پر مار د چونګښو سپرلۍ

د یوه مار پر ملا سپرو چونګوښو تصویر د ډېرو لپاره د حیرانتیا سبب شوی او ځینو د ټوکو په انداز سیمې ته د اوبر ټرانسپورتي شرکت خدمتونو بیا راتګ بللی.

د اسټرالیا لوېدیځ یوې لرې پرتې سیمې اوسېدونکي پاول موک د مار پر ملا د ناستو چونګښو دغه تصویر د یکشنبې پر شپه له یوه توپاني بارانه وروسته اخیستی دی.

له بارانه وروسته د پاول پر ځمکو د اوبو جوړ شوی بند تر غاړو ډک شوی و او چونګښو له ډوبېدو د ځان ژغورنې لپاره د مار پر ملا له دغه ځایه تېښته کوله.

ښاغلی موک د 'ټرانسپورټ ' دغه حیرانونکی تصویر خپل ورور ته استولی و او هغه وروسته پر انټرنېټ خپور کړی.

له بي بي سي سره خبرو کې ښاغلي موک وویل، دی له خورا ګڼ بارانه وروسته بهر ته ووت، چې دغه صحنه یې ولیده.

نوموړی وايي، ګڼ باران په یوه ساعت کې د ځمکې پر مخ اووه سانتي متره اوبه ودرولې:

''بهر ته چې ووتم، جهیل مې ولید چې تر غاړو له اوبو ډک دی او چونکښې یې ژۍ ته راوتلې دي او له پورته کېدونکو اوبو تښتي. زرګونه چونګښې تښتېدې، بیا مې دغه ځايي مار ولید چې پر ملا یې چونګښې ناستې وې. ''

دغه مار چې اوږدوالی یې نژدې درې نیمو مترو ته رسېږي، د ښاغلي موک پر ځمکو ګرځي راګرځي. نوموړی یې په اړه وايي:

''موږ ورسره بلد یو. دا زموږ د اوبو زېرمې په شاوخوا کې ګرځي او کله چې مېرمن وینځل شوي کالي د وچېدو لپاره ویړوي، دی یې ډاروي. ''

ماهرین وايي، اژدها ډېره هوښیاري کړې، چې خپلې 'سپرلۍ ' یې نه دي خوړلې، که نه د چونګښو دغه ډول دومره زهرجن دی چې مار، کربوړي او تمساح هم وژلی شي.

پر انلاین د دغه تصویر خپرېدو که یوه لور ته ځینې کسان ډار کړي، ځینو ویلي، چې صحنه په لوی لاس جوړه شوې، ځینو بیا پرې ټوکې ټکالې هم کړې.