کورونا وېروس: اروپايي هېوادونو ته د روغتیا نړیوال سازمان خبرداری

په ټوله نړۍ کې د کورونا وېروس له کبله د اغېزمن شویو کسانو شمېر له ۴۴ لکه اوښتی او له درې لکه ډېر کسان د دغې ناروغۍ له کبله مړه شوي دي.

بل لور ته د روغتیا نړیوال سازمان وايي، په ژمي کې ښايي اروپايي هېوادونه د کورونا وېروس له خطرناکې دویمې څپې سره مخامخ شي.

په دغه ادراه کې د اروپايي برخې مشر ډاکټر ههینس کلوچ هغو هطوادونو ته خبرداری ورکړی، چې قرنطین محدودیتونه نرموي او په وینا یې دا د مېلې وخت نه دی، بلکې د چمتوالي وخت دی.

برتانیا حکومت وايي، په دغه هېواد کې د کورونا وېروس له کبله ۳۸۴ نور کسان مړه شوي دي، چې دې سره په ټول هېواد کې د کورونا وېروس له کبله د مړو شویو کسانو شمېر ۳۳۹۹۸ تنو ته رسېدلی دی.

تازه شمېرې ښيي چې د پنجشنبې پر ورځ د ۱۳۳۷۸۴ کسانو معاینات شوي دي. بل لور ته د دغه هېواد روغتیا وزیر مټ هانکاک په ورځنۍ غونډه کې وویل، برتانیا کې د کورونا وېروس له کبله د مړینې شمېر کې کموالی راغلی او په خبره یې موږ د وبا د اوج له پړاوه تېر شوي یو.

د پاکستان پنجاب ایالت کې بیا د پېر او پلور پلورنځیو او موټرو صنعت ته د مې له ۱۸ وروسته داسې حال کې د کاروبار بېرته پیلولو اجازه ورکول کېږي چې په هېواد کې د کورونا وېروس ناروغانو شمېر له ۳۸۰۰۰ کسانو اوښتی دی. په دغه هېواد کې ۸۲۲ کسان د یادې ناروغۍ له کبله مړه شوي دي.

په خیبر پښتونخوا کې د دغې ناروغۍ له کبله ۲۸۴ کسان مړه شوي چې د بل هر ایالت پرتله ډېر شمېر دی.

او جاپان حکومت په هېواد کې روغتیايي بېړنیز حالت پای ته رسولی.

د خیبر پښتونخوا اطلاعاتو صوبايي سلاکار اجمل وزیر وايي، د دوشنبې له ورځي به په صوبه کې ټرانسپورټ ته د فعالیت اجازه ورکړل شي.

ښاغلی وزیر وايي پرېکړه له فدرالي حکومت سره له مشورې وروسته شوې او ښاري ټرانسپورټ ته به د احتیاطي تدبیرونو پلي کولو په شرط اجازه ورکړل شي.

له تېرو څو ورځو راهیسې په دغه هېواد کې د کورونا وېروس نویو ناروغانو شمېر کم شوی دی. بل لور ته په نیوزیلنډ کې د کورونا وېروس مخنیوي محدودیتونو له نرمښت وروسته زرګونه کاروبارونه پرانیستل شوي دي.

د کوویډ - ۱۹ ناروغۍ لپاره د ملګرو ملتونو ځانګړي استازي ویلي، خلک باید له سختو محدودیتونو سره ځان عیار کړي او په وینا یې ښايي د ژوند چارې د پخوا په څېر عادي حالت ته راونه ګرځي.