'No be us arrest Nnamdi Kanu for Kenya, we no dey work outside Nigeria' - DSS

Di Department of State Services (DSS) don deny say na dem arrest di leader of di Indigenous People of Biafra (Ipob), Nnamdi Kanu, for Kenya for 2021, carry am by force come back Nigeria.

Second prosecution witness for di case identified as Mr BBB from di office of di Department of State Services wey lead di investigation against Kanu, yarn dis one for court on Wednesday 21 May wen di Ipob leader lawyer Paul Erokoro (SAN) cross-examine am.

Di Nigerian goment dey accuse Kanu of terrorism.

Wen Kanu lawyer ask am weda e know di meaning of di word "rendition", di witness ansa say e know di meaning but no be how dem dey operate.

"So you no dey aware say na DSS pipo bin arrest di defendant for Kenya?" Erokoro ask am. E ansa: "I no know who bin arrest am, but I dey very sure say no be DSS. We be internal security agency, we no dey work outside di shores of Nigeria."

Also, as di cross-examination continue, Erokoro ask di witness about di crisis for Lagos wey di DSS accuse Kanu say e incite im pipo to burn goment buildings and vehicles.

How many buses dem burn? Wetin be dia plate numbers? Wetin be di model of di buses? Wetin be di name of at least one pesin wey follow burn dis vehicles, Erokoro ask, and BBB say e no know.

Also, about di accuse say Kanu supporters burn down Lagos High Court and di airport, BBB say e no know di names of di pipo wey burn am, but dem dey follow di order wey Kanu bin give dem for im broadcasts.

"Wetin be di name of di police stations for Enugu and Ebonyi wey you say Kanu bin order im supporters to burn down," BBB say e no know.

Erokoro also tender as evidence, one high court judgement wey award one billion naira damages to di secessionist leader sake of how army bin invade Kanu house for 2017.

BBB, for im examination in chief, bin tell di court for di last adjourned date say dia evidence establish say Kanu social media broadcast dey directly connected to di violence and killings wey dey happen for di southeast.

During di cross-examination, Erokoro ask Mr BBB weda e dey aware say soldiers bin invade Kanu house for 2017, and dat period na wen Kanu bin dey meet wit some govnors of di southeast on how peace go return to di region. Erokoro ansa say na from Kanu mouth e hear am.

Erokoro den show di court di judgement of Justice Benson Anya of di Federal High Court Umuahia on January 19, 2022, wey tok say di military invasion of Nnamdi Kanu House dey illegal and unconstitutional, and say make di Nigeria goment pay Kanu one billion naira in damages.

Di lawyer also present two oda court judgements to di court - one from Federal High Court Umuahia on October 26, 2022, and di oda na from di Federal High Court Enugu on October 26, 2023.

Trial judge, Justice James Omotosho accept di documents as evidence and mark dem PWL, PWM, and PWN respectively.

In response, Mr BBB say im no dey aware of dis court judgements and im job na to investigate di allegations wey di Attorney General of di Federation bin bring against Kanu.

'No be DSS arrest Nnamdi Kanu for Kenya'

Di witness also deny di allegation say na DSS pipo bin arrest Kanu for Kenya in 2021, carry am by force come back Nigeria.

Wen Kanu lawyer ask am weda e know di meaning of di word "rendition", di witness ansa say e know di meaning but no be how dem dey operate.

"So you no dey aware say na DSS pipo bin arrest di defendant for Kenya?" Erokoro ask am. E ansa: "I no know who bin arrest am, but I dey very sure say no be DSS. We be internal security agency, we no dey work outside di shores of Nigeria."

Also, as di cross-examination continue, Erokoro ask di witness about di crisis for Lagos wey di DSS accuse Kanu say e incite im pipo to burn goment buildings and vehicles.

How many buses dem burn? Wetin be dia plate numbers? Wetin be di model of di buses? Wetin be di name of at least one pesin wey follow burn dis vehicles, Erokoro ask, and BBB say e no know.

Also, about di accuse say Kanu supporters burn down Lagos High Court and di airport, BBB say e no know di names of di pipo wey burn am, but dem dey follow di order wey Kanu bin give dem for im broadcasts.

"Wetin be di name of di police stations for Enugu and Ebonyi wey you say Kanu bin order im supporters to burn down," BBB say e no know.

DSS DG, T.Y Danjuma bin also call for self defence - Kanu lawyer tell court

Barr Erokoro also ask di witness weda e know say retired Army General T.Y Danjuma bin don call on Nigeria citizens to stand up and defend diasef bicos di security forces dey collude wit terrorists. Mr BBB say e know say T.Y Danjuma tok sometin like dat but e no remember exactly wetin e tok.

Erokoro also ask BBB weda e also dey aware say even di Director General of di DSS Adeola Ajayi bin tok recently say make pipo stand up and defend diasef against bandits and terrorists.

E give example of wia di DSS DG bin tell di story of how pipo for Azare community for Bauchi State bin fight back and kill plenty Boko Haram pipo wey attack dem.

"Shey no be di same tin di defendant dey tok for im broadcasts, say if pesin wan kill you make you first kill am?" Erokoro ask.

To dis, oga BBB say im no dey aware of di comments by di DSS DG, and im know say wetin Kanu dey tell im followers dey different from ordinary self defence.

At dis point, Erokoro ask di court for adjournment until Thursday, May 22, 2025, so dem go get ready wit some tapes wey dem wan play for di court.

Lawyer to di federal goment, Adegboyega Awomolo object to di application and ask di defence team to continue wit di cross-examination.

However, Justice Omotosho grant di adjournment, but warn say di cross-examination gatz dey concluded on di next adjourned date "or I go deem am concluded".

Court warn Ejimakor on misconduct

Bifor di hearing start for di day, Justice Omotosho warn some of di lawyers to di defendant for wetin e call 'unprofessional conduct'.

Awomolo, di FG lawyer bin vex as e tell di court say wetin dem dey see on top social media and di press about di trial, dey embarrassing. E even ask di judge to give order make pipo no dey enter di courtroom wit dia phones.

Reacting to dis, di judge tell di lawyers make dem no dey distracted wit fake news on top social media, but to focus on di trial and finish am as fast as possible.

"Some pipo wey dey post dis tins na content creator, and dem just dey use di name of di defendant to generate traffic to dia pages," e tok.

Justice Omotosho, however warn one of Nnamdi Kanu lawyers, Aloy Ejimakor, wey e tok say e dey post sensitive court issues and documents on top im social media.

"Dis na misconduct, and tins like dis fit make dem debar somebody," e tok.