Who be di new Service Chiefs as Tinubu make major changes in military leadership

Nigeria President Bola Tinubu don appoint General Olufemi Oluyede to replace General Christopher Musa as di new Chief of Defence Staff.

Di Special Adviser to di President on Media and Public Communication Sunday Dare give di informate for one statement on Friday 24 October.

Di new Chief of Army Staff na Major-General W Shaibu. Air Vice Marshall Sunday Kelvin Aneke na di Chief of Air Staff, while Rear Admiral I Abbas na di new Chief of Naval Staff. Chief of Defence Intelligence Major-General EAP Undiendeye retain im position.

Dare say di changes na in furtherance of di efforts of di federal govment to strengthen di national security architecture.

"Di President, Commander-in-Chief of di Armed Forces, express most profound appreciation to di outgoing Chief of Defence Staff, General Christopher Musa and di oda Service Chiefs for dia patriotic service, and dedicated leadership.

"Di President charge di newly appointed service chiefs to justify di confidence reposed in dem to further enhance di professionalism, vigilance and comradeship wey define di Armed Forces of Nigeria," di statement tok.

Dare say all di appointments take immediate effect.

Dis dey come as tori still dey fly up and down say 16 senior military officers bin allegedly plan coup against President Tinubu.

General Olufemi Oluyede (Chief of Defence Staff)

General Olufemi Oluyede na 57 years old military man wey bin serve as di Chief of Army Staff. Bifor den, e bin serve as di 56th Commander of di elite Infantry Corps of di Nigerian Army wey dey based for Jaji, Kaduna.

Dem commission Oluyede as second lieutenant for 1992 but dey effective from 1987.

General Oluyede na former Platoon Commander and adjutant for 65 Battalion, company commander for 177 Guards Battalion, Staff Officer Guards Brigade, Commandant Amphibious Training School.

E don participate for several operations wey include di Economic Community of West African States Monitoring Group (Ecomog) Mission for Liberia, Operation HARMONY IV for Bakassi, and Operation HADIN KAI for di North East theatre of operations wia e command 27 Task Force Brigade.

General Oluyede don earn many honours for im service for various fields of operations.

Some of dis honours include di Corps Medal of Honour, di Grand Service Star, Passing di Staff Course, and Membership for di National Institute.

Oda honour include Field Command Medal, di Field Command Medal of Honour, and di Field Training Medal.

General Oluyede don receive di Chief of Army Staff Commendation Award wey many officers dey look forward to.

Major-General W Shaibu (Chief of Army Staff)

Major General Waidi Shaibu na Nigerian Army officer wey recently serve as di Theatre Commander of Operation HADIN KAI, wit focus on counter-terrorism for di northeast.

E bin hand ova command for April 2025 to Major General Abdulsalam Abubakar.

Bifor im appointment as Theatre Commander, im be GOC of 7 Division and Commander Sector 1 of Operation HADIN KAI.

Oda previous roles na Deputy Commandant/Director of Studies for di National Defence College for Abuja.

Sunday Kelvin Aneke (Chief of Air Staff)

Air Vice Marshal Sunday Kelvin Aneke na di new Chief of Air Staff.

Dem born am for Makurdi, Benue State for 1972 to di family of Air Warrant Officer Sylvester and Mrs Ngozi Aneke.

S.K Aneke start im military career on 10 September 1988 wen e join di Nigerian Defence Academy as member of di 40th Regular Course. E become pilot officer of di Nigerian Air Force on 10 September 1993.

E get Bachelor of Science Degree (Bsc) in Physics, Post Graduate Diploma in Management from di University of Calabar, Masters in International Affairs and Diplomacy from Ahmadu Bello University Zaria, Masters in Political Economy and Developmental Studies from di University of Abuja and Masters in Strategic Studies from di Air War College United State Air Force Air University Montgomery Alabama.

E also don previously hold di post of Deputy Commandant of di Nigerian Defence Academy.

Rear Admiral Idi Abba (Chief of Naval Staff)

Rear Admiral Idi Abbas na from Tudun Maliki for Kano State.

E don previously serve as Flag Officer Commanding (FOC) Central Naval Command and Director of Operations for Naval Headquarters.

For 2022, Abbas help coordinate anti-crude oil theft operations and maritime patrols across di Niger Delta.

For June 2020, e command di Nigerian Navy Ship (NNS) to oversee joint effort against piracy and illegal bunkering.

Dem appoint am as di Chief of Naval Safety and Standards for 2023, following di reshuffle for June of di same year.