All di charges against ex-Kaduna State govnor Nasir El-Rufai

For di past two months now, former govnor of Kaduna State, Nasir El-Rufai don dey face separate charges from different federal agencies for Nigeria.

Di court room don become El-Rufai second home as dis federal agencies dey drag am go court on accusation of im alleged unlawful interception of communication, corruption, breach of national security, among odas.

Dis cases dey go on separately as di Department of State Services (DSS) arraign am bifor di Federal High Court for Abuja while di Independent Corrupt Practices and Other Related Offences Commission (ICPC) arraign am bifor di Federal High Court for Kaduna.

On Thursday, di DSS arraign El-Rufai bifor di Federal High Court on amended five-count charges on top accuse say e tap di phone lines of di National Security Adviser, Nuhu Ribadu.

Also, di ICPC sama am nine-count charges, accusing di former govnor of corruption-related offences but e also plead not guilty to dis charges.

While di Economic and Financial Crimes Commission (EFCC) detain am for dia custody for February on di allegations of corruption but dem neva arraign am bifor di court.

Here na di break down of di charges against El-Rufai by ICPC and DSS.

DSS sama El-Rufai amended five-count charges

DSS bin sama El-Rufai three-count charges but amend am to five-count charges, on top accuse say e tap di phone lines of di National Security Adviser, Nuhu Ribadu.

Di arraignment take place for di Federal High Court dis Thursday bifor Justice Joyce Abdulmalik.

Wen dem call di case for court, counsel to di DSS, Oluwole Aladedoye (SAN) tell di court say di mata na for di defendant to take im plea, but dem don amend di charges from three to five, and dem file di amended charges on April 13.

Di ex-govnor don plead not guilty to dis charges.

Count one: Say El-Rufai unlawfully and intentionally interfere wit di communication of di National Security Adviser, Nuhu Ribadu, and dis na crime punishable under section 5(1) of di Cybercrime (Prohibition, Prevention) Act of 2024.

Dis offence carry a maximum punishment of 10 years witout option of fine.

Count two: Say El-Rufai witout authorisation, intentionally secure access to classified information by di NSA, and dis na offence contrary to section 6(2) of di Cybercrime (Prohibition, Prevention) Act of 2024.

Pesin wey court find guilty of dis offence dey face seven years imprisonment or fine of seven million naira, or both.

Count three: Say El-Rufai intentionally and witout authorisation intercept di communications of di NSA, and dis na violation of section 12(1) of di Cybercrime (Prohibition, Prevention) Act of 2024. Two years in prison or fine of five million naira, or both, na im pesin fit chop if court convict am of dis offence.

Count four: Say El-Rufai know, aid, abet, procure or relate wit individual wey unlawfully intercept wit di communications of di NSA, and dis offence dey against section 27(1)(b) of di Cybercrime (Prohibition, Prevention) Act of 2024.

To aid or abet pesin wey commit cybercrime carry di same punishment as di pesin wey actually commit di offence.

Count five: Say El-Rufai bin use technical equipment or system wey compromise public safety, national security, and put reasonable apprehension of insecurity among Nigerians, as e unlawfully intercept di communications of di NSA.

Di offence violate section 131(2) of di Nigeria Communications Act of 2003, and e carry punishment of one year in prison or one million naira fine, or both.

Justice Joyce Abdulmalik adjourn di mata to 18, 19, and 20 of May for continuation of di trial.

ICPC sama El-Rufai amended nine charges

Di ICPC bin arraign El-Rufai for March bifor di Kaduna State High Court on 10-count charges but amend am to nine-count charges on 13 April.

El-Rufai bin plead not guilty to dis charges.

Count one: ICPC tok say for December 2016, while e dey serve as govnor, El-Rufai use false pretences to make Kaduna State Govment pay 11 billion naira to Indokaduna MRTS JV Nigeria Limited, di commission tok say na unregistered entity, for light rail project, wey dem no execute.

Dis dey against di Advance Fee Fraud and Oda Fraud Related Offences Act, 2006.

Count two: Dem accuse El-Rufai say e use im office for corruption advantages.

Count three: ICPC tok say for January 2023, Mr El-Rufai approve and collect 289.8 million naira as severance allowance, wey pass di legal approved sum of about 20 million naira.

Di commission say extra payment na part of unlawful activity, wey dey against Money Laundering (Prevention and Prohibition) Act, 2022

Count four: ICPC tok say between September 2017 and March 2023, e collect $320,800 wey dem pay in parts into im Guaranty Trust Bank domiciliary account from one Joel Adoga, wey be proceeds of corruption.

Count five: ICPC tok say for May 2022, El-Rufai bin collect $155,800 into di same account from Peter Akagu Jones, wey dey hide, and di money na proceeds of unlawful activity.

Count six: ICPCdey accuse El-Rufai say e collect $305,300 for May 2022 from Ajayi Ayodele and di money na proceeds of unlawful activity.

Couth seven and eight: ICPC tok say e collect $5,000 each for April and June 2016 from different pipo, wey be proceeds of unlawful activity.

Di commission also accuse di former govnor say e collect oda money for foreign currency and e hide di source.

Wetin happun bifor El-Rufai court mata start?

For February dis year, El-Rufai tok for interview wit Arise TV say e get pesin wey tap di NSA phone lines, and na dat pesin tell am say di NSA dey behind di plot to arrest am.

Dis na just days afta one failed attempted arrest happun for Nnamdi Azikiwe International airport, wen e bin return from Egypt.

Afta dis El-Rufai, accuse Ribadu say im wan import about 10 kilograms of thallium sulphate, wey dey highly toxic and strictly regulated for Nigeria.

Di EFCC first arrest El-Rufai for February, den ICPC quickly arrest am and detain am for dia custody afta e visit dia office to provide clarification on some allegations.

While e dey for dia custody dem raid im house for Abuja.

El-Rufai later file 1 billion naira lawsuit against ICPC for di "illegal search for im house".

Di ICPC and DSS don arraign am for court while EFCC say dem need to gada more investigations against am.