تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د وېنزویلا ځمکښوېدنو کې د وژل شویو شمېر ۳۶ تنو ته لوړ شوی
د وینزویلا د پلازمېنې کاراکاس سویل لوېدیځ ته په لا تېخېریاس ښار کې کې په وروستیو ځمکښوېدنو کې د وژل شویو کساو شمېر ۳۶ تنو ته لوړ شوی دی.
چارواکو ویلي ۵۶ نور کسان بې درکه دي چې د بېړنیو خدماتو شاوخوا زر مرستندویان یې پر لټون بوخت دي.
د وېنزویلا مرستیالې ولسمشرې دېلسي رودریګویز ویلي هڅې روانې دي چې نادرکه کسان پیدا او وژغورل شي.
نوموړې له هغو کورنیو سره خواخوږي هم ښودلې خپل خپلوان یې له لاسه ورکړي.
د وېنزویلا ولسمشر نیکولاس مادورو د دې خونړۍ پېښې له کبله درې ورځې ملي ماتم اعلان کړی.
ځايي رسنیو ویلي په وژل شویو کې دوه کوچني ماشومان دي.
پخوا د دغو ځمکښوېدنو د قربانیانو شمېر ۲۵ تنه ښودل شوی و خو تازه کورنیو چارو وزارت ویلي دا شمېر ۳۶ تنو ته لوړ شوی.
دا ځمکښوېدنې تر هغې وروسته پېښې شوې چې د سختو موسمي ورښتونو له کبله د 'اېل پاتو' سیند څنډې ماتې شوې او اوبو ور څېرمه کلی کورونه، دوکانونه او موټرونه لاهو کړل.
یوه ۶۵ کلن ځايي اوسېدونکي اې اېف پي خبري اژانس ته ویلي د کور هر څه یې اوبو وړی خو ده ځان تر ۴۰ دقیقو پورې د بام پر سر انټن پورې کلک کړی او ژغورلی دی.
یوې بلې ښځې بیا ویلي چې ټول عمر همدلته ښار کې اوسېدلې خو اوس یې کلی اوبو وړی.
چارواکي وايي لا تېخېریاس ته د غځېدلې بریښنا مزي پرې شوي او ښار تیاره کې ډوب دی.
له مسلکي مرستندویه ډلو سره روزل شوي سپي هم د احتمالي ژوندیو پاتې کسانو لټون کې مرسته کوي.
د وېنزویلا کورونیو چارو وزیر رېمیګیو سېلبوس وايي دا ځمکښوېدنې د جولیا توپان پایله کې د ریکارډ کچې ورښتونو له کبله پېښې شوې.
