د روان ميلادي کال له پيله پاکستان کې له اورپکو سره په نښتو او ځانمرگو بريدونو کې شاوخوا ٥٠٠ کسان وژل شوي

چارواکي وايي ځانمرگى بريد د پوليسو د يوه افسر جاويد اقبال مستي خېل د جنازې مراسمو پر مهال وشو.

د سوات ښار امنيتي مسوولين وايي په دې چاودنه کې د يوه تاڼه دار په گډون يو شمېر نور دولتي چارواکي هم وژل شوي دي .

د پوليسو يو لوړ پوړى چارواکى جاويد اقبال پرون سهار وزيرستان ته څېرمه په لکي مروت کې د څلورو پوليسو په گډون د يوه ځاى پرځاى شوي ماين له امله ووژل شول .

د سوات امنيتي چارواکي وايي چې په دې يېښه کې د دوو سيمه ييزو مشرانو په گډون شاخوا ٤٠ کسان وژل شوي او شاخوا ٥٠ نور ټپيان شوي دي .

په اسلام اباد کې دولتي چارواکو هم منلې چې دا يو ځانمرگى بريد و .

ددوى پروينا، بريد کوونکى د جنازې د لمانځه په لومړي يا دويم صف کې ولاړ و چې له امله يې نژدې ولاړو پوليسو ته ډېره مرگ ژوبله اړولې ده .

د چارواکو پر وينا په دې بريد کې ټپيان د سوات او پېښور روغتونونو ته لېږدول شوي دي .

د يادونې وړده چې د روان ٢٠٠٨ ميلادي کال راپدېخوا پاکستان کې له اورپکو سره په نښتو او ځانمرگو بريدونو کې شاخوا ٥٠٠ کسان وژل شوي دي .