Flying Officer Tolulope Arotile: Nigerian Air Force hand over suspects in accident wey cause her death to police

Flying Officer Tolulope Arotile burial never pass 24 hours before Nigerian Air Force (NAF) officially handover to police di three suspects, wey dey involved in di incident wey lead to di death of Nigeria first ever young female combat pilot.

According to statement from Nigerian Air Force Director of Public Relations and Information, Air Commodore Ibikunle Daramola on Friday, 24 July, 2020 na Mr Nehemiah Adejoh, Mr Igbekele Folorunsho and Mr Festus Gbayegun dey involved for di accident wey kill late Flying Officer Tolulope Arotile.

As e dey give summary during di handover for NAF Base Kaduna, di Commander 453 Base Services Group (453 BSG), Group Captain Hadi Ahmed, remember how, on 14 July 2020, at about 4.30pm, one KIA Serento SUV, with Registration Number AZ 478 MKA (Kaduna), wey Adejoh drive, wit di 2 odas as passengers, knock down Flying Officer Tolulope Arotile wen she she bin dey waka along Air Marshal Ibrahim Alfa Road in NAF Base Kaduna, leading to her eventual death.

Group Captain Ahmed tok say di three pesins wey dey involved for di accident, wey be former schoolmates of di late Flying Officer for di Air Force Secondary School Kaduna, bin dey on dia way to visit di wife of one serving senior officer wey dey live inside di Base before di accident happun.

E tok say di NAF go continue to cooperate wit di Nigeria Police and provide all necessary support to enable police cari forward di case to its logical conclusion.

Remember say on 19 July, 2020 (days before Arotile burial) Nigeria Air force reveal di result of dia investigation into di death of di kontri first female combat helicopter pilot.

According to NAF, dia preliminary investigation reveal say, Arotile die as a result of "blunt force trauma and too much bleeding afta her secondary school mates jam her".

Di Nigeria Air force also tok say because di case na civil case, dem don hand am over to di Nigerian police and dem go charge di suspects go court accordingly.