ايمل پسرلى له لندنه

	د کړکيچ نړيواله اداره وايي د پاکستان پر پوځ بايد فشار واچول شي چې د طالب پلو اورپکو ډلو له خوشالولو لاس واخلي

دغه اداره په خپل اوږدۀ رپوټ کې ليکي چې وسله وال طالبان اوس افغانانو ته د خپل پيغام د رسولو لپاره له بيلا بيلو او پېچلو لارو کار اخلي.

د رپوټ په وينا وسله وال طالبان له ويبپاڼې ، مجلې ، شپې پاڼو ، ډي وي ډي ، کسيټې او ان د گرځنده ټيلې فونونو له ليکليو پيغامونو گټه اخلي .

په دغو خبرو کې د رپوټ په وينا وسله وال طالبان ځانونه د پخواني شوروي اتحاد د ځواکونو پر ضد د جهاد زيږينده بولي . ځانونو ته مشروعيت ورکوي او خپل ځواک پياوړي گڼي .

د کړکيچ د نړيوالې ادارې په وينا د وسله والو طالبانو ډير مطالب په پښتو ژبه خپريږي خو نړيواله ټولنه چې په پښتو نه پوهيږي نو په دغه ډول ډيرو خبرو نا خبره پاتې کيږي .

د کړيکيچ نړيواله اداره د ولسمشر کرزي حکومت ته مشوره ورکوي چې د اطلاعاتو مخه دې نه نيسي بلکې ولس ته دې پر وخت لا ډير معلومات ورکړي .

د ملکي کسانو د وژنې د ادعاو په څير پېښو کې دې ژر ځواب ووايي او د نيول شويو مخالفينو محاکمې دې ښکاره وکړي .

د کړکيچ اداره د ولسمشر کرزي حکومت ته دا مشوره هم ورکوي چې د هغو کسانو له بخښنې دې لاس واخلي چې قانون ماتوي .

په دغه ډول کسانو کې که لوړ پوړي چارواکي هم وي بايد د خپلو جرمونو له امله محاکمه شي .

د کړکيچ اداره په افغانستان کې مېشتو نړيوالو ځواکونو ته سلا ورکوي چې د پاکستان پر پوځ دې فشار واچوي چې د طالب پلوه اورپکو او هغو افغان باغي ډلو له خوشالولو لاس واخلي چې د پاکستان له خاورې فعاليت کوي .

رپوټ دا سپارښتنه هم کوي چې د کابل او په اسلام اباد کې د خلکو په رايو د راغلي حکومت ترمنځ بايد د خبرو اترو له لارې د مسايلو حل وهڅول شي .

پر بهرنيو ځواکونو دا ټينگار هم شوى چې يوازې له بهرنيو خبريالانو سره تماس ونه لري بلکې له ځايي ورځپاڼه ليکوونکو سره هم اړيکي ټينگې کړي .

ځايي ژبې دې زده کړي ، د ملکي کسانو د وژنې په څير پېښو کې دې بشپړه پلټنه ترسره کړي او دا دې يقيني کړي چې پړۀ کسان به محاکمه کيږي .

رپوټ مرستندويانو ته په دې مشوره پاى ته رسيږي چې په افغانستان کې دې د قضايي اصلاحاتو پر ترسره کولو ټينگار وکړي .