له تېر يوه کال راهيسته په سوات کې پاکستاني پوځيان له وسله والو سره په اخ و ډب کې دي .

دغه کسان تېره ورځ ناوخته د سوات په ماتا سيمه کې د اورپکو د څو (کمين) له امله وژل شوي دي .

په سيمه کې عيني شاهدانو ويلي چې د پاکستان د استخباراتو د ادارې دغه درې کسان په موټر کې سپاره ول چې د وسله والو له کمين سره مخامخ شول .

په سيمه کې د وسله والو اسلام پالو يوه وياند ويلي چې دغه کسان دوى وژلي، ځکه چې دوى هغه دوه کسان سخت ځورولي وو، چې د زندان پر مهال يې ترېنه تحقيق کاوۀ .

ياده دې وي چې له تېر کال راهيسته پاکستاني پوځ د ماتا په سيمه کې، چې د وسله والو پټنځايونه پکې شته، د اسلام پالو اورپکو پر وړاندې يو شمېر عمليات کړي .

د پاکستان د پوليسو يوه افسر بي بي سي ته د نامۀ له ښودلو پرته ويلي چې د استخباراتو دغو درو کسانو ته تر ١٢ ډېرو وسله والو کمين نيولى و، چې اوس د دغو ارپکو د نيولو هڅې روانې دي .

گرځبنديز

له پېښې وروسته، پاکستاني پوځيانو په سيمه کې گرځبنديز لگولى، د وسله والو په اړه څېړنې روانې دي، چې په تور يې ځينې شکمن کسان هم نيول شوي دي .

عيني شاهدانو ويلي چې پاکستاني پوځيانو پر ځينو ځايونو بريدونه هم کړي، چې گنې وسله وال به دلته پټ وي .

د وسله والو يوه وياند مسلم خان ويلي :'' د پاکستان د څارگرې ادارې د پوښتنو گروېږنو پرمهال هغه دوه ځورول شوي بنديان اوسمهال په روغتون کې تر درملنې لاندې دي، چې څښاک او خوراکه لوېدلي دي .''

له دې سربېره چې په سيمه کې د وسله والو اسلام پالو د مشر مولانا فضل الله او پاکستاني حکومت ترمنځ د اوربند تړون شوى، خو رپوټونه وايي چې په سوات کې امنيتي حالت د اندېښنې وړ دى .

تېره مياشت هم وسله والو په دغه سيمه کې يوه هوټل ته اور ورته کړي و .