پوليس وايي يوه ښځه چې توره برقع يې اغوستې وه د پوځيانو يوۀ مرکز ته ورنژدې شوه او ځان يې والوزاوۀ

پوليس وايي په چادري کې پوښلې ځانوژونکې ښځه د پوځ يوې پوستې ته ورنژدې شوه او ځان يې والوزاوۀ چې يوازې خپل ځان يې وواژه.

چارواکي وايي دا په پاکستان کې د خپل ډول لومړنى داسې بريد دى.

سرحد ايالت د پاکستان تر ټولو نارامه سيمه جوړوي چې پکې وخت په وخت چاودنې کېږي. په تېرو مياشتو کې ځانمرگو بريدونو او چاودنو په پېښور کې گڼ کسان وژلي.

په يوه بله پېښه کې طالب پلوه اورپکو په قبايلي سيمه کې شپږ پوليس وتښتول او د دوى پوسته يې ور والوزوله.

دا پېښه د باجوړ ولسوالۍ مرکز خار ښارگوټي ته نژدې شوې چې دا هم د سرحد ايالت اړوند ده.

طالب پلوه اورپکو په وروستيو کې په سرحد ايالت او قبايلي سيمو کې پر حکومتي ځواکونو خپل بريدونه خورا پراخ کړي دي. مخکې دوى تر ٣٠٠ زيات پوځيان له خپلو پوستو او د جگړې له ډگره تښتولي وو.