Ghanaians lament power crisis, black out wey dey affect pipo and businesses

Ghanaians say dem dey frustrated about di fresh power crisis (dumsor) for di kontri wey dey affect dia life and businesses.

For weeks now, many parts of di kontri dey face power cut, without announcement.

For places wia di electricity company of Ghana (ECG) dey announce bifor dem quench di light, dem no dey follow di schedule.

Students, business pipo and oda residents across di kontri say dem dey suffer well well.

"At night, pesin no fit sleep sake of di heat, sometimes, we dey wake up wit sweat all ova," Samuel Aikins, one resident for Agbogba tok BBC News Pidgin.

Odas like Oga Inusah Ahmed wey get mechanic shop for Madina say di light fit go off for two straight days.

"Since last week, I neva get light for one full day for dis shop, everiday, dem dey quench di light and nobody dey tok us wetin dey go on."

Mathew Konga be govment worker wey dey work regular eight to five shift, but every time im return home, light no dey.

"Sometimes I dey carry my clothes go di office to iron sake of we no get power for my area for days – in fact, for three straight days, I dey return home to meet blackout. Di govment gatz fix dis wahala," e tok BBC News Pidgin.

Govment say dem dey roll out reforms for di energy sector wey go boost di capacity of di power producers to fix di wahala.

President Mahama say govment procure 2,500 transformers to fix across di kontri

Ghana president when im visit di Northern Electricity Distribution Company (Nedco) for 20 April tok say govment don procure 2,500 transformers.

"Di finance minister don support di energy ministry wit cash to procure dis transformers wey dem go use to replace di old ones wey don overstretch sake of increased demand."

Dem go fix dis transformers across di kontri to "improve power stability, replace old transformers and fix faults quick."

President Mahama say pipo for parts of di kontri go suffer power cuts when di engineers dey install di transformers.

Energy minister Dr John Abdulai Jinapor say dem go allocate 500 of di fresh transformers to di Northern Electricity Distribution Company (Nedco) wey dem go spread di rest across di oda parts of di kontri.

"Dem dey fix di transformers for Accra, wey di next phase go happun for Kumasi for di Ashanti region for May, wia we go fix fresh primary networks wey go stabilise power for Kumasi" Dr Jinapor explain.

Director General for di kontris electricity distributor (ECG), Julius Kpekpena tok for one press conference say dem dey roll out Ghc 3.46bn ($313m) programme wey go fix di challenge and make di system beta.

"We dey fix di new transformers, replace those wey scata wey we dey fix electricity poles wey also scata."

Oga Kpekpena say di oda phases involve building fresh sub-transmission links, and oda feeder infrastructure to reduce pressure for di overloaded lines.

Ghana grid company CEO chop suspension afta fire outbreak for Akosombo power station

Di kontri power crisis wey dey affect pipo now become worse afta fire burn one power station for Akosombo for di Eastern region.

Di fire burn di station wey be key part of di kontri power transmission system, wey e cause emergency power shutdown.

Officials tok say di fire wey scata di control system of di power station destroy tins wey knock out between 720 and 1,000 megawatts of di transmission capacity.

Na so di energy minister Dr John Abdulai Jinapor order say make di CEO for di Ghana Grid Company (Gridco) Engineer Mark Awuah Baah, step aside for investigations.

According to di minister, di suspension of di grid company boss be to allow "independent and transparent investigation for di cause of di fire and di extent of di damage to di power station."

As part of oda measures to fix di power sector wahala, govment dey shake up di leadership of di power distribution company for di Ashanti region.

Meanwhile, di electricity company say make pipo give dem time to fix di problem but residents say make di power distributor give dem timetable make dem take plan dia life and dia business.

Ghana suffer one of di worst power crisis (dumsor) for 2013 wey affect many citizens and dia businesses.

Photos from di Akosombo power station wey catch fire