پنځه کلن ماشوم د درې متره اوږده مار له چیچلو وروسته ژوندی پاتې شوی

یوې درې متره اوږدې اژدها پنځه کلن اسټرالیایی ماشوم چیچلی، ترې تاو شوی او له ځان سره یې د اوبو ډنډ ته لېږدولی، خو ماشوم ژوندی پاتې شوی.

د بیایو بلاک نومي ماشوم پلار یوې ځايي راډیو ته ویلي، ماشوم په خپل کور کې و چې مار ورغلی او حمله یې پرې کړې. وروسته د ماشوم نیکه په داسې حال کې ماشوم د لامبو له ډنډه ایستلی چې اژدها یې لا هم په بدن پورې نښتی و او د ماشوم پلار ترې بیل کړی.

د ماشوم پلار وايي، دی یوازې برسېرن ټپي شوی دی. د بیایو پلار بین ملبورن راډیو ۳ اې ډبلیو ته په دې هکله وویل: ''کله چې مو وینې ترې پاکې کړې او ورته مو وویل چې دی به نه مړ کېږي، ځکه مار زهرجن نه و، دی خورا ښه دی. ''

نوموړي زیاته کړه د ماشوم ټپونو څارنه به کوي، چې پاړسوب و نه کړي. هغه وویل: ''ګومان کوم بیایو د ډنډ پر غاړه ګرځېد، اژدها همالته چېرې پټ او د ښکار لټون یې کاوه، چې د بیایو په بڼه یې موندلی او برید یې پرې کړې. ''

نوموړی وايي، د بیایو ۷۶ کلن سملاسي ډنډ ته ټوپ کړي، مار او ماشوم یې دواړه راایستلي، چې تر دې مهال د ماشوم پلار هم هلته رسېدلی او ماشوم یې د مار له محاصرې خلاص کړی. بین وايي، لږ ځنډ ته له ماشوم سره بوخت شو او بیا یې مار بېرته خوشی کړ: ''او دا شریر شی بېرته هماغه د جرم ځای ته ستون شو. ''

بین له راډیو اسټېشن سره خبرو کې وویل، د اسټرالیا په دې سیمه کې چې له سډني ښاره د اتو ساعتونو په واټن کې موقعیت لري، دغه ډول ستر ماران یو واقعیت دی. دی وايي: ''ګورئ! دا نو اسټرالیا ده. ''