨ ਚਲੇ ਗਏ ਅਤੇ ਸਿੱਕਾ ਖ਼ਾਨ ਅਤੇ ਉਸ ਦੀ ਮਾਤਾ ਫੁੱਲਾਂਵਾਲ ਪਿੰਡ ਵਿੱਚ ਹੀ ਰਹਿ ਗਏ।
ਬਾਅਦ ਵਿੱਚ ਸਿੱਕਾ ਖ਼ਾਨ ਦੀ ਮਾਂ ਵੰਡ ਕਾਰਨ ਵਿੱਛੜੇ ਪਰਿਵਾਰ ਦੇ ਦੁੱਖ ਕਾਰਨ ਮਾਨਸਿਕ ਸੰਤੁਲਨ ਗੁਆ ਬੈਠੀ ਅਤੇ ਖ਼ੁਦਕੁਸ਼ੀ ਕਰ ਲਈ। ਇਸ ਤੋਂ ਬਾਅਦ ਸਿੱਕਾ ਖ਼ਾਨ ਦਾ ਪਾਲਣ ਪੋਸ਼ਣ ਉਨ੍ਹਾਂ ਦੇ ਮਾਮੇ ਅਤੇ ਪਿੰਡ ਫੁੱਲਾਂਵਾਲ ਦੇ ਲੋਕਾਂ ਨੇ ਕੀਤਾ।
ਫੁੱਲਾਂਵਾਲ ਪਿੰਡ ਵਿੱਚ ਮੁਸਲਿਮ ਭਾਈਚਾਰੇ ਦੇ ਕਰੀਬ 20 ਕੁ ਘਰ ਹਨ। ਜਗਸੀਰ ਸਿੰਘ ਮੁਤਾਬਕ ਉਨ੍ਹਾਂ ਦੇ ਬਜ਼ੁਰਗ ਦੱਸਦੇ ਸਨ ਕਿ 1947 ਵਿੱਚ ਤਿੰਨ ਹੀ ਘਰ ਸਨ।
ਭਾਈਚਾਰਕ ਸਾਂਝ ਹੋਣ ਕਾਰਨ ਇਹਨਾਂ ਘਰਾਂ ਦੇ ਲੋਕਾਂ ਨੂੰ ਵੰਡ ਸਮੇਂ ਹੋਏ ਫ਼ਸਾਦ ਦੌਰਾਨ ਸਿੱਖਾਂ ਨੇ ਆਪਣੇ ਘਰਾਂ ਵਿੱਚ ਲੁਕਾ ਕੇ ਇਹਨਾਂ ਦੀ ਰੱਖਿਆ ਕੀਤੀ ਅਤੇ ਕਿਸੇ ਨੂੰ ਵੀ ਪਾਕਿਸਤਾਨ ਨਹੀਂ ਜਾਣ ਦਿੱਤਾ।
ਤਸਵੀਰ ਸਰੋਤ, NASIR DHILLON
ਉਨ੍ਹਾਂ ਨੇ ਦੱਸਿਆ ਕਿ ਇਹ ਸਾਂਝ ਹੁਣ ਵੀ ਕਾਇਮ ਹੈ। ਸਿੱਕਾ ਖ਼ਾਨ ਆਪਣੇ ਭਰਾ ਨੂੰ ਮਿਲਿਆ ਜਿਸਦੀ ਪੂਰੇ ਪਿੰਡ ਨੂੰ ਖ਼ੁਸ਼ੀ ਸੀ। ਜਨਵਰੀ ਦੇ ਦੂਜੇ ਹਫ਼ਤੇ ਜਿਸ ਦਿਨ ਸਿੱਕਾ ਖ਼ਾਨ ਨੇ ਭਰਾ ਨੂੰ ਮਿਲਣ ਲਈ ਜਾਣਾ ਸੀ ਤਾਂ ਪਿੰਡ ਵੱਲੋਂ ਮੁਹੰਮਦ ਸਦੀਕ ਦੇ ਪਰਿਵਾਰ ਲਈ ਕੱਪੜੇ ਅਤੇ ਹੋਰ ਤੋਹਫ਼ੇ ਭੇਜੇ ਗਏ।
ਇਹ ਵੀ ਪੜ੍ਹੋ:
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post
