تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
افغانستان کې یو امریکايی سرتېری وژل شوی
د ناټو په مشرۍ د غوڅ ملاتړ ماموریت وايي، د ' اګست میاشتې پر ۲۹مه' په افغانستان کې یو امریکایی سرتېری وژل شوی دی.
د دوی په یوه بیان کې نور معلومات نه دي ورکړي چې دا سرتېري چېرته وژل شوي دي.
د امریکا د دفاع وزارت د پالیسۍ له مخې هم د دغه هېواد د وژل شویو سرتېرو هوویت تر ۲۴ ګړیو نه ښودل کېږي.
د روان ۲۰۱۹ میلادي کال له پیله تراوسه ۱۷ امریکایي سرتېري په افغانستان کې وژل شوي.
د روانې اګسټ میاشتې پر ۲۲مه هم دوه امریکايي سرتېري د عملیاتو پرمهال وژل شوي وو.
او د تېرې مارچ میاشتې پر ۲۲مه هم د دوو امریکايي سرتېرو د وژل کېدو خبر ورکړل شوی و.
افغانستان کې د پرېکند ملاتړ اعلامیه د دې سرتېرو نوره پېژندنه او د پېښې ځای نه ډاګیزوي.
دا مهال په افغانستان کې شاوخوا ۲۰۰۰۰ بهرني سرتېري مېشت دي، چې ډېری یې امریکایان دي.
د امریکا د دفاع وزارت د شمېرو له مخې، په ۲۰۰۱ کال پر افغانستان د امریکا تر یرغل وروسته، په دې هېواد کې د امریکا ۲۲۱۶ سرتېري وژل شوي.
امریکا په افغانستان کې نژدې ۱۴ زره سرتېري لري چې د افغان ځواکونو په روزنه او د وسلوالو ضد عملیاتو کې په همکارۍ بوخت دي.
امریکایي چارواکي د خبرو له لارې غواړي طالبانو سره جوړ جاړي ته په رسېدو نژدې نیمايي سرتېري له افغانستان وباسي.
د امریکا دفاع وزارت وايي، دوی د ۲۰۰۱ کال له اکټوبر د ۲۰۱۹ کال تر مارچ پورې د افغانستان جګړه کې ۷۶۰ میلیارد ډالر لګولي او افغانستان کې د روان کال لګښت یې هم ۱۸ میلیارد ډالر اټکل شوی دی.
