هند کې د کورونا له امله د مړو شمېر له ۵۰ زرو واوښت

د هند روغتیا وزارت وايي، په دغه هېواد کې د کورونا وېروس له امله د مړو شمېر له ۵۰ زرو واوښت.

د وروستیو رسمي شمېرو له مخې تر اوسه په هند کې د کورونا له امله ۵۱ زره او ۴۵ کسانو خپل ژوند له لاسه ورکړی دی.

په هند کې ۲ میلیونه ۶۴۷ زره ۶۶۳ کسان په کووېډ-۱۹ ناروغۍ اخته شوي دي.

نوي زیلنډ کې د ټاکنو ځنډېدل

له بلې خوا نوي زیلنډ کې کورونا وېروس د پارلماني ټاکنو تر سره کول نږدې میاشت وځنډول.

ټاکلې وه پارلماني ټاکنې د سپټمبر په نولسمه تر سره شي خو اوس به د اکټوبر په ۱۷ کیږي.

د نوي زیلنډ لومړۍ وزیره جسیندا اردرن غواړي ګوندونه له تبلیغاتي چانسونو ډېره ګټه واخلي.

د مېرمن اردرن په وینا، د ټاکنو ځنډ به ګوندونو ته وخت ورکړي چې حالاتو ته په کتو خپل تبلیغات پیل کړي.

په تېرو څو ورځو کې د نوي زیلنډ په لوی ښار اوکلند کې د کورونا ویروس له امله د قرنطین محدودیتونه سخت شول

اغلې اردرن وایي، د ټاکنو د ځنډ پرېکړه به ټولو ګوندونو ته دا فرصت ورکړي چې په راتلونکو نهو اونیو کې په خپله ګټه تبلیغات وکړي او د ټاکنو کمېسون به هم د ټاکنو لپار خپل چمتوالی ونیسي

له دې وړاندې اپوزیسون ګوندونو هم د ټاکنو د ځنډ غوښتنه کړې وه.