د امریکا کانګرس شاوخوا سیمه د "بهرني ګواښ" له کبله وتړل شوه

په داسې حال کې چې دوې ورځې وروسته د امریکا منتخب ولسمشر جو بایډن لوړه کوي، د دغه هېواد کانګرس ودانۍ 'کاپیټول ' کې د امنیتي ګواښ له کبله غیر عادي امنیتي احضارات پلي شوي دي.

پر دغه ودانۍ د جنورۍ پر شپږمه نېټه د ولسمشر ټرمپ پلویان وروختل او په هغه پېښه کې شپږ کسان وژل شوي وو.

د پېښې په ځای کې خبریالان وايي، د بېړنیز حالت اعلان بیا بیا تکرایرږي او د جوبایډن د لوړې مراسمو یو لړ تمرینات لغو شوي دي. د ودانۍ په شاوخوا کې کلک امنیتي تدبیرونه شوي او د ملي ګارد زرګونه سرتېري ځای پر ځای شوي دي.

عیني شاهدانو په سیمه کې لوګي لیدلي او د واشنګټن اور وژنې اداره وايي، هلته نژدې یې د یوه اور وژنې ته کسان لېږلي او اوس دا اور وژل شوی دی.

د ودانۍ کارکوونکو ته په یوه اعلامیه کې ویل شوي، چې هېڅوک نه خو ودانۍ ته د ننوتو اجازه لري او نه هم ترې بهر ته تلای شي. د چارشنبې پر ورځ د جوبایډن لوړې له مراسمو مخکې د تاوتریخجنو احتمالي مظاهرو له وېرې د امریکا پنځوسو ایالتونو او کولبمیا ډسټرکټ (ډي سي) د تیارسئ په حالت کې دي.

څارګرې ادارې ایف بي ای د ایالتي پارلمانونو ودانیو په شاوخوا کې د ټرمپ د وسله والو پلویانو احتمالي مظاهرو خبرداری ورکړی دی.

کانګرس غړي اوسمهال رخصت دي او د جوبایډن د لوړې مراسمو له تر سره کېدو مخکې غونډه نه کوي.