تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
اوکرايين وايي خېرسون کې يې د روسيې دفاعي کرښه ماته کړې
د اوکرايين پوځ ادعا کوي چې د روسیې له خوا نيول شوې سيمه خرسون کې يې د روسي پوځ دفاعي کرښه ماته کړې ده.
روسيه د اوکرايين جنوب کې د خرسون ډېره برخه تر ولکې لاندې لري.
داسې ښکاري چې د اوکرايين له خوا دا پرمختګ جنوب کې د سيمو د نيولو په موخه کېږي، د اوکرايين پوځ هڅه کوي چې د روسیې اکمالاتي لارې بندې کړې.
د روسيې پوځ د اوکرايين د دې ادعا په اړه څه نه دي ويلي خو يوه چارواکي دا ادعا"دروغ" بللې ده.
بل پلو د کريميا سيمې لپاره د روسيې له خوا ټاکل شوي مشر سرګي اکسينوف ويلي، اوکراييني ځواکونو ته په جنوب او په نورو سيمو کې سخت زيانونه رسېدلي دي.
د اوکرايين او روسیې له خوا ادعاوې په خپلواکه توګه نه دي تائيد شوې.
دوشنبې (۲۹ اګست) د اوکرايین په جنوب کې د کاخوفکا عملياتي ډلې وويل، د روسيې ملاتړو ځواکونو د خرسون په سیمه کې يو کنډک پرايښی دی
د اوکرايين د هرمادسک تلويزيون ويلي، د اوکرايين پوځ کې دريو سرچينو تائيد کړې چې د دفاع لومړۍ کرښه ماته شوې ده.
په عین حال کې، د اوکراین د پوځ ویاندې نتالیا هومینیک ويلي: "زموږ اصلي موخه د دښمن د مهماتو د زېرمو وېجاړول دي چې په تېره اوونۍ کې له لسو څخه زياتې پوځي اډې ويجاړې شوې."
خو اغلې هومینیک د نورو جزیاتو له ورکولو ډډه وکړه.
بل پلو د د اټومي انرژۍ نړویوالې ادارې( IAEA) مشر وايي، اټومي څارنې یوه پلټونکې ډله یې د اوکرایین زاپوریژیا اټومي بټۍ خوندیتوب لپاره دغه ځای ته روانه ده.
د دغې ادارې عمومي مشر رافایل ګروسي ويلي، تمه کېږي چې ټیم به د روانې اوونۍ وروستیو کې بټۍ ته ورسېږي.
هغه په یوه خپاره شوي ټویټ کې ویلي:" موږ باید د اوکرایین او اروپا د تر ټولو لویو اټومي تاسیساتو امنیت خوندي کړو."
دغه اټومي بټۍ اوکرایین کې د مارچ میاشتې راهیسې د روسي ځواکونو له خوا نیول شوې ده.
د اوکرایین په سویل ختیځ کې د اټومي تاسیساتو په شاوخوا کې جګړه د دې لامل شوې چې د دغې ساحې د خوندیتوب او امنیت په اړه د نړیوالو اندېښنې زیاتې کړي.
