ਸ਼ੋਇਬ ਮਲਿਕ ਦੇ ਨਿਕਾਹ ਉੱਤੇ ਸਾਨੀਆ ਮਿਰਜ਼ਾ ਦੇ ਪਰਿਵਾਰ ਨੇ ਕੀ ਕਿਹਾ
ਤਸਵੀਰ ਸਰੋਤ, @MIRZASANIA
ਸਾਬਕਾ ਭਾਰਤੀ ਟੈਨਿਸ ਖਿਡਾਰਨ ਸਾਨੀਆ ਮਿਰਜ਼ਾ ਪਾਕਿਸਤਾਨੀ ਕ੍ਰਿਕਟ ਟੀਮ ਦੇ ਕਪਤਾਨ ਰਹਿ ਚੁੱਕੇ ਸ਼ੋਇਬ ਮਲਿਕ ਨਾਲ ਵਿਆਹੇ ਹੋਏ ਸਨ।
ਪਿਛਲੇ ਦਿਨੀਂ ਸੋਸ਼ਲ ਮੀਡੀਆ ਉੱਤੇ ਇਹ ਚਰਚਾ ਛਿੜੀ ਸੀ ਕਿ ਉਨ੍ਹਾਂ ਦਾ ਆਪਣੇ ਪਤੀ ਸ਼ੋਇਬ ਮਲਿਕ ਨਾਲ ਰਿਸ਼ਤਾ ਠੀਕ ਨਹੀਂ ਚੱਲ ਰਿਹਾ ਅਤੇ ਦੋਵਾਂ ਦਾ ਤਲਾਕ ਹੋ ਸਕਦਾ ਹੈ।
ਤਸਵੀਰ ਸਰੋਤ, Getty Images/Insta SM
ਸ਼ਨੀਵਾਰ ਨੂੰ ਸ਼ੋਇਬ ਮਲਿਕ ਨੇ ਆਪਣੇ ਵਿਆਹ ਦੀਆਂ ਤਸਵੀਰਾਂ ਇੰਸਟਾਗ੍ਰਾਮ ਹੈਂਡਲ ਉੱਤੇ ਪੋਸਟ ਕੀਤੀਆਂ।
ਉਨ੍ਹਾਂ ਨਾਲ ਪਾਕਿਸਤਾਨੀ ਅਦਾਕਾਰਾ ਸਨਾ ਜਾਵੇਦ ਸਨ, ਜਿਨ੍ਹਾਂ ਨਾਲ ਉਨ੍ਹਾਂ ਨੇ ਨਿਕਾਹ ਕਰਵਾ ਲਿਆ ਹੈ।
ਤਸਵੀਰ ਸਰੋਤ, Getty Images
ਭਾਰਤ ਅਤੇ ਪਾਕਿਸਤਾਨ ਵਿੱਚ ਸੋਸ਼ਲ ਮੀਡੀਆ ਉੱਤੇ ਇਸ ਬਾਰੇ ਚਰਚਾ ਹੋ ਰਹੀ ਹੈ।
ਸਾਨੀਆ ਮਿਰਜ਼ਾ ਦੇ ਪਿਤਾ ਇਮਰਾਨ ਮਿਰਜ਼ਾ ਨੇ ਦੱਸਿਆ ਕਿ ਉਨ੍ਹਾਂ ਦੀ ਧੀ ਨੇ 'ਖੁਲਾ' ਦੇ ਅਧੀਨ ਤਲਾਕ ਲੈ ਲਿਆ ਹੈ।
ਯਾਨੀ ਇਸਲਾਮੀ ਰਵਾਇਤ ਮੁਤਾਬਕ ਤਲਾਕ ਲਿਆ ਹੈ ਜਿਸ ਵਿੱਚ ਔਰਤ ਆਪਣੇ ਪਤੀ ਤੋਂ ਤਲਾਕ ਲੈਂਦੀ ਹੈ।
ਉਨ੍ਹਾਂ ਦੱਸਿਆ ਕਿ ਸਾਨੀਆ ਨੇ ਤਲਾਕ ਆਪਣੀ ਮਰਜ਼ੀ ਨਾਲ ਲਿਆ ਹੈ।
ਸਾਨੀਆ ਅਤੇ ਸ਼ੋਇਬ ਮਲਿਕ ਦਾ ਵਿਆਹ ਸਾਲ 2010 ਵਿੱਚ ਹੋਇਆ ਸੀ। ਦੋਵੇਂ ਸੰਯੁਕਤ ਅਰਬ ਅਮੀਰਾਤ ਵਿੱਚ ਰਹਿੰਦੇ ਸਨ।
ਤਸਵੀਰ ਸਰੋਤ, INSTAGRAM/NASIMAMIRZA
ਸਾਨੀਆ ਮਿਰਜ਼ਾ ਦੀ ਮਾਂ ਨੇ ਕੀ ਦੱਸਿਆ?
ਸਾਨੀਆ ਮਿਰਜ਼ਾ ਦੀ ਮਾਂ ਨਸਿਮਾ ਮਿਰਜ਼ਾ ਨੇ ਐਤਵਾਰ ਨੂੰ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ਤੋਂ 'ਮਿਰਜ਼ਾ ਪਰਿਵਾਰ ਅਤੇ ਟੀਮ ਸਾਨੀਆ' ਦੀ ਤਰਫੋਂ ਇੱਕ ਬਿਆਨ ਜਾਰੀ ਕੀਤਾ।
ਇਸ ਬਿਆਨ ਵਿੱਚ ਸਾਨੀਆ ਮਿਰਜ਼ਾ ਦੇ ਪ੍ਰਸ਼ੰਸਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਕਿਆਸ ਨਾ ਲਗਾਉਣ ਅਤੇ ਉਨ੍ਹਾਂ ਦੀ ਨਿੱਜਤਾ ਦਾ ਸਨਮਾਨ ਕਰਨ।
ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਸਾਨੀਆ ਨੇ ਹਮੇਸ਼ਾ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਲੋਕਾਂ ਦੀ ਨਜ਼ਰ ਤੋਂ ਓਹਲੇ ਰੱਖਿਆ ਹੈ।
ਹਾਲਾਂਕਿ ਉਨ੍ਹਾਂ ਲਈ ਅੱਜ ਇਹ ਸਾਂਝਾ ਕਰਨ ਦੀ ਲੋੜ ਆ ਗਈ ਹੈ ਕਿ ਸ਼ੋਇਬ ਅਤੇ ਉਨ੍ਹਾਂ (ਸਾਨੀਆ) ਨੇ ਕੁਝ ਮਹੀਨੇ ਪਹਿਲਾਂ ਤਲਾਕ ਲੈ ਲਿਆ ਸੀ। ਉਹ ਸ਼ੋਇਬ ਨੂੰ ਉਨ੍ਹਾਂ ਦੇ ਨਵੇਂ ਸਫ਼ਰ ਲਈ ਸ਼ੁਭਕਾਮਨਾਵਾਂ ਦਿੰਦੇ ਹਨ!
ਉਨ੍ਹਾਂ ਦੇ ਜੀਵਨ ਦੇ ਇਸ ਸੰਵੇਦਨਸ਼ੀਲ ਸਮੇਂ ਵਿੱਚ, ਅਸੀਂ ਪ੍ਰਸ਼ੰਸਕਾਂ ਅਤੇ ਸ਼ੁਭਚਿੰਤਕਾਂ ਨੂੰ ਬੇਨਤੀ ਕਰਦੇ ਹਾਂ ਕਿ ਉਹ ਕਿਆਸਅਰਾਈਆਂ ਤੋਂ ਪਰਹੇਜ਼ ਕਰਨ ਅਤੇ ਨਿੱਜਤਾ ਦੀ ਉਨ੍ਹਾਂ ਦੀ ਜ਼ਰੂਰਤ ਦਾ ਸਨਮਾਨ ਕਰਨ।
ਤਸਵੀਰ ਸਰੋਤ, Getty Images
ਸਾਨੀਆ ਮਿਰਜ਼ਾ ਦਾ ਨਾਮ ਪੂਰੇ ਸੰਸਾਰ ਵਿੱਚ ਇੱਕ ਸਫ਼ਲ ਟੈਨਿਸ ਖਿਡਾਰਨ ਵਜੋਂ ਜਾਣਿਆ ਜਾਂਦਾ ਹੈ।
'ਓਲੰਪਕਿਸ’ ਦੀ ਅਧਿਕਾਰਤ ਵੈੱਬਸਾਈਟ ਮੁਤਾਬਕ ਸਾਨੀਆ ਮਿਰਜ਼ਾ ਨੇ ਆਪਣਾ ਪਹਿਲਾ ਵੱਡਾ ਮੁਕਾਬਲਾ ਚੰਡੀਗੜ੍ਹ ਵਿੱਚ ਖੇਡਿਆ ਸੀ ।
ਉਨ੍ਹਾਂ ਨੇ ਇੰਡੀਅਨ ਟੈਨਿਸ ਐਸੋਸੀਏਸ਼ਨ(ਆਈਟੀਐਫ) ਵੱਲੋਂ ਚੰਡੀਗੜ੍ਹ ਵਿੱਚ ਕਰਵਾਏ ਗਏ ਸੀਨੀਅਰ ਸਰਕਟ ਮੁਕਾਬਲੇ ਤੋਂ ਸ਼ੁਰੂਆਤ ਕੀਤੀ ਸੀ।
ਇਹ ਮੁਕਾਬਲਾ ਅਪ੍ਰੈਲ 2001 ਵਿੱਚ ਹੋਇਆ ਸੀ। ਇਸ ਸਮੇਂ ਸਾਨੀਆ ਮਿਰਜ਼ਾ ਦੀ ਉਮਰ 14 ਸਾਲ ਸੀ।
ਸਾਨੀਆ ਮਿਰਜ਼ਾ ਨੇ ਇਸ ਮੁਕਾਬਲੇ ਵਿੱਚ ਆਪਣੇ ਤੋਂ ਤਿੰਨ ਸਾਲ ਵੱਡੀ ਗੀਤਾ ਮਨੋਹਰ ਨੂੰ ਹਰਾਇਆ ਸੀ।
ਇਸ ਮੁਕਾਬਲੇ ਵਿੱਚ ਸਾਨੀਆ ਦੀ ‘ਵਾਈਲਡ ਕਾਰਡ’ ਐਂਟਰੀ ਸੀ।
ਸ਼ੋਇਬ ਮਲਿਕ ਕੌਣ
ਤਸਵੀਰ ਸਰੋਤ, Getty Images
42 ਸਾਲਾ ਸ਼ੋਇਬ ਮਲਿਕ ਨੇ ਪਾਕਿਸਤਾਨ ਦੇ ਲਈ 287 ਵਨ ਡੇ, 124 ਟੀ-20 ਅਤੇ 35 ਟੈੱਸਟ ਮੈਚ ਖੇਡੇ ਹਨ। ਮਲਿਕ ਨੂੰ 2007 ਵਿੱਚ ਪਾਕਿਸਤਾਨੀ ਟੀਮ ਦਾ ਕਪਤਾਨ ਬਣਾਇਆ ਗਿਆ ਸੀ।
ਸ਼ੋਇਬ ਮਲਿਕ ਪਾਕਿਸਤਾਨ ਵਿਚਲੇ ਪੰਜਾਬ ਦੇ ਸਿਆਲਕੋਟ ਜ਼ਿਲ੍ਹੇ ਵਿੱਚ ਜਨਮੇ ਸਨ।
ਈਐੱਸਪੀਐਨ ਕ੍ਰਿਕ ਇਨਫੋ ਵੈੱਬਸਾਈਟ ਮੁਤਾਬਕ ਸ਼ੋਇਬ ਮਲਿਕ ਨੇ ਆਪਣਾ ਪਹਿਲਾ ਵਨ-ਡੇ ਕ੍ਰਿਕਟ ਮੈਚ 2019 ਵਿੱਚ ਖੇਡਿਆ ਸੀ ।
ਉਨ੍ਹਾਂ ਨੇ ਆਪਣਾ ਆਖ਼ਰੀ ਟੀ-20 ਕ੍ਰਿਕਟ ਮੁਕਾਬਲਾ ਨਵੰਬਰ 2021 ਵਿੱਚ ਖੇਡਿਆ ਸੀ।
ਸਨਾ ਜਾਵੇਦ ਕੌਣ ਹੈ?
ਤਸਵੀਰ ਸਰੋਤ, Instagram/ Shoib Malik
28 ਸਾਲਾ ਸਨਾ ਜਾਵੇਦ ਪਾਕਿਸਤਾਨ ਦੇ ਮਸ਼ਹੂਰ ਕਲਾਕਾਰਾਂ ਵਿੱਚੋਂ ਇੱਕ ਹੈ।
ਉਹ ਸ਼ਹਿਰ-ਏ-ਜ਼ਾਤ, ਜ਼ਰਾ ਯਾਦ ਕਰ, ਰੁਸਵਾਈ ਜਿਹੇ ਕਈ ਪਾਕਿਸਤਾਨੀ ਨਾਟਕਾਂ ਦੇ ਨਾਲ-ਨਾਲ ਕਈ ਮਿਊਜ਼ਿਕ ਵੀਡੀਓਜ਼ ਵਿੱਚ ਨਜ਼ਰ ਆ ਚੁੱਕੇ ਹਨ।
ਇੰਡੀਅਨ ਐਕਸਪ੍ਰੈਸ ਦੀ ਖ਼ਬਰ ਮੁਤਾਬਕ ਸਨਾ ਜਾਵੇਦ ਪਹਿਲਾਂ ਉਮੈਰ ਜਸਵਾਲ ਨਾਲ ਵਿਆਹੇ ਹੋਏ ਸਨ।
ਦੋਵਾਂ ਦਾ ਵਿਆਹ 2020 ਵਿੱਚ ਹੋਇਆ ਸੀ ਅਤੇ ਉਹ ਪਿਛਲੇ ਸਾਲ ਨਵੰਬਰ ਵਿੱਚ ਇੱਕ ਦੂਜੇ ਤੋਂ ਵੱਖ ਹੋ ਗਏ।
ਸਨਾ ਜਾਵੇਦ ਨੇ ਇੰਸਟਾਗ੍ਰਾਮ ਉੱਤੇ ਆਪਣਾ ਨਾਮ ਵੀ ਬਦਲ ਕੇ ਸਨਾ ਸ਼ੋਇਬ ਮਲਿਕ ਰੱਖ ਲਿਆ ਹੈ।
ਸੋਸ਼ਲ ਮੀਡੀਆ 'ਤੇ ਕੀ ਚਰਚਾ ਹੈ?
ਸਾਬਕਾ ਭਾਰਤੀ ਟੈਨਿਸ ਖਿਡਾਰਨ ਸਾਨੀਆ ਮਿਰਜ਼ਾ ਨੇ ਬੁੱਧਵਾਰ ਨੂੰ ਆਪਣੇ ਇੰਸਟਾਗ੍ਰਾਮ ਹੈਂਡਲ ਉੱਤੇ ਇਸ ਬਾਰੇ ਅਸਪਸ਼ਟ ਸੁਨੇਹਾ ਪੋਸਟ ਕੀਤਾ ਸੀ।
ਇਸ ਤੋਂ ਬਾਅਦ ਇਹ ਚਰਚਾ ਹੋਣ ਲੱਗੀ ਸੀ ਕਿ ਸ਼ਾਇਦ ਸ਼ੋਇਬ ਮਲਿਕ ਦੇ ਨਾਲ ਉਨ੍ਹਾਂ ਦਾ ਰਿਸ਼ਤਾ ਖ਼ਰਾਬ ਹੋ ਗਿਆ ਹੈ ਜਾਂ ਦੋਵਾਂ ਦਾ ਤਲਾਕ ਹੋ ਗਿਆ ਹੈ।
ਸਾਨੀਆ ਨੇ ਲਿਖਿਆ ਸੀ, "ਵਿਆਹ ਅਤੇ ਤਲਾਹ ਦੋਵੇਂ ਮੁਸ਼ਕਿਲ ਹੁੰਦੇ ਹਨ, ਜ਼ਿੰਦਗੀ ਕਦੇ ਵੀ ਸੌਖੀ ਨਹੀਂ ਹੋਵੇਗੀ ਪਰ ਤੁਸੀਂ ਆਪਣੀ ਮੁਸ਼ਕਿਲ ਚੁਣ ਸਕਦੋ ਹੋ, ਇਸ ਲਈ ਸਮਝਦਾਰੀ ਨਾਲ ਚੁਣੋ।"
ਅਸਲ ਵਿੱਚ ਸਾਨੀਆ ਮਿਰਜ਼ਾ ਅਤੇ ਸ਼ੋਇਬ ਮਲਿਕ ਦੇ ਤਲਾਕ ਦੀ ਅਫ਼ਵਾਹ ਕਾਫੀ ਦੇਰ ਤੋਂ ਚੱਲ ਰਹੀ ਸੀ।
ਦੋਵੇਂ ਜਣੇ ਇਕੱਠੇ 'ਦ ਮਿਰਜ਼ਾ ਮਲਿਕ ਸ਼ੋਅ' ਨਾਮ ਦਾ ਇੱਕ ਸ਼ੋਅ ਵੀ ਹੋਸਟ ਕਰਦੇ ਸਨ। ਇਸ ਸ਼ੋਅ ਦੀਆਂ ਵੀਡੀਓਜ਼ ਵੀ ਸੋਸ਼ਲ ਮੀਡੀਆ ਉੱਤੇ ਵਾਇਰਲ ਹੋ ਰਹੀਆਂ ਹਨ।
ਪਾਕਿਸਤਾਨ ਵਿਚਲੇ ਇੱਕ ਇੰਸਟਾਗ੍ਰਾਮ ਯੂਜ਼ਰ ਨੇ ਲਿਖਿਆ, "ਮੈਂ ਹਕੀਕਤ ਵਿੱਚ ਸਾਨੀਆ ਮਿਰਜ਼ਾ ਦੇ ਲਈ ਦੁਖੀ ਹਾਂ ਜਿਨ੍ਹਾਂ ਨੇ ਸ਼ੋਇਬ ਨਾਲ ਵਿਆਹ ਕਰਕੇ ਭਾਰਤ ਵਿੱਚ ਨਫ਼ਰਤ ਦਾ ਸਾਹਮਣਾ ਕੀਤਾ।"
ਲੋਕਾਂ ਨੇ ਸ਼ੋਇਬ ਮਲਿਕ ਨਾਲ ਨਾਰਾਜ਼ਗੀ ਵੀ ਜ਼ਾਹਰ ਕੀਤੀ ਹੈ।
ਇੰਸਟਾਗ੍ਰਾਮ 'ਤੇ ਇਸੇ ਤਰ੍ਹਾਂ ਦੀਆਂ ਭਾਵਨਾਵਾਂ ਨੂੰ ਜ਼ਾਹਰ ਕਰਦੇ ਹੋਏ ਰਿਦਾ ਕੈਸਰ ਨੇ ਲਿਖਿਆ, "ਮੈਂ ਪਾਣੀ ਪੀ ਰਹੀ ਸੀ, ਇਹ ਮੇਰੀ ਸਾਹ ਵਾਲੀ ਪਾਈਪ ਵਿੱਚ ਚਲਾ ਗਿਆ।"
ਨਯਾਬ ਖਾਲਿਦ ਨੇ ਲਿਖਿਆ, "ਲੰਬੇ ਸਮੇਂ ਤੱਕ ਕਿਸੇ ਪ੍ਰਤੀ ਵਫ਼ਾਦਾਰ ਰਹਿਣਾ ਇੱਕ ਨਿੱਜੀ ਫੈਸਲਾ ਹੈ, ਪਰ ਕਈ ਸਾਲਾਂ ਬਾਅਦ ਆਪਣੇ ਸਾਥੀ ਨੂੰ ਬਦਲਣਾ ਸਾਡੇ ਸਮਾਜ ਵਿੱਚ ਸਵੀਕਾਰ ਕਰਨਾ ਮੁਸ਼ਕਲ ਹੈ।"
ਇੱਕ ਯੂਜ਼ਰ ਸਾਨੀਆ ਮਿਰਜ਼ਾ ਲਈ ਇੰਨਾ ਭਾਵੁਕ ਹੋ ਗਿਆ ਕਿ ਉਸਨੇ ਲਿਖਿਆ, "ਸਾਨੀਆ ਮਿਰਜ਼ਾ ਨੇ ਪੂਰੇ ਸਿਸਟਮ ਅਤੇ ਪੂਰੇ ਦੇਸ਼ ਨਾਲ ਲੜਾਈ ਕੀਤੀ ਤਾਂ ਕਿ ਉਹ ਸ਼ੋਇਬ ਮਲਿਕ ਨਾਲ ਵਿਆਹ ਕਰ ਸਕੇ ਅਤੇ ਹੁਣ ਸ਼ੋਇਬ ਨੇ ਸਨਾ ਜਾਵੇਦ ਨਾਲ ਵਿਆਹ ਕਰ ਲਿਆ।"
ਤਸਵੀਰ ਸਰੋਤ, Getty Images
ਇੱਕ ਯੂਜ਼ਰ ਮਾਰੀਆ ਨੇ ਲਿਖਿਆ, "ਮੈਂ ਇਸ ਵੇਲੇ ਬਹੁਤ ਉਲਝਣ ਵਿੱਚ ਹਾਂ, ਮੈਂ ਸ਼ੋਇਬ ਮਲਿਕ ਅਤੇ ਸਾਨੀਆ ਮਿਰਜ਼ਾ ਦੇ ਤਲਾਕ ਬਾਰੇ ਸੁਣਿਆ ਸੀ ਪਰ ਸਨਾ ਜਾਵੇੇਦ ਅਤੇ ਉਮੈਰ ਜਸਵਾਲ ਦਾ ਤਲਾਕ ਕਦੋਂ ਹੋਇਆ, ਮੇਹਰਬਾਨੀ ਕਰਕੇ ਮੇਰੀ ਇਹ ਸਮਝਣ ਵਿੱਚ ਮਦਦ ਕਰੋ।"
ਪਿਛਲੇ ਸਾਲਾਂ ਦੌਰਾਨ ਵੀ ਸਾਨੀਆ ਮਿਰਜ਼ਾ ਸੋਸ਼ਲ ਮੀਡੀਆ ਉੱਤੇ ਚਰਚਾ ਵਿੱਚ ਰਹੇ ਹਨ।
ਸ਼ੋਇਬ ਮਲਿਕ ਅਤੇ ਸਾਨੀਆ ਮਿਰਜ਼ਾ ਦੇ ਪੁੱਤਰ ਦੇ ਜਨਮ ਵੇਲੇ ਵੀ ਭਾਰਤ ਅਤੇ ਪਾਕਿਸਤਾਨ ਦੋਵਾਂ ਦੇਸ਼ਾਂ ਵਿੱਚ ਸੋਸ਼ਲ ਮੀਡੀਆ ਉੱਤੇ ਵਧਾਈਆਂ ਦਿੱਤੀਆਂ ਗਈਆਂ ਸਨ।
ਸਾਲ 2019 ਵਿੱਚ ਸਾਨੀਆ ਮਿਰਜ਼ਾ ਅਤੇ ਪਾਕਿਸਤਾਨੀ ਅਦਾਕਾਰਾ ਵੀਨਾ ਮਲਿਕ ਵਿਚਕਾਰ ਟਵਿੱਟਰ ਉੱਤੇ ਤਲਖ਼ੀ ਦੇਖੀ ਗਈ ਸੀ।
ਦਰਅਸਲ ਵੀਨਾ ਮਲਿਕ ਨੇ ਸਾਨੀਆ ਮਿਰਜ਼ਾ ਵਲੋਂ ਜੰਕ ਫੂਡ ਵਾਲੇ ਰੈਸਟੋਰੈਂਟ ਆਰਚੀ ਵਿੱਚ ਆਪਣੇ ਬੱਚੇ ਨੂੰ ਲੈ ਕੇ ਜਾਣ ਬਾਰੇ ਟਵੀਟ ਦੀ ਅਲੋਚਨਾ ਕੀਤੀ ਸੀ।
ਸਾਨੀਆ ਨੇ ਵੀਨਾ ਮਲਿਕ ਨੂੰ ਕਿਹਾ ਸੀ ਕਿ ਮੈਂ ਆਪਣੇ ਬੱਚੇ ਦਾ ਖਿਆਲ ਕਿਵੇਂ ਰੱਖਾਂ ਇਸ ਬਾਰੇ ਤੁਹਾਨੂੰ ਅਤੇ ਤੁਹਾਡੀ ਦੁਨੀਆਂ ਨੂੰ ਫਿਕਰ ਕਰਨ ਦੀ ਲੋੜ ਨਹੀਂ ਹੈ।
ਸਾਨੀਆ ਮਿਰਜ਼ਾ ਦੀਆਂ ਪ੍ਰਾਪਤੀਆਂ
ਤਸਵੀਰ ਸਰੋਤ, Getty Images
ਸਾਨੀਆ ਮਿਰਜ਼ਾ ਨੂੰ ਭਾਰਤ ਸਰਕਾਰ ਵਲੋਂ 2006 ਵਿੱਚ ਪਦਮ ਭੂਸ਼ਣ ਐਵਾਰਡ ਦਿੱਤਾ ਗਿਆ ਸੀ।
ਓਲੰਪਿਕਸ ਦੀ ਅਧਿਕਾਰਤ ਵੈੱਬਸਾਈਟ ਮੁਤਾਬਕ ਸਾਨੀਆ ਮਿਰਜ਼ਾ ਪਹਿਲੀ ਮਹਿਲਾ 'ਟੈਨਿਸ ਸੁਪਰਸਟਾਰ' ਹਨ।
ਸਾਨੀਆਂ ਮਿਰਜ਼ਾ ਨੇ 2009 ਵਿੱਚ ਪਹਿਲਾ ਆਸਟ੍ਰੇਲੀਆਈ ਓਪਨ ਮਿਕਸਡ ਡਬਲਜ਼ ਟਾਈਟਲ ਜਿੱਤਿਆ। ਇਹ ਟਾਈਟਲ ਉਨ੍ਹਾਂ ਨੇ ਮਹੇਸ਼ ਭੂਪਥੀ ਨਾਲ ਸਾਂਝਾ ਕੀਤਾ।
ਸਾਨੀਆ ਮਿਰਜ਼ਾ ਵੱਲੋਂ ਜਿੱਤੇ ਗਏ ਗ੍ਰੈਂਡ ਸਲੈਮਜ਼ ਟਾਈਟਲ ਦੀ ਸੂਚੀ ਵਿੱਚ ਫ੍ਰੈਂਚ ਓਪਨ, ਯੂਐੱਸ ਓਪਨ, ਵਿੰਬਲਡਨ, ਯੂਐੱਸ ਓਪਨ ਅਤੇ ਆਸਟ੍ਰੇਲੀਅਨ ਓਪਨ ਵੀ ਸ਼ਾਮਲ ਹੈ।
2005 ਵਿੱਚ ਸਾਨੀਆ ਮਿਰਜ਼ਾ ਹੈਦਰਾਬਾਦ ਓਪਨ ਜਿੱਤੇ ਸਨ, ਉਹ ਵਰਲਡ ਟੈਨਿਸ ਐਸੋਸੀਏਸ਼ਨ ਦਾ ਸਿੰਗਲਜ਼ ਟਾਈਟਲ ਜਿੱਤਣ ਵਾਲੀ ਪਹਿਲੀ ਭਾਰਤੀ ਖਿਡਾਰਨ ਬਣੇ।
2013 ਵਿੱਚ ਉਨ੍ਹਾਂ ਦੇ ਗੁੱਟ ਉੱਤੇ ਸੱਟ ਲੱਗਣ ਕਾਰਨ ਸਾਨੀਆ ਮਿਰਜ਼ਾ ਸਿਰਫ਼ ਡਬਲਜ਼ ਟੈਨਿਸ ਹੀ ਖੇਡਣ ਲੱਗੇ।
ਅਪ੍ਰੈਲ 2015 ਵਿੱਚ ਸਾਨੀਆ ਮਿਰਜ਼ਾ ‘ਵਰਲਡ ਟੈਨਿਸ ਐਸੋਸੀਏਸ਼ਨ’ ਦੀ ਡਬਲਜ਼ ਰੈਂਕਿੰਗ ਵਿੱਚ ਪਹਿਲਾਂ ਥਾਂ ਹਾਸਲ ਕਰਨ ਵਾਲੀ ਪਹਿਲੀ ਖਿਡਾਰਨ ਸਨ।
ਉਹ 21 ਮਹੀਨਿਆਂ ਦੇ ਕਰੀਬ ਪਹਿਲੇ ਸਥਾਨ ਉੱਤੇ ਟਿਕੇ ਰਹੇ ਸਨ।
ਸਾਨੀਆ ਮਿਰਜ਼ਾ ਚਾਰ ਵਾਰ ਓਲੰਪਿਕ ਵਿੱਚ ਖੇਡ ਚੁੱਕੇ ਹਨ। ਉਹ ਪਹਿਲੀ ਵਾਰੀ 2008 ਵਿੱਚ ਬੀਜਿੰਗ ਵਿੱਚ ਓਲੰਪਿਕ ਵਿੱਚ ਖੇਡੇ ਸਨ।
ਸਾਨੀਆ ਮਿਰਜ਼ਾ ਨੇ ਏਸ਼ੀਅਨ ਗੇਮਜ਼ ਵਿੱਚ ਅੱਠ ਤਗਮੇ ਆਪਣੇ ਨਾਮ ਕੀਤੇ ਹਨ।
