تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
اسرائیل د راکټي بریدونو غبرګون کې پر غزې بمبار کړی
د اسرائیلي پوځ جنګي الوتکو تېره شپه د څو ساعتونو لپاره په غزه کې پر یو شمېر سیمو هوایي بمبار کړی دی. اسرائیل وایي، دا بمبار یې د فلسطیني وسلوالو ډلو لخوا د راکټي بریدونو په غبرګون کې کړی دی.
تر اوسه په دې بریدونو کې دواړو لوریو ته د مرګژوبلې په اړه رپوټونه نه دي ترلاسه شوي.
د اسرائیلو پوځ ویلي، خبلو بمباریو کې یې د غزې په سویل کې د حماس ډلې د وسلوالو یوه غونډه هم په نښه کړې ده.
دوی ادعا کوي چې په دې غونډه کې د حماس وسلوالو پر د اسرائیل د برید لپاره توغندي چمتو کول.
پوځ همدا راز ویلي، له بمبار پیلولو وړاندې یې غزه کې د سیمې خلکو ته خبرداری ورکړی و چې خوندي ځایونو ته ووځي.
پر خواله رسنیو خپرو شویو ویډیوګانې کې ښکاري چې د غزې په استوګنیزو سیمو کې له بمبار وروسته اورونه بل دي.
ویل کېږي چې دا اور د غزې سویل خان یونس سیمه کې له بمبار وروسته لګېدلی دی.
حماس ډله هم مني چې د غزې په شمال کې د دوی مرکزونه د اسرائیلي ټانکونو او الوتکو لخوا په نښه شوي دي.
یاده دې وي چې د شنبې پر سهار دوه راکټونه د اسرائیل تل ابیب ښار ته نږدې سیند کې ولوېدل. خو تر دې دمه کومې فلسطینۍ وسلوالې ډلې د دې راکټونو د توغولو مسؤلیت نه دی منلی.
د تېر ۲۰۲۱ کال په می میاشت کې د اسرائیل او غزې پر ګډه پوله ۱۱ ورځې خونړۍ جګړه وشوه چې په پایله کې یې شاوخوا ۲۵۰ کسان په غزه او ۱۳ کسان په اسرائیل کې ووژل شول.
