Trump trips, email between 'A' and Maxwell about 'girls' - Takeaways from new Epstein files authorities release

Di US Department of Justice don release dia latest - and largest - batch of Jeffrey Epstein files on Tuesday.

Di 11,000-plus documents na di continuation of one stream of released information wey start on Friday, di deadline wey one new law compulsorily order di department to publicly release all di investigative files dem get on di deceased paedophile and financier.

For most of di documents wey dem release on Tuesday, di FBI don already edit some informate and cover some names, including di names of pipo wey di FBI cite as possible co-conspirators for di Epstein case.

Di justice department dey face accuse from lawmakers and politicians from both sides sake of di amount of editing dem do, wey di law specifically tok say dem fit do only to protect di identity of victims or active criminal investigations.

US President Donald Trump name bin appear well-well for dis new documents pass di ones dem release bifor.

Many na media clippings wey mention im name, but one notable email from one federal prosecutor show say Trump fly on Epstein jet.

Di justice department tok say some files "contain untrue and sensationalist claims" about Trump.

Say pesin name dey mentioned for di Epstein files no indicate wrongdoing. Di BBC don request for comment from individuals wey dia names show for our reporting.

Email exchange between 'A' and Ghislaine Maxwell about 'girls'

Out of di thousands of pages wey dey for dis latest release, one 2001 email wey one pesin wey dey identified as "A" stand out.

Di message, to Epstein paddy and close associate Ghislaine Maxwell, tok say "A" dey for "Balmoral Summer Camp for di Royal Family".

"A" come ask Maxwell, wey dem sentence to 20 years in prison for 2022 for sex trafficking of minors and oda offences: "You don help me find some new inappropriate friends?"

For anoda email wey e send later dat day, Maxwell write back: "So sorry to disappoint [sic] you, however I gatz tok true. Na only appropriate friends I don see."

Dem send di "A" email from di address [email protected], and di sender name show as "The Invisible Man".

One foto from one Epstein files wey dem don release bifor show different, but similar email - [email protected] – wey dey listed for Epstein phone book under one contact titled "Duke of York".

Anoda exchange for di new files between Maxwell and "The Invisible Man" bin tok about one trip to Peru.

For October, Andrew Mountbatten-Windsor bin lose im Duke of York title sake of im links wit Epstein.

E repeatedly don deny wrongdoing, and tok say im no "see, witness or suspect any kain behaviour wey later lead to im [Epstein] arrest and conviction".

BBC don contact Andrew Mountbatten-Windsor team for response.

FBI email list out 10 alleged co-conspirators to Epstein

Among di documents wey dem release na emails wey appear to dey sent between FBI personnel for 2019 wey mention 10 possible "co-conspirators" of Epstein.

Di emails say six out of di 10 co-conspirators don receive subpoenas. Dis include three for Florida, one for Boston, one for New York City, and one for Connecticut.

Dem neva send four subpoenas wey dem neva serve, wen dem send di emails, including to one "wealthy businessman for Ohio".

Anoda email wey dey sent to FBI New York give update on di co-conspirators. Dis time, e appear to mention multiple names. Dem don remove most from di file.

Dem no remove two names – (Ghislaine) Maxwell and Wexner.

One email say, "I no know about Ohio contacting Wexner".

Di DOJ reason say dis email dey refer to Former Victoria Secret CEO Les Wexner, wey bin get public friendship wit Epstein.

For 2019, Wexner tok say im dey "embarrassed" wit im ties to di financier.

Lawyers for Wexner tell BBC News say "di assistant U.S. attorney in charge of di Epstein investigation bin tok at di time say Mr. Wexner no be co-conspirator nor target"

"Mr. Wexner cooperate fully by providing background information on Epstein and dem no contact am again," dem tok.

Possible co-conspirators for Epstein crimes na major focus for im victims, and for several lawmakers wey don demand for more transparency from di DOJ.

"10 co-conspirators dey wey we no know say di DOJ dey torchlight," Democrat Congressman Suhas Subramanyam tell BBC News on Tuesday.

Subramanyam, wey dey chair di House Oversight Committee, add say im bin also dey "concerned" ova di level of redactions wey protect names of lawyers and pipo wey no be victims.

Lawmakers for di two parties say dem dey explore legal options to force more transparency.

Di law wey Congress pass and wey President Trump sign tok say names and information wey fit dey embarrassing or cause "reputational harm" no dey allowed to be redacted and specifically ask di justice department for internal communications and memos detailing who dem investigate and decisions concerning "to charge, not charge, investigate, or decline to investigate Epstein or im associates".

Justice Department say Epstein letter to Larry Nassar na fake

One letter wey dey di released batch of documents bin get plenty attention online. But, according to di justice department na fake.

Di handwritten letter and envelope at first bin appear to show say Epstein bin write to Larry Nassar, di former USA Gymnastics doctor wey dey serve decades for prison for sexually abusing young female athletes.

"As you know by now I don take di 'short route' home. Good luck!" di fake letter tok. "We share one tin…our love & caring for young ladies plus di hope say dem go reach dia full potential."

Di writer sign am wit, "Life is unfair, Yours, J. Epstein."

Di letter no deliver, and dem send am back to one Manhattan jail wia dem detain Epstein bifor im death.

Dem alert di FBI to di returned letter and request analysis of am. Dem also include di request for di releases batch of documents.

Di justice department on Tuesday call di letter fake, as dem note several irregularities wit di note and di envelope di pesin use.

"Di writing no match Jeffrey Epstein," di justice department post on X.

"Di return address no list di jail wia dem detain Epstein and e no include im inmate number, wey dey required for outgoing mail," dem add.

Officials point say di postmark wey dey di envelope na from northern Virginia - meanwhile Epstein dey for detention for New York. Also, di date for di postmark na 13 August 2019, three days afta Epstein death.

Even bifor di justice department announce say di letter na fake, documents don raise immediate questions.

Di return sender bin dey listed as "J. Epstein" for "Manhattan Correctional" - but di correct name for di now-shutdown jail na "Metropolitan Correctional Center".

Di documents DOJ release on Tuesday also show di analysis request by di FBI.

One FBI laboratory request tok say for August 2019, one sender listed as "J. Epstein" for "Manhattan Correctional" bin try to send letter to "Larry Nassar for 9300 S. Wilmot Road, Tucson, Arizona, 85756", di address of one federal prison.

Nassar currently dey locked up for Pennsylvania, according to di Bureau of Prisons.

Trump travels ontop Epstein private jet

Trump name appear more for dis files pass di oda batches of documents wey di justice department release.

Notably, for one January 2020 email, one federal prosecutor for New York write say newly received flight records "show say Donald Trump bin travel on Epstein private jet many more times pass wetin dey reported bifor (or wey dem dey aware of)".

Di recipient of di email dey redacted.

Trump bin dey listed as a passenger on "at least eight flights between 1993 and 1996", and Ghislaine Maxwell dey present on at least four of dos flights, di prosecutor write.

Trump also dey "listed say e travel wit im daughter, Marla Maples, im son, Eric and odas at various times".

Trump bin dey married to Marla Maples, Tiffany mother, from 1993 to 1999.

Di prosecutor also write say "on one flight for 1993, im and Epstein na di only two listed passengers; on anoda, di only three passengers na Epstein, Trump, and den-20-year-old", dem hide di third passenger name.

"On two oda flights, two of di passengers na women who go be possible witnesses for Maxwell case."

Di timing of di trips match wit di years wey federal prosecutors dey examine Maxwell conduct and travels as part of di criminal case dem bring against her.

Court later find her guilty of conspiring wit Epstein to recruit and sexually abuse minors.

But for di files wey dem release on Tuesday, many of di oda mentions of Trump name na press clippings wey mention am, im campaigns, and oda news moments.

Trump don repeatedly deny wrongdoing in regard to Epstein.

For one statement wey follow Tuesday release, di Department of Justice say di new files "contain untrue and sensationalist claims made against President Trump wey FBI receive right bifor di 2020 election".

"To be clear: di claims no dey proven and dem be fake, and if dem get any piece of credibility, dem for don use am as weapon against President Trump already," di justice department tok.

Fake video of Epstein dey included

Among one of di oda entries for Tuesday document wey drop na one fake video wey show one Epstein-like figure inside prison cell, wey don raise questions of how e appear for di department official files.

Oda documents show say one man from Florida bin send email to federal investigators for March 2021 wit one link to di video. E ask if e dey real, but na fake.

BBC Verify use reverse image search to find a copy of di video wey pesin upload to YouTube for October 2020. Di user wey post am tok say dem create di clip wit 3D graphics.

According to one 2023 report by di Bureau of Prisons, no video recording from inside Epstein cell on di day of im death dey exist.

Di fake video inclusion for dis release shed light on di questions wey federal authorities don receive from di general public, many of dem afta dem hear conspiracy theories or get doubts for years, want answers about Epstein life and death.

Shayan Sardarizadeh contribute to dis report.