تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د متحده عربي اماراتو 'زرین کارت'؛ زرګونو پانګوالو ته دایمي اقامه
د عربي متحدو اماراتو د دبۍ واکمن شیخ محمد بن راشد آل مکتوم ویلي، د دایمي اقامې د 'زرین کارت' له سیستم نه په ګټې اخیستو به په دې هېواد کې پانګوال، د طب، انجنیرۍ، علومو او ټولو هنرونو په برخه کې استثنايي وړتیا لرونکي کسان ګټه واخیستی شي.
شیخ محمد بن راشد آل مکتوم وايي، کابو ۷ زره بهرنیو بهرنیو پانګوالو ته یې د دایمي وېزو سیستم چمتو کړی دی.
مخکې تر ډېره اماراتو کې بهرنیو وګړو ته د استوګنې لنډمهالې اقامې ورکول کېدې، چې په دوراني توګه به نوې کېدې.
خو د اماراتو حکومت تېر کال اعلان وکړ د اقامو موده به اوږده کړي چې بهرني سوداګر او پوهان ګټه ترې واخیستی شي.
د دبۍ واکمن شیخ محمد بن راشد آل مکتوم، چې لومړی وزیر هم دی، پر خپل ټویټر لیکلي: "نن مو د "زرین کارت" د دایمې اقامې سیستم پیل کړ... دا سیستم په طب، د انجنیرۍ، علومو او ټولو هنرونو په برخه کې پانګوالو او استثنايي وړتیا لرونکو کسانو ته دی".
نوموړی وايي: "په لومړۍ جوپه کې به د دایمې اقامې ۶۸۰۰ هغو مستحقو کسانو ته دایمي اقامې ورکړل شي چې پانګونه یې تر ۱۰۰ میلیارد درهمو اوړي".
له دې ګام نه هدف د خلیجي هېوادونو د اقتصاد ملاتړ ښودل شوی، چې د تېلو د بیو له لوېدو سره اغېزمن شوی دی.
د اماراتو په اقتصاد کې بهرنیو پانګوالو شاوخوا ۲۷ میلیارد ډالره پانګونه کړې ده.
شیخ محمد وايي دایمي اقامه به ځانګړو کسانو او استثنايي استعداد لرونکو کسانو ته ورکول کېږي.
د اماراتو د وزیرانو شورا تېر کال هغو بهرنیانو ته د ۱۰ کلونو لپاره وېزې ورکړې، چې په اماراتو کې یې د ۱۰ میلیون اماراتي درهمو په اندازه پانګونه کړې ده، خو شرط دا و چې د پانګونې لږترلږه ۶۰ سلنه به یې قراردادي برخه نه جوړوي.
چارواکو هغو کسانو ته هم د پنځو کلونو لپاره اقامې ورکړې چې لږترلږه د قراردادونو ارزښت یې ۵ میلیارد اماراتي درهمو ته رسېږي.
د سعودي 'ګرین کارډ' ته ورته ځانګړې اقامه
په روانه میاشت کې سعودي عربستان کې شورا د بهرنیو پانګوالو جذبولو لپاره 'ګرین کارډ' ته ورته جواز ورکول تایید کړي دي.
د شورا ۷۶ غړو دا وروستیو کې د اوسېدو جواز یا اقامې ورکولو دغه ډول تایید کړی دی او ۵۵ غړو یې ورسره مخالفت کړی.
د دغه جواز له لارې سعودي چارواکي غواړي، پانګه وال په دغه هېواد کې کاروبار ته وهڅوي. د اقامې دغه نوي ډول ته په ځايي رسنیو کې د 'پرېویلجډ ' یا ممتاز اصطلاح کارول کېږي.
د دغې اقامې لرونکي به نه یوازې د خپل کاروبار لپاره مزدوران او مسلکي کارګر ګومارلی شي، بلکې سعودي عربستان کې به د جایداد او ګاډي پېر او پلور اجازه هم ولري.
دې سره به د اقامې لرونکي هر وخت کولای شي له هېواده بهر لاړ شي او د دې لپاره به دوی د کفیل یا سپانسر درلودلو اړتیا نه لري.
